މި މަހުގެ 15ވަނަ ދުވަހު، މިލިޓަރީ ހޮސްޕިޓަލް, ސެނެހިޔާ ކައިރީގައި ޒަހަމްތަކަކާއެކު ދިވެހި ފިރިހެނަކު ފެނުނު މައްސަލައިގައޮ ދެ މީހަކު ހައްޔަރުކޮށްފައިވާ ކަމަށް ފުލުހުން މިއަދު ބުނެފިއެވެ.
މީޑިއާތަކާ ފުލުހުން ހިއްސާކުރި މެސެޖެއްގައިވަނީ އެ ހާދިސާ ހިނގީ އެ ދުވަހުގެ ހެނދުނު 08:17 ހާއިރު ކަމަށެވެ. އެ ގޮތުން ޒަޚަމްވި މީހާ ހުރީ ރަތްވިލާމަގުގައި ސައިކަލެއްގައި ކަމަށާއި، އޭނާއަށް ހަމަލަދީ ޒަޚަމްކޮށްލީކަމަސް ފުލުހުން ބުންޏެވެ.
އެ މައްސަލަ ދިވެހި ފުލުހުންގެ ޚިދުމަތުގެ ގޭންގް ކްރައިމް އިންވެސްޓިގޭޝަނުން ތަހުގީގު ކުރަމުން އަންނައިރު ދެ މީހަކު މި މައްސަލައިގެ ތުހުމަތުގައި ހައްޔަރުކޮށްފައިވާ ކަމަށް ވަނީ ބުނެފައެވެ.
އެއީ މާލެ، ހ. ރޯޒެންޑޭލް، އުމުރުން 29 އަހަރުގެ ޞަފްވާން ޒުފްރަތާއި، ށ. ފޭދޫ، އުދަރެސް، އުމުރުން 34 އަހަރުގެ ޢަލީ ނާޝީދެވެ.
ޞަފްވާން ހައްޔަރުކޮށްފައިވަނީ 2025 މި މަހުގެ 20ވަނަ ދުވަހުގެ ރޭ 21:19 ހާއިރެވެ. ނާޝިދު ހައްޔަރުކޮށްފައިވަނީ މި މަހުގެ 21ވަނަ ދުވަހުގެ ދަންވަރު 01:09 ހާއިރެވެ.
އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ކޯޓުން އަމުރުކޮށްފައިވާކަމަށް ވަނީ ބުނެފައެވެ.
މާލެ ސަރަހައްދުގައި ގޭންގު ކުށުގެ ނުރައްކާ ބޮޑުވަމުން އަންނައިރު، މިއަދު ވެސް ޒަޚަމްވެފައި އޮއްވައި މީހަކު ފެނިފައެވެ.