މާލޭގެ އިމާރާތެއްގެ ފަސްވަނަ ފްލޯއިން ކުޑަކުއްޖަކު ކިރިޔާ ނުވެއްޓި ސަލާމަތްވާ މަންޒަރު ފެންނަ ވީޑިއޯ ދައުރުނުކުރާން ފުލުހުން މިރޭ އެދިއްޖެއެވެ.
މިރޭ 21:36 ހާއިރު ސޯޝަލް މީޑިއާގައި ދައުރުވި ވީޑިއޯއިން ފެންނަނީ ވަރަށް ބޮޑަށް ހުޅުވިފައިވާ ކުޑަދޮރެއްގެ ފާރުކޮޅު މަތީ ކަކޫ ޖަހައިގެން އޮންނަ ތަނެވެ. އަދި މަޑުމަޑުން ދެ ފައި މަގަށްވާ ގޮތަށް ބޭރަށް ނެރި ކިރިޔާ ނުވެއްޓި އޮންނަ ތަން ފެނެއެވެ.
މި ކަމާ ގުޅިގެން ފުލުހުންވަނީ އެ ޚިދުމަތުން އެ ހާދިސާއާ ގުޅިގެން އަޅަންޖެހޭ ފިޔަވަޅުތައް އަޅަމުން އަންނަ ކަމަށް ބުނެފައެވެ.
އެ މަންޒަރު ފެންނަ ވީޑިއޯ ވެސް ފުލުހުންގެ ސަމާލުކަމަށް އައިސްފައިވާއިރު ވީޑިއޯ ދައުކުރުން ހުއްޓައިލައި ވީޑިއޯ ރިމޫވްކުރަން އިލްތިމާސްކުރާ ކަމަށް ވަނީ ބުނެފައެވެ.
ފުލުހުން ބުނީ އެ ފަދަ ވީޑިއޯތައް ދައުރު ކުރުމަކީ އެ ކުއްޖާއާއި ކުއްޖާގެ އާއިލާ އާންމުންގެ ފާޑުކިޔުމާއި، ނަފްސާނީ އަނިޔާއަށް ހުށަހެޅެން މެދުވެރިވާނެ ސަބަބެއް ކަމަށެވެ.
އާއިލާގެ އިތުރުން، އެ ވީޑިއޯ ފެންނަ ކޮންމެ މީހަކަށް ވެސް ނަފްސާނީ ގޮތުން އަސަރުކުރުމަކީ އެކަށީގެންވާ ކަމެއް ކަމަށް ފުލުހުން ބުންޏެވެ. މީގެ އިތުރުން، މިފަދަ މަންޒަރުތަކުގެ ސަބަބުން، ކުޑަކުދިން ނުވަތަ އެފަދަ ކަމަކަށް ހުށަހެޅުމުގެ ހާލަތު އޮތް ނުވަތަ އެހީ ހޯދާ މީހުން ޓްރިގާވެ، އެ މީހުން ނުރައްކަލަކަށް ހުށަހެޅޭނެކަމަށް ދެކޭކަމަށް ފުލުހުން ބުންޏެވެ.
"މިފަދަ ފޫޓޭޖްތައް ދައުރު ކުރުމަކީ، ސޯޝަލް މީޑިއާގައި ސަމާލުކަން ހޯދުމަށް މަސައްކަތްކުރާ ސަގާފަތެއް އާލާވެ، ސަލާމަތާއި ރައްކާތެރިކަމާ ގުޅޭ މުހިންމު ކަންކަމަށް ދެވޭ ސަމާލުކަން ކުޑަވެގެން ހިނގައިދާނެ ކަމެކެވެ،" ފުލުހުން ބުންޏެވެ.
ފުލުހުން ވަނީ އެ ފަދަ ވީޑިއޯތައް ދައުރުކުރުމުގެ ބަދަލުގައި ރައްކާތެރިކަމުގެ ފިޔަވަޅުތަކަށް އަހައްމިއްޔަތުކަން ދީ، ކުޑަދޮރުތަކާއި ބެލްކަނިތައް ރައްކާތެރިކުރުމާއި، ކުޑަކުދިންނަށް ނުރައްކާތަކާ ބެހޭގޮތުން ހޭލުންތެރިކުރުން މުހިންމު ކަމަށެވެ.
އަދި މިފަދަ ވީޑިއޯތައް އިތުރަށް ދައުރުކުރުމުގެ ބަދަލުގައި އެ ޕްލެޓްފޯމްތަކުން ނެގުމަށް ރިޕޯޓުކުރުން ފަދަ ކަންކަމަށް އިސްކަންދިނުމަށް ފުލުހުން ވަނީ ގޮވައިލައިފައެވެ.
"އެއްވެސް ފަރާތަކުން މި ވީޑިއޯ ޝެއާކޮށްފައިވާނަމަ އެ ނަގައި، އެހެން މީހުންނަށް ވެސް އެކަން ނުކުރުމަށް ބާރުއެޅުމަށް ދިވެހި ފުލުހުންގެ ޚިދުމަތުން އިލްތިމާސްކުރަމެވެ،" ފުލުހުން ބުންޏެވެ.
އެއާއެކު ފުލުހުން ވަނީ އެ ހާދިސާ އާ ގުޅިގެން އެއްވެސް މީހެއްގެ ކަންބޮޑުވުމެއް ނުވަތަ މަޢުލޫމާތެއްވާނަމަ، ދިވެހި ފުލުހުންގެ ޚިދުމަތުގެ ނަންބަރު 3322111 އަށް ގުޅައި ހިއްސާކުރުމަށް އެދިފައެވެ.
ކުޑަކުދިން އިމަރާތްތައް މަތިންް ވެއްޓުމުގެ ހާދިސާތައް މިދިޔަ އަހަރު ތެރޭ މަދުން ނަމަވެސް ހިނގިއިރު، އެ ކަން އެންމެ އާންމީ ހިޔާ ފްލެޓް ސަރަހައްދުގައެވެ.
އެހެންކަމުން އުސް އިމާރާތްތަކުގައި، ކުޑަކުދިން ދިރިއުޅޭނަމަ ކުޑަދޮރުތައް ރަނގަޅަށް ތަޅުލުމާއި، އެ ކުދިންނަށް ނުރައްކާވާނެ އެންމެހާ ކަންކަން ބަލައި ދެނެގަތުން ވަރަށް މުހިންމެވެ. އަދި ބޮޑު މީހެއް އަބަދުވެސް އެ ކުދިންގެ ހަރަކާތްތައް ބެލުން މުހިންމެވެ.