މިހާރު އުމުރުން 67 އަހަރުގެ އަބްދުލް ވާހިދު ދުންފަތުގެ އިސްތިއުމާލު ކުރަން ފެށީ އުމުރުން އެންމެ 15 އަހަރުގައެވެ. މިކަމުގެ ގެއްލުން އެނގޭއިރު ވެސް 48 އަހަރު ވަންދެން ދުންފަތުގެ އިސްތިއުމާލު ކުރުމާ ދުރު ނުވެވި ހުރީ އޭނާ ދުންފަތަށް ދެވިހިފާފައިވާލެއް ބޮޑުކަމުގެ ސަބަބުންނެވެ.
ނަމަވެސް، ވާހިދުގެ މުޅި ދިރިއުޅުން ބަދަލުވީ ދުންފަތުގެ ސަބަބަބުން އޭނާއަށް ފުއްޕާމޭގެ ކެންސަރާ ޖެހިފައިވާކަމުގެ ޚަބަރު ލިބުނު ހިސާބުންނެވެ. މުޅި އުމުރުގައި ވެސް މިތުރެއްގެ ގޮތުގައި ދެކުނު ދުންފަތާ ދުރުވެ މިހާހިސާބުން އޭނާ އަޒުމް ކަނޑައެޅީ ކެންސަރާ ހަނގުރާމަ ކުރާށެވެ. ހަޔާތުގެ އެ ހިތާމަވެރި ދަތުރު ވާހިދު ހިއްސާކުރީ އެ ވާހަކައިން އެހެން މީހުން އިބުރަތް ހާސިލްކުރާނެ ކަމުގެ އުންމީދުގައެވެ.
އޭނާ އެދުވަހު ޑޮކްޓަރަށް ދައްކަން ދިޔައީ މޫދަށް އެރި އުޅުމުގެ ތެރޭގައި ފީފާއެއްގައި ޖެހި މެއަށް ތަދެއް އެރުމުގެ ސަބަބުންނެވެ.
"...ފުރަތަމަ މޭގެ ޑޮކްޓަރަކަށް ދެއްކީމައި ސީޓީ ސްކޭނެއް ހަދަން ބުނީ. ޓެސްޓުތަކަށް ފަހު އަޅުގަނޑަށް ޔަގީންވެއްޖެ އަޅުގަނޑަށް ދުންފަތުގެ ސަބަބުން ކެންސަރު ޖެހިއްޖެކަން. އެދުވަހު ވަރަށް ދެރަވި. ހިތަށް އެރި ކުރީގައި ހުއްޓާލެވުނު ނަމަ ހާދަ ރަނގަޅުވީހޭ،" ވާހިދު ބުނީ އޭނާ ޑޮކްޓަރަށް ދެއްވީ އެއްގޮތަކަށް ވެސް އެފަދަ ޚަބަރެއް ލިބޭނެކަމަށް ހީކޮށްގެން ވެސް ނޫންކަމަށެވެ.
ސިނގިރޭޓު ބުއީ އޭގެ ގެއްލުން އެނގިހުރެ ކަމަށް ވާހިދު ބުންޏެެވެ. އަދި އެހާ ގިނައިން ދުންފަތް ބޭނުން ނުކުރުމަށް އެތައް ބަޔަކު އޭރު ވެސް ނަސޭހަތް ދެމުން ދިޔަ ކަމަށް ވާހިދު ބުންޏެވެ.
"އެހެންނަމަވެސް ސިނގިރޭޓަށް އެޑިކްޓުވެފައި ހުރުމުގެ ސަބަބުން ގެއްލުންވާ އެއްޗެއްކަން އެނގި ހުރެވެސް ބުއީމަ އޭގެ ހިތި ނަތީޖާ ތަޖުރިބާ ކުރަން ޖެހުނީ،"
ވާހިދު ސިފަކުރީ ކެންސަރުގެ ފަރުވާއަކީ ވަރަށް ވޭންދެނިވި ފަރުވާއެއް ގޮތުގައެވެ. ފަރުވާގެ ތެރެއިން އޭނާ ކީމޯ ތެރަޕީއާއި، ރޭޑިއޭޝަން ތެރަޕީ އަދި އިމިއުނޯ ތެރަޕީ ފަދަ ބާރުގަދަ ތެރަޕީތައް ނަގަން ޖެހުނެވެ.
އޭނާ ބުނީ މިއީ ވަރަށް އަސަރުގަދަ ހިތްދަތިކަމާއި ވޭނުން ފުރިގެންވީ ތަޖުރިބާއެކެވެ.
ވާހިދު އޭނާގެ ވާހަކަ ހިއްސާކުރަނީ -- ވީޑިއޯ/ ހެލްތު މިނިސްޓްރީ
"އޭރު ޑޮކްޓަރު ވެސް ބުނި އެކްސްރޭ ބަލާފައި ވެސް ދުންފަތުގެ ސަބަބުން ކަމަށޭ ލަފާކުރެވެނީ. ދެން އޭރު ފަރުވާ ފަށައިގެން އަޅުގަނޑު މިހާރު މިހުރީ ކެންސަރުން ރިކަވާ ވެފައި،" ދުންފަތާ މުޅިން ދުރުހެލިވެފައިވާ ވާހިދު ބުންޏެވެ.
ދުންފަތުގެ އިސްތިއުމާލުކުރާ މީހުންނަށް ވާހިދު ދޭ ނަސޭހަތަކީ ވަގުތު އޮއްވައި ދުންފަތާ ދުރުވުމަށެވެ. އަދި ކެންސަރުގެ ވޭންފަދަ ވޭނެއް ދުންފަތުގެ ސަބަބުން އެއްވެސް މީހަކު ތަހަންމަލް ކުރަން ބޭނުން ނުވާކަމަށް ވާހިދު ބުންޏެވެ.
"އަޅުގަނޑަށް މި ދިމާވި ހިތި ވޭނާއި ތަޖުރިބާ ތިބޭފުޅުން ނުކުރައްވާށޭ ދުންފަތުގެ ސަބަބުން،" މިއީ ދުންފަތުގެ އިސްތިއުމާލު ކުރާ އެންމެންނަށް އޭނާ ދޭ ނަސޭހަތެކެވެ.
"ސިނގިރޭޓު ބޯ ޒުވާންކުދިން ވެސް މިހާރުން ފެށިގެން ދުންފަތް ހުއްޓައިލަން އަޅުގަނޑު ނަސޭހަތް ދެނީ. ދުންފަތުގެ ސަބަބުން އަޅުގަނޑަށް މި ލިބުނު އަނިޔާ ކަހަލަ އަނިޔާއެއް ތިޔަ ކުދިން ވެސް ތަހަންމަލް ކުރަން ޖެހިދާނެ،" ވާހިދުގެ ވާހަކަ ނިންމާލަމުން ބުންޏެެވެ.