ޔުއޭފާ ޗެމްޕިއަންސް ލީގުގެ ލީގު ފޭސްގައި އެންމެ ފަހުގެ ޗެމްޕިއަން ރެއާލް މެޑްރިޑާއި އާރްބީ ސާލްޒްބާގް ބައްދަލުކުރި މެޗު ކާމިޔާބުކޮށް ރެއާލުން މުބާރާތުގެ ފަހު 16 ޓީމުގެ ބުރުން ޖާގަ ހޯދުމަށް ކުރާ އުންމީދު އާކޮށްފިއެވެ.
ރެއާލްގެ ދަނޑުގައި ކުޅުނު މެޗު އެ ޓީމުން ކާމިޔާބުކޮށްފައިވަނީ 5-1 އިންނެވެ.
ރެއާލްގެ ފަރާތުން މޮޅު ކުޅުމެއް ފެނުނު މި މެޗުގައި އެ ޓީމުގެ ފުރަތަމަ ލަނޑު މެޗުގެ 23 ވަނަ މިނެޓުގައި ޖަހައި އެ ޓީމަށް ލީޑު ނަގައިދިނީ ރޮޑްރިގޯއެވެ. ދެވަނަ ލަނޑު މެޗުގެ 34 ވަނަ މިނެޓުގައި ކާމިޔާބު ކޮށްދީ ލީޑު ފުޅާކޮށްދިނީ ވެސް ރޮޑްރިގޯއެވެ.
ރެއާލްގެ ތިންވަނަ ލަނޑު ދެވަނަ ހާފުގެ ކުޅުން ފެށިތާ ތިންވަނަ މިނެޓުގައި ކާމިޔާބުކޮށްދިނީ ކިލިއަން އެމްބާޕޭއެވެ. ފަހު ދެ ލަނޑު މެޗުގެ 55 ވަނަ މިނެޓާއި 77 ވަނަ މިނެޓުގައި ކާމިޔާބުކޮށްދިނީ ވިނިޝިއަސް ޖޫނިއާއެވެ. ދެ ލަނޑާ އެކު ވިނީޝިއަސް ރެއާލަށް ކާމިޔާބުކޮށްދީފައިވާ ލަނޑުގެ އަދަދު މިވަނީ 101 އަށް އަރާފައެވެ.
މެޗުގައި ސާލްޒްބާގުން ކާމިޔާބު ކުރި ހަމައެކަނި ލަނޑު މެޗުގެ 85 ވަނަ މިނެޓުގައި ކާމިޔާބުކޮށްދިނީ މެޑްސްބިޑްސްޓުރުޕެވެ.
މި ކާމިޔާބީއާ އެކު ރެއާލް މިހާރު އޮތީ 12 ޕޮއިންޓާ އެކު 16 ވަނައިގައެވެ. ފަހު މެޗުގައި އަންނަ ހަފުތާގައި ބްރެސްޓާ ކުޅުމަށް ހަމަޖެހިފައިވާ މެޗު ކާމިޔާބުކުރެވި އަދި އެހެން މެޗުގެ ނަތީޖާ އެ ޓީމާ އެއްކޮޅަށް ހިނގައްޖެނަމަ ތާވަލުގެ ގަދަ އަށް ޓީމުގެ ތެރެއިން ޖާގައެއް ލިބުމަކީ ރެއާލަށް ގާތް ކަމެކެވެ.
ސާލްޒްބާގަށް ބަލައިލާއިރު މި މެޗުން ބަލިވުމުން ތިން ޕޮއިންޓާ އެކު ފަހު މެޗުގައި ކޮންމެ ނަތީޖާއެއް ނެރެވުނު ނަމަވެސް މި މުބާރާތުގައި ކުރިއަށް ނުދެވޭނެކަން ވަނީ ޔަގީންވެފައެވެ.
މުބާރާތުގައި އާރްބީ ލެއިޕްޒިގާއި ސްޕޯޓިން ލިޒްބަން ބައްދަލުކުރި މެޗު 2-1 އިން ކާމިޔާބުކޮށްފައިވަނީ ލެއިޕްޒިގެވެ. މެޗުގައި ލެއިޕްޒިގްގެ ދެ ލަނޑު ކާމިޔާބުކޮށްދިނީ ބެންޖަމިން ސެސްކޯއާއި ޔޫސުފް ޕޯލްސެންއެވެ. ސްޕޯޓިންގެ ހަމައެކަނި ލަނޑު އެ ޓީމަށް ކާމިޔާބުކޮށްދިނީ ވިކްޓާ ގިޔޮކެރޭސްއެވެ.
މި ނަތީޖާއާ އެކު ލެއިޕްޒިގަށް ފުރަތަމަ ކާމިޔާބީ ހާސިލުކުރެވިފައިވީ ނަމަވެސް މުބާރާތުގައި އިތުރަށް ކުރިއަށް ދިއުމުގެ ދޮރު ވަނީ ލެއިޕްޒިގަށް ބަންދުވެފައެވެ. ސްޕޯޓިން މެޗުން ބަލިވުމުން މިހާރު އޮތީ 10 ޕޮއިންޓާ އެކު 23 ވަނައިގައެވެ.