ޗެޓްޖީޕީޓީ ޗެޓްބޮޓުން އިންޑިއާގެ ފޮތް ލިޔުންތެރިންގެ ފިކުރީ މުދަލަށް ވަދެގަތުން ހުއްޓުވުމަށް އެދި، އޯޕަން އޭއައި އާ ދެކޮޅަށް ނިއު ދިއްލީގައި ކޮޕީރައިޓް މައްސަލައެއް ހުށަހަޅައިފިކަމަށް އެ ގައުމުގެ ފޮތްލިޔުންތެރިން ތަމްސީލުކުރާ ފަރާތަކުން ހުކުރު ދުވަހު ބުނެފިއެވެ.
ދުނިޔޭގެ އެކި ކަންކޮޅުތަކުގެ ކޯޓުތަކުގައި މިހާރު ވެސް ވަނީ މުސައްނިފުންނާއި، ޚަބަރު ފަތުރާ ފަރާތްތަކާއި، މިއުޒިކް ކުޅޭ ފަރާތްތަކުން ޓެކްނޮލޮޖީ ކުންފުނިތަކާ ދެކޮޅަށް މައްސަލަތައް ހުށަހަޅާފައެވެ.
މި މައްސަލަތަކުގައި އިންޑިއާގެ ފޮތްލިޔުންތެރިން ބުނަނީ އެ ފަރާތްތަކުގެ ކޮޕީރައިޓް އޮންނަ މަސައްކަތްތައް އޭއައި ސާވިސްތައް ތަމްރީނު ކުރުމަށް ބޭނުންކޮށްފައިވާ ކަމަށެވެ. އަދި މި ފަރާތްތަކުން އެދެނީ ޗެޓްބޮޓް ތަމްރީނު ކުރުމަށް ބޭނުންކޮށްފައިވާ މައުލޫމާތުތައް ފުހެލުމަށް ކަމަށެވެ.
ނިއު ދިއްލީގައި އޮންނަ ފެޑެރޭޝަން އޮފް އިންޑިއަން ޕަބްލިޝާސްއިން ރޮއިޓާސްއަށް ބުނެފައި ވަނީ މި މައްސަލަ ހުށަހަޅާފައި ވަނީ ދިއްލީ ހައި ކޯޓަށް ކަމަށެވެ. މި ކޯޓުގައި މިހާރު ވެސް ދަނީ އޯޕަން އޭއައި އާ ދެކޮޅަށް ހުށަހަޅާފައިވާ މިފަދަ އެހެން މައްސަލައެއް ބަލަމުންނެވެ.
މި މައްސަލަ ހުށަހަޅާފައި ވަނީ ފެޑެރޭޝަންގެ ހުރިހާ މެމްބަރުންގެ ފަރާތުން ކަމަށް ބުނެފައިވެއެވެ. މީގެ ތެރޭގައި ބްލޫމްސްބަރީ، ޕެންގުއިން ރެންޑަމް ހައުސް، ކޭމްބްރިޖް ޔުނިވާސިޓީ ޕްރެސް އަދި ޕެން މެކްމިލަން ފަދަ ޕަބްލިޝަރުންގެ އިތުރުން އިންޑިއާގެ ރޫޕާ ޕަބްލިކޭޝަންސް އަދި އެސްޗަންދު އެންޑް ކޯ ހިމެނެއެވެ.
"އަޅުގަނޑުމެން ކޯޓުގައި އެދެނީ އަޅުގަނޑުމެންގެ ކޮޕީރައިޓް އޮންނަ މައުލޫމާތުތަކަށް (އޯޕަން އޭއައި އިން) ވަދެގަތުން ހުއްޓުވުމަށް،" ފެޑެރޭޝަންގެ ޖެނެރަލް ސެކްރެޓަރީ ޕްރަނަވް ގުޕްތާ މި މައްސަލައާ ގުޅޭ ގޮތުން ދިން އިންޓަވިއުއެއްގައި ބުނެފައިވެއެވެ.
މި މައްސަލައިގައި ޗެޓްޖީޕީޓީ ޓޫލްއިން ފޮތްތަކުގެ ޚުލާސާ ހަދާ މައްސަލަ ހިމެނެއެވެ.
"އެ ފަރާތްތަކުން އަޅުގަނޑުމެންނާއެކު ލައިސަންސް ކުރަން ބޭނުން ނުވާނަމަ، އޭއައި ތަމްރީނު ކުރުމަށް ބޭނުންކޮށްފައިވާ ޑޭޓާސެޓްތައް ފުހެލުމަށާއި، އަޅުގަނޑުމެންނަށް ބަދަލު ދޭނެ ގޮތެއް ކިޔައިދިނުމަށް އެދެން، މިކަމުން އުފެއްދުންތެރިކަމަށް އަސަރުކުރާނެ،" އޭނާ އިތުރަށް ބުނެފައިވެއެވެ.
މި މައްސަލައަކީ ދުނިޔޭގެ އެކި ކަންކޮޅުތަކުގައި އޯޕަން އޭއައި އާ ދެކޮޅަށް ހުށަހަޅަމުންދާ މައްސަލަތަކުގެ ތެރެއިން އެއް މައްސަލައެވެ. މި މައްސަލަތަކުގައި އާންމު ގޮތެއްގައި ފާހަގަކުރެވެނީ ޗެޓްޖީޕީޓީ ފަދަ އޭއައި ޓޫލްތައް ތަމްރީނު ކުރުމަށް ކޮޕީރައިޓް އޮންނަ މައުލޫމާތުތައް ހުއްދަ ނެތި ބޭނުންކުރާ ކަމުގެ ޝަކުވާއެވެ.
މި މައްސަލަ ކުރިއަށްދާ ގޮތަކުން އޭއައި ޓެކްނޮލޮޖީގެ ދާއިރާއަށާއި، ކޮޕީރައިޓް ޤާނޫނުތަކަށް ބޮޑެތި އަސަރުތަކެއް ކުރުމަކީ އެކަށީގެންވާ ކަމެކެވެ. އަދި މުސްތަޤުބަލުގައި އޭއައި ޓެކްނޮލޮޖީ ތަރައްޤީކޮށް، ބޭނުންކުރުމުގައި އަމަލުކުރަންޖެހޭނެ ގޮތްތަކަށް ވެސް މި މައްސަލައިން އަލިއަޅުވާލައިފާނެއެވެ.