ރ. ފައިނުގައި ތަރައްގީ ކުރުމަށް ނިންމާފައިވާ އެއާޕޯޓުގެ މަސައްކަތް އަންނަ މަހު އެމްޓީސީސީއާ ހަވާލުކޮށް، ލަސްނުވެ އަމަލީ މަސައްކަތް ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ، ފައިނަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.
އެހެން ނަމަވެސް މިދިޔަ ސަރުކާރުން ކަންކޮށްފައި އޮތް ގޮތުން އެ ކަމުގައި ދައްޗެއް އޮތްކަން ރައީސްގެ ވާހަކަފުޅުގައި ފާހަގަ ކުރެއްވިއެވެ. ވިދާޅުވީ މިއަދު އިފްތިތާހު ކުރި ފެނާ ނަރުދަމާގެ ބައެއް މަސައްކަތްތައް ކޮށްފައިވާ ސަރަހައްދު، އެއާޕޯޓު ސަރަހައްދާ ފުށުއަރާ ކަމަށެވެ. އެ ގޮތުން ގެންނަންޖެހޭ ބަދަލުތައް ގެނައުން، އެއާޕޯޓު މަޝްރޫއުގެ ތެރޭގައި ހިމެނިފައިވާ ކަމަށް އެ މަނިކުފާު ވިދާޅުވިއެވެ. އެއީ މިދިޔަ ސަރުކާރުން މި އެއާޕޯޓު އެޅުމަށް ހުރަސް އެޅުމަށް ޓަކައި ކުރި ކަމެއް ކަމަށް ރައީސް ވިދާޅުވިއެވެ.
"މިދިޔަ ސަރުކާރުން، އަޅުގަނޑަށް ގަބޫލު ކުރެވެނީ މި އެއާޕޯޓު އެޅުމަށް ހުރަސް އެޅުމަށް ޓަކައި އެއާޕޯޓަށް ސީދާ ބޭނުންވާ ސަރަހައްދުގައި ފެނާ ނަރުދަމާގެ މަޝްރޫއުގެ ބައެއް ތަންތަން ހުރީ ހަދާފައި" ރައީސް ވިދާޅުވިއެވެ.
އެއާޕޯޓު ސަރަހައްދާއި ފެނާ ނަރުދަމާގެ ބައެއް މަސައްކަތްތައް ކޮށްފައި އޮތް ސަރަހައްދާ ފުށުއަރާތީ ފައިނުގެ ރައްޔިތުން އެދޭގޮތަށް، ގެންނަންޖެހޭ ބަދަލުތައް ކުޑަ ޚަރަދެއްކޮށްގެން، އަދި ޚިދުމަތަކަށް ބުރުލެއް ނާރުވައި ކުރިޔަށްގެންދަވާނެ ކަމަށް ރައީސް ވަނީ ވިދާޅުވެފައެވެ.
އެ އެއާޕޯޓާ އެކު އެ ސަރަހައްދުގެ ރައްޔިތުންނަށް އިގުތިސާދީ ކުރިއެރުން ލިބިގެންދާނެކަން ރައީސް ފާހަގަ ކުރެއްވިއެވެ. އޭގެ ސަބަބުން ވަޒީފާގެ ފުރުސަތުތައް ފަހިވެގެންގޮސް، އެ ސަރަހައްދުގައި ޓޫރިސްޓު ރިޒޯޓުތައް އުފެދުމުގެ ފުރުސަތު ފަހިވާނެއެވެ.
ރ. އަތޮޅުގައި ގިނަ ރިޒޯޓުތަކެއް ތަރައްގީ ކުރުމުގެ ފުރުސަތު ފަހިކުރުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ. އެ އަތޮޅު ފައިނުގައި އަޅާ އެއާޕޯޓަކީ އިގުތިސާދީ ގޮތުން އެ ސަރަހައްދުގައި ކުރެވޭ ބޮޑު އިންވެސްޓްމެންޓެއްކަން ފާހަގަ ކުރައްވައި، ރައީސް ވިދާޅުވީ އިސްކަން ދީގެން އެ މަސައްކަތް ކުރިޔަށް ގެންދަވާނެ ކަމަށެވެ.
"...ދަންނަވާލަން ބޭނުންވަނީ، ތި ބޭފުޅުން އެދިލައްވާ ކަންކަން ސަރުކާރުން ވަރަށް އިސްކަންދީގެން މިރަށުގައި ކުރިޔަށް ގެންގޮސްދޭނަމޭ. ރައްޔިތުން އެދޭ ގޮތަށް، ރައްޔިތުންގެ ޚިޔާލާ މަޝްވަރާއާ އެކީގައި ކަންކަން އަޅުގަނޑުމެން ފުރިހަމަކޮށްދޭނަމޭ" ރައީސް ވިދާޅުވިއެވެ.
ރައީސް ވިދާޅުވީ އުންމީދަކީ ދެން ރަށަށް ކުރައްވާ ދަތުރުފުޅެއްގައި އެއާޕޯޓު ހުޅުވިގެން ދިއުން ކަމަށެވެ.
ފައިނުގައި އެއާޕޯޓް އެޅުމަކީ ރައީސް އަބްދުالله ޔާމީންގެ ވައުދުފުޅެކެވެ. އެ މަޝްރޫއު އޭރު އިއުލާނު ކުރުމާއެކު "ސޭވް ފައިނު" ގެ ނަމުގައި ވަނީ އެއާޕޯޓް އެޅުމާ ދެކޮޅަށް ކެމްޕެއިނެއް ފަށައިފައެވެ. އެ ކެމްޕެއިން ފެށީ އެއާޕޯޓް އަޅައިފި ނަމަ އެ ރަށުގެ ތިމާވެއްޓަށް ބޮޑެތި ގެއްލުންތަކެއް ވާނެ ކަމަށް ބުނެއެވެ.
ދެން ވެރިކަމަށް ވަޑައިގެންނެވި, ރައީސް އިބްރާހީމް މުޙައްމަދު ސާލިހު ނިންމެވީ ފައިނުގައި އެއާޕޯޓް އެޅުމުގެ ބަދަލުގައި އެރަށް ކައިރި އެހެން ރަށެއްގައި އެއާޕޯޓް އެޅުމަށެވެ. ނަމަވެސް އެ ވެރިކަން ނިމިގެން ދިޔައީ އެކަމުގެ އަމަލީ އެއްވެސް މަސައްކަތެއް ނުކުރެވި ވަނިކޮށެވެ.
ފައިނުގައި އެއާޕޯޓް އެޅުމަކީ ރައީސް މުއިއްޒުގެ ރިޔާސީ ވައުދުފުޅެކެވެ.