ތޫނު އެއްޗަކުން ބިދޭސީއަކަށް ބިރު ދައްކައި، ފޭރުނު ތިން މީހުން ފުލުހަށް

ތޫނު އެއްޗަކުން ބިދޭސީއަކަށް ބިރުދައްކައި، ފައިސާތަކެއް ފޭރިގަތް ތިން މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.

ފުލުހުން ބުނީ ތޫނު އެއްޗަކުން ބިދޭސީއަކަށް ބިރު ދައްކައިގެން ފައިސާތަކެއް ފޭރުނު މައްސަލައެއް ރޭ 22:14 އެހާކަންހާއިރު ފުލުހުންނަށް ހުށަހަޅާފައިވާ ކަމަށެވެ.

މި މައްސަލައިގައި ފުލުހުންގެ ބެލުމުގެ ދަށަށް ގެންގޮސްފައިވަނީ ދ. ހިތަދޫ، އައްޒާ، އުމުރުން 34 އަހަރުގެ މުބާރިކް މުހައްމަދާއި، ޏ. ފުވައްމުލައް، ދިގުވާނޑު، ގުރަހާގޭ އުމުރުން 30 އަހަރުގެ އަހްމަދު ފަޔާޒާއި، ޏ. ފުވައްމުލައް ދިގުވާނޑު، ކައިރުގޭ އުމުރުން 36 އަހަރުގެ އަހްމަދު ނަދީފެވެ.

ފުލުހުން ބުނީ މި މައްސަލަ ފުލުހުންނަށް ހުށަހަޅާފައި ވަނީ މާލޭ ރަސްފަންނު ސަރަހައްދުގައި ފައިމަގުގައި ޕެޓްރޯލް ކުރަން އުޅުނު ޕެޓްރޯލް ބީޓަކަށް ބަޔަކު ދުވެފައި ދިޔަތަން ފެނުމުން، ދުވެފައި ދިޔަ މީހުންގެ ފަހަތުން ދިޔަ މީހާއާ ބައްދަލު ކުރުމުން ކަމަށެވެ.

ފޭރުނު ކަަމަށް ތުހުމަތު ކުރެވޭ މީހުން ހޯދައި، ފުލުހުންގެ ބެލުމުގެ ދަށަށް ގެނައުމަށް އެހެން ޕްޓްރޯލް ބީޓްތަކުގެ އެހީތެރިކަމާއެކު ކުރެވުނު މަސައްކަތުން، އެ މީހުން ބެލުމުގެ ދަށަށް ގެނެވިފައިވާ ކަމަށް ފުލުހުން ބުންޏެވެ. އެ މީހުން އަތުލައިގަނެފައިވަނީ މާލޭ ނޯތު ހާބަރު ސަރަހައްދުންނެވެ.

އެ މީހުން ފޭރިގަތް ފައިސާގެ ތެރޭގައި ހިމެނެނީ، 1000 ރުފިޔާއާއިި، 10 ޔޫރޯއާއި، 10 ބަންގްލަދޭޝް ޓާކާގެ އިތުރުން 20 ސްރީލަންކަން ރުޕީސް އަދި ދެ ސިންގަޕޫރު ޑޮލަރެވެ.

ފުލުހުން ބުނީ އޭގެ ތެރެއިން އެ މީހުންގެ އަތުން ފެނުނީ 1000 ރުފިޔާއާއި 20 ސްރީލަންކަން ރުޕީސްއާއި ސިންގަޕޫރުގެ ދެ ޑޮލަރު ކަމަށެވެ.

ފުލުހުން ގެންދަނީ މި މައްސަލަ ތަހުގީގު ކުރަމުންނެވެ.

ހދ. ނޮޅިވަރަންފަރުގައި ފަތުރުވެރިއަކަށް ޖިންސީ ގޯނާކުރި މައްސަލައެއް ވެސް ފުލުހުން އަންނަނީ ބަލަމުންނެވެ. އެ މައްސަލައިގައި ކޯޓު އަމުރެއްގެ ދަށުން ހައްޔަރުކޮށްފައިވަނީ 30 އަހަރުގެ ދިވެހި ފިރިހެނެކެވެ.