އައްޑޫ ސިޓީ މީދޫ، މަތިކިޅި އިކޯ ގާޑެންގެ ބޮޑު ސަރަހައްދެއްގައި އަލިފާން ރޯވެއްޖެއެވެ.
އެމްއެންޑީއެފުން މިއަދު ބުނީ، އެ ތަނުގައި އަލިފާން ރޯވެގެން ފަޔާ ރެސްކިއު ޓީމުން ހަރަކާތްތެރިވަމުން އަންނަ ކަމަށެވެ.
އިތުރު މައުލޫމާތު ހިއްސާކުރައްވަމުން އައްޑޫ ސިޓީ ކައުންސިލްގެ، މީދޫ ދާއިރާގެ ކައުންސިލަރު އާމިނަތު ޞާލިހާ ވިދާޅުވީ މި ހާދިސާ ހިނގީ މިއަދު ހަވީރު، އިރުއޮއްސެން ކައިރިވެފައި ވަނިކޮށް ކަމަށެވެ.
ޞާލިހާ ވިދާޅުވީ އަލިިފާން ރޯވީ ހުޅުދޫއާ ވީ ދިމާއިން ކަމަށެވެ.މިވަގުތު ވެސް އަލިފާން ކޮންޓްރޯލް ނުކުރެވި ރޯވަމުން އަންނައިރު، މިހާރު އިކޯ ގާޑެންއާ ވަރަށް ކައިރިވެފައިވާ ކަމަށް ވިދާޅުވިއެވެ.
އެއާއެކު އަލިފާން ނިއްވުމުގެ މަސައްކަތުގައި ފުލުހުންނާއި ސިފައިން ހަރަކާތްތެެރިވަމުން އަންނަކަމަށް އޭނާ ވިދާޅުވިއެވެ.
"ވައި ވެސް ހުރި ގޮތުން އިކޯ ގާޑެންްއާ ދިމާއަށް ދަނީ، އެ ތަން ސަލާމަތްކޮށް ނިއްވައިލެވޭތޯ މި މަސައްކަތް ކުރަނީ،" ޞާލިހާ ވިދާޅުވިއެވެ.
ޞާލިހާ ވިދާޅުވީ މީގެ ކުރިން ވެސް އެ ތަނުގައި އަލިފާނުގެ ހާދިސާތައް ހިނގައިފައި އެބަހުރި ކަމަށެވެ. އެގޮތުން ބައެއް ފަހަރު އަމިއްލައަށް ރޯވެ ހާދިސާތައް ހިނގައިފައިހުރިއިރު، ގަސްދުގައި ވެސް މީހުން ރޯކޮށްފައި އެބަހުރި ކަމަށް ވިދާޅުވިއެވެ.
"މިތާ އޮޅުދަނޑުތަކާއި، އަނެއްހެން ދަނޑުވެރިކަމުގައި، އެ ސަރަހައްދާ ކައިރީގައި އުޅޭ މީހުން ވެސް ދޭތެރެ ދޭތެރެއިން އެ މީހުންގެ ދަނޑުތަކުގައި ރޯކޮށްލައިފައި ދިޔައިމާ، އެއް ސަރަހައްދެއްގައި އޮންނަ ތަނެއް ވީމާ އެއްކޮށް އެބަ [އަލިފާން] ހިފައިލާ،" ޞާލިހާ ވިދާޅުވިއެވެ.
ނަމަވެސް މި ހާދިސާ ހިނގައިދިޔަ ސީދާ ސަބަބު އަދި ނޭނގޭކަމަށް ވިދާޅުވިއެވެ.