ލ. ގަމުން އެއަތޮޅު ފޮނަދޫއަށް ސައިކަލުގައި ދިޔަ އަންހެނަކަށް ދެ ފިރިހެނުން ފުރައްސާރަކުރި މައްސަލައެއް ފުލުހުން ބަލަންފަށައިފިއެވެ.
މިކަމާ ގުޅިގެން ފުލުހުން ބުނީ، ގަމުން ފުނަދޫއަށް ދިޔަ އަންހެނެއްގެ ފޯނު ގަދަކަމުން ފޭރިގަންނަން މަސައްކަތް ކޮށް، ހެލްމެޓު ވަލުތެރެއަށް އެއްލައިލި މައްސަލައެއް މިމަހުގެ ހަވަނަ ދުވަހު 18:34 ހާއިރު ފުލުހުންނަށް ހުށަހަޅާފައި ވާކަމަށެވެ.
އަދި މި މައްސަލަ ބަލަމުން ގެންދާކަމަށް ފުލުހުން ވަނީ ބުނެފައެވެ.
މި ހާދިސާގެ ވީޑިއޯ އިއްޔެ ސޯޝަލް މީޑިއާގައި ވަނީ ދައުރުވެފައެވެ. މި ވީޑިއޯއިން ފެންނަ ގޮތުގައި އެއް ސައިކަލެއްގައި އައި ދެ ފިރިހެނުން ވަނީ އެ އަންހެން މީހާއާ ފުރައްސާރަކޮށްފައެވެ.
މި ވީޑިއޯ ހިއްސާކުރަމުން އަންހެން މީހާ ލިޔެފައި ވަނީ، އެ ދެމީހުން އޭނާ ފަހަތުން ސައިކަލު ދުއްވަން ފެށީ މަތިމަރަދޫ ލާމު ފިނިއައްޓާ ހިސާބުން ކަމަށެވެ. އަދި ހެލްމެޓް އަޅަން މުކުރިމަގުގައި މަޑުކުރުމުން އެމީހުން އޭނާއަށް ގޮވިކަމަށް ލިޔެފައި ވެއެވެ.
ފޮނަދޫއަށް ދެވުންއިރު ވެސް އެމީހުން އޭނާ ފަހަތުން ދުއްވި ކަމަށާއި ހެލްމެޓް ނަގަން މަޑުކުރުމުން އަނެއްކާ ވެސް އެމީހުން އޭނާއާ ވާހަކަދެއްކި ކަމަށް އޭނާ ލިޔެފައި ވެއެވެ.
އޭނާ ލިޔެފައިވާގޮތުގައި އެމީހުން އޭނާގެ ވީޑިއޯ ކުރިއެވެ. އެއާއެކު އޭނާ ވެސް އެމީހުންގެ ވީޑިއޯ ނަގަން ފެށި ކަމަށާއި އެމީހުން ރުޅިއައީ އެހިސާބުން ކަމަށް އޭނާ ލިޔެފައި ވެއެވެ.
އޭނާގެ އަތުން ފޯނު އަތުލަން މަސައްކަތް ކުރި ވަގުތު އޭނާގެ އަތަށް އަނިޔާ ލިބިފައިވާކަމަށް އެ ޕޯސްޓުގައި އަންހެން މީހާ ލިޔެފައި ވެއެވެ.
އަދި އަންހެން މީހާ އެމީހުންގެ ސައިކަލުގެ ނަމްބަރު ބޯޑު ހަލާކުކޮށްލި ކަމަށް ފުލުހުން ބުނިކަމަށާއި އެސައިކަލުގެ ނަމްބަރު ބޯޑު ހަލާކު ނުކުރާކަން ވީޑިއޯތަކުން ފެންނާނެ ކަމަށް އޭނާ ލިޔެފައި ވެއެވެ.