ކޮނޑުގައި އަޅުވާ ބެކްޕެކްތަކާއި ސްކޫލު ދަބަސްތަކުގެ މަގުބޫލުކަން މިހާރު ކުޑަވެއްޖެއެވެ. ގިނަ ބައެއްގެ ދަބަސްތައް މިހާރު ބަދަލު ކޮށްލާފައިވަނީ ޓޯޓް ބޭގަކަށެވެ. ދާ ކޮންމެ ތަނަކުން ވެސް ކޮންމެވެސް މީހަކު ޓޯޓްއެއް ގެންގުޅޭނެއެވެ. މިއަށް މި އަޅަނީ ކޯއްޗެއް ހެއްޔެވެ؟
ޓޯޓް އަކީ މުޅީން އާ އެއްޗެއް ނޫނެވެ. އެންމެ ފުރަތަމަ މިފަދަ ދަބަހެއް ފެނިފައިވަނީ 40ގެ ތެރޭގައެވެ. އެންމެ ފުރަތަމަ މި އުފެދިގެން އައީ ގަނޑުފެން އުފުލުމާއި ގެއަށް ބޭނުންވާ އެއްޗެހި އުފުލާ ހެދުމަށެވެ. ނަމަވެސް މާ ގިނަ ދުވަސްތަކެއް ޓޯޓްގެ މަގުބޫލުކަން ގެއިން ފެޝަންގެ ތެރެއަށް ވަނެވެ.
އެގޮތުން ފެޝަންގެ ނިޝާނެއްގެ ގޮތުގައި ޓޯޓް އެންމެ ފުރަތަމަ ފެނުނީ 60ގެ އަހަރުތަކުގެ ތެރޭގައެވެ. އެއަށްފަހު ތާރީހުގެ ތެރެއިން މި ދަބަހަކީ އެކި ދޭތެރެދޭތެރެއިން މަގުބޫލުކަން ހޯދާފައިވާ އެއްޗެކެވެ. އަދި ކޮވިޑަށް ފަހު އެތައް ފެށަނަކަށް ބަދަލުތައް އައި އިރު އެނބުރި އައި އެކައްޗަކީ ޓޯޓް އެވެ.
އަގުހެޔޮވެފައި ގެންގުޅެން ފަސޭހަ ކަމުން މި ފޮތި ދަބަސްތައް ވަރަށް އަވަހަށް ވައިގައި ހިފައިފިއެވެ. ބޭނުންގޮތަކަށް ޑިޒައިން ކޮށްލެވޭ ޓޯޓް ވެގެން ދިޔައީ ގިނަ ބައެއްގެ މެދުގައި މަގުބޫލު އެއްޗަކަށެވެ. މިހާރު މީގެ ދަބަސްތައް ހުރިހާ ދިމާލަކުން ފެންނާނެއެވެ. އަދި މީގެ އަގު ވެސް އެކި ރޭންޖުގައި އުޅޭނެއެވެ.
މާލޭގެ މަގުތައް މަތީންވެސް މި ދަބަސްތައް ފެންނާނެއެވެ. ޓޯޓް ހާއްސަ ވާ ސަބަބަކީ ތިމާ ބޭނުންވާ ޑިޒައިނެއް އެ ބޭނުންކޮށްލައިގެން ވީހާވެސް އަމިއްލަ ނަފްސާ ގުޅޭ އެއްޗެއް ފަސޭހައިން ހަދާލެވޭނެތީއެވެ. އަދި މި ދަބަހަކީ ވަކި ޖިންސް އަކަށް ހާއްސަ ދަބަހަކަށް ނުވުން ވެސް މިއީ މީގެ ހާއްސަ ކަމެކެވެ. އެހެންވީމާ މި ދަބަހަށް އަޅަނީ ކޯއްޗެއް ހެއްޔެވެ؟
"ބޭރަށް ދާއިރު ޓޯޓް ހަމަ ނުލައި މިހާރު ނުދެވޭނެ އެއް ތަނަކަށް ވެސް. ވޮލެޓުން ފެށިގެން ނޯޓް ފޮތާއި ހުރިހާ ކާޑުތަކާއި ލިޕް ބާމް ކަހަލަ ހުރިހާ އެއްޗެއް މީގައި ހުންނާނެ،" ޒުވާން ފިރިހެނަކު ބުންޏެވެ.
އާންމުކޮށް ބޭރަށް ދާއިރު ޓޯޓް ހިފައިން އުޅޭ ގިނަ ބަޔަކު ހަމަ ބުނަނީ މިފަދަ އެއްޗެކެވެ. ގެންގުޅެން ފަސޭހަ ވެފައި ޓޯޓްއަށް އިތުރު އެއްޗެހި އަޅަން ޖާގަ އޮތުމަކީ ވެސް ފައިދާއެކެވެ.
"ފިހާރައިން އެއްޗެއް ގަނެލަން ޖެހުނަށް އެ ލާނެ އެއްޗެއް އޮވޭ ޓޯޓް ހިފައިން އުޅެންޏާ. ހަވީރަށް ބޭނުން ކުރާއިރު ބާޒާރު ކުރަން ވެސް މި ދަބަސް ގެންގުޅެވޭނެ. އެހެންވީމަ ވަރަށް ފަސޭހަ އަސްލު،" ޒުވާން އަންހެނަކު ކިޔައިދިނެވެ.
އެހެންވީމާ ޓޯޓް މަގުބޫލުވާން ސަބަބުތައް އެބަހުއްޓެވެ. އަދި ލާ ކޮންމެ ހަވީރު ހެދުމަކާ އެކުވެސް ޓޯޓް ގުޅުމަކީ ގިނަ ބަޔަކު ޓޯޓަށް ލޯބި ކުރާ ކަމެކެވެ. އެހެންވީމާ ޓޯޓް ގެންގުޅޭ މީހުން މިއަށް އާންމުކޮށް އަޅައިގެން އުޅެނީ ކޯއްޗެއް؟