ޔުއޭފާ ޗެމްޕިއަންސް ލީގުގެ ލީގު ފޭސްގައި އިންޓާ މިލާނުގެ ވަރުގަދަ ޑިފެންސާ އެކު ސްޕާޓާ ޕްރާގް ބަލިކޮށް، މުބާރާތުގެ ފަހު 16 ޓީމުގެ ބުރުން ޖާގައެއް ހޯދުމާ ގާތަށް ޖެހިލައިފިއެވެ.
ސްޕާޓާގެ ދަނޑުގައި ކުޅުނު މެޗު އިންޓާއިން ކާމިޔާބުކޮށްފައިވަނީ 1-0 އިންނެވެ.
މެޗުގެ ހަމައެކަނި ލަނޑު މެޗުގެ 12 ވަނަ މިނެޓުގައި އިންޓާއަށް ކާމިޔާބު ކޮށްދީފައިވަނީ ކެޕްޓަން ލައުޓާރޯ މާޓިނޭޒެވެ.
މެޗުގައި ސްޕާޓާއިން ލަނޑެއް ޖެހޭތޯ މަސައްކަތްކުރި ނަމަވެސް މި ފަހަރުގެ މުބާރާތުގައި ޑިފެންސް އެންމެ ވަރުގަދަ ކަމަށް ބެލެވިފައިވާ އިންޓާގެ ޑިފެންސް ފޫއަލުވާލެވޭ ގޮތެއް ނުވިއެވެ. މިހާތަނަށް އިންޓާއިން ކުޅުނު ހަތް މެޗުގައި ބައި ކޮޅަށް ވަދެފައިވަނި އެންމެ ލަނޑެކެވެ.
މި ކާމިޔާބީއާ އެކު އިންޓާ މިހާރު އޮތީ ހަތް މެޗުން ލިބުނު 16 ޕޮއިންޓާ އެކު ހަތަރުވަނައިގައެވެ. ފަހު މެޗުގައި އަމިއްލަ ދަނޑުގައި އޭއެސް މޮނާކޯއާ ބައްދަލުކުރާ މެޗު އެއްވަރުވި ނަމަވެސް އިންޓާއަށް ފަހު 16 ޓީމުގެ ބުރުން ސީދާ ޖާގައެއް ކަށަވަރުވާނެއެވެ.
މެޗުން ބަލިވުމުން ސްޕާޓާ އޮތީ ހަތަރު ޕޮއިންޓާ އެކު 29 ވަނައިގައެވެ. ފަހު މެޗުން މޮޅުވި ނަމަވެސް އެ ޓީމަށް މިހާރު މުބާރާތުގައި އިތުރަށް ކުރިއަށް ދިއުމުގެ ފުރުސަތެއް ނޯންނާނެއެވެ.
މުބާރާތުގައި ބަޔާން މިޔުނިކާއި ފެޔެނޯޑް ބައްދަލުކުރި މެޗު ގިނަ ބަޔަކު ހައިރާން ކޮށްލުމަށް ފަހު 3-0 އިން ކާމިޔާބުކޮށްފައިވަނީ ފެޔެނޯޑެވެ. މެޗުގައި އެ ޓީމުގެ ތިން ލަނޑު ކާމިޔާބުކޮށްދީފައިވަނީ ސަންޓިއާގޯ ގިމެނޭޒާއި އަޔޭސޭ އުއެޑާއެވެ.
މި ކާމިޔާބީއާ އެކު ފެޔެނޯޑް މިހާރު އޮތީ 13 ޕޮއިންޓާ އެކު 11 ވަނައިގައެވެ. ބަޔާން އޮތީ 12 ޕޮއިންޓާ އެކު 15 ވަނައިގައެވެ. މިއީ މި ފަހަރުގެ މުބާރާތުގައި ބަޔާން ބަލިވި ތިންވަނަ މެޗެވެ.