ދިވެހިރާއްޖޭގެ ތާރީޚުގައި ފުރަތަމަ ފަހަރަށް، ލިސްޓުކޮށްފައިވާ ސެކިއުރިޓީޒް ޓްރޭޑު ކުރުމަށް އޮންލައިން އޮޓޮމޭޓަޑް ޓްރޭޑިން ނިޒާމެއް ގާއިމްކޮށް، ރަސްމީ ސިފައިގައި އާއްމުންނަށް މިއަދު ހުޅުވާލައިފިއެވެ.
މިއީ މޯލްޑިވްސް ސްޓޮކް އެކްސްޗޭންޖު (އެމްއެސްއީ)އިން، އެ ކުންފުނީ ގެ 17 ވަނަ އަހަރީ ދުވަހާ ދިމާކޮށް އާންމުންނަށް ހުޅުވައިލި ޓްރޭޑިން ނިޒާމެކެވެ.
އެމްއެސްއީ އިން ލޯންޗުކޮށްފައިވާ އޮޓޮމޭޓަޑް ޓްރޭޑިން ނިޒާމުގެ ތެރޭގައި "އޯޑާ މެނޭޖްމަންޓް ސިސްޓަމް (އޯއެމްއެސް)"ގެ ނަމުގައި ބްރޯކާ ބެކް އޮފީސް ވެބް އެޕްލިކޭޝަނެއް ހިމަނައިފައިވެއެވެ. އެއީ ސެކިއުރިޓީޒް މާކެޓުގައި ރަޖިސްޓަރީކޮށްގެން ބްރޯކަރުންގެ ޚިދުމަތްދެމުން ގެންދާ ކުންފުނިތަކަށް, ސްޓޮކް އެކްސްޗޭންޖަށް ލައިވްކޮށް އިންވެސްޓަރުންގެ އޯޑަރުތައް ފޮނުވުމަށް މަގުފަހިކޮށްދިނުމަށާއި އޯޑަރުތައް މާކެޓުގައި ޓްރޭޑިން ބޯޑަށް ވަގުތުން ފޮނުވުމަށާއި، އޮޓޮމޭޓަޑް ޓްރޭޑިން ނިޒާމުގެ ތެރެއިން މެޗްކުރުމަށް ޒަމާނީ ޓެކްނޮލޮޖީގެ ޒަރީއާއިން މަގުފަހިކޮށްދިނުމުގެ ގޮތުން ބޭނުންކުރާ އެޕްލިކޭޝަނެކެވެ.
މީގެ އިތުރުން މޯލްޑިވްސް ސެކިއުރިޓީޒް ޑިޕޮސިޓަރީ ކުންފުނި (އެމްއެސްޑީ)އިން އެކުންފުނީގެ ޚިދުމަތްތައް އެކައުންޓު ހޯލްޑަރުންނަށް ފަސޭހަކަމާއެކު ފޯރުކޮށްދިނުމަށް ގާއިމްކޮށްފައިވާ ވެބްސައިޓްގައި "ޓްރޭޑް ކަނެކްޓް"ގެ ނަމުގައި އައު ފީޗާއެއް ތަޢާރަފުކޮށް، އިންފިނިޓީ އެކައުންޓު ހޯލްޑަރުންނަށް ފަސޭހަކަމާއެކު ބްރޯކަރެއް ޚިޔާރުކޮށްގެން އޮންލައިންކޮށް ޓްރޭޑް ކުރެވޭނެ ގޮތްތައް ހިމަނައިފައިވެއެވެ.
ޕްރައިވެޓް ކުންފުންޏެއްގެ ގޮތުގައި ޚިދުމަތް ދެމުން އައި އެމްއެސްއީއިން ބުނި ގޮތުގައި، ވޭތުވެދިޔަ 17 އަހަރުގެ ތެރޭގައި އެ ކުންފުނިން ވަނީ ރާއްޖޭގެ ސެކިއުރިޓީޒްގެ ބާޒާރު ތަރައްގީކޮށް ގިނަ ރައްޔިތުން ތަކަކަށް ޚިދުމަތްތައް ފަސޭހަކަމާއެކު ލިބިދިނުމަށް، ޒަމާނީ ޓެކްކޮނޮލީގެ އުފެއްދުންތެރިކަމުގެ ތެރެއިން، އެކި ޚިދުމަތްތައް މާކެޓަށް ތައާރަފު ކޮށްފައެވެ.
އެމްއެސްއީ އޮންލައިން ޓްރޭޑިން ޕްލެޓްފޯމް: މިއީ ލިސްޓުކޮށްފައިވާ ސެކިއުރިޓީޒް ޓްރޭޑު ކުރެވޭނެ އޮންލައިން އޮޓޮމޭޓަޑް ޓްރޭޑިން ނިޒާމެއް --
މީގެ ތެރޭގައި އިންވެސްޓަރުންނަށް މާކެޓްގެ ޚިދުމަތްތަކަށް ވާސިލުވެވޭ ސެލްފް-ސާވިސް ޕޯޓަލްއެއް ކަމުގައިވާ "އިންފިނިޓީ"؛ އިލެކްޓްރޯނިކް އޭޖީއެމް މެނޭޖްމަންޓް އަދި އީ-ވޯޓިން ސިސްޓަމެއް ކަމަށްވާ "ފަހިވޯޓް"؛ލިސްޓުކޮށްފައިވާ ކުންފުނިތަކުގެ ހިއްސާދާރުންގެ ދަފުތަރު ބެލެހެއްޓުމުގެ ކަންކަން ހަރުދަނާކުރުމަށް، ސެކިއުރިޓީޒް ރެޖިސްޓްރީ މެނޭޖްމަންޓް ސިސްޓަމް (އެސްއާރްއެމްއެސް)؛ އަދި ޕްރައިވެޓް މާކެޓް ޕްލެޓްފޯމްއެއް ކަމުގައިވާ ކަމުގައިވާ "ވިޔަނަ" އެމްއެސީއީގެ އަމިއްލަ އުފެއްދުންތަކުގެ ގޮތުގައި ގާއިމްކޮށްފައިވެއެވެ.
އެމްއެސްއީގެ ޓްރޭޑިން އިންފްރާސްޓްރަކްޗާ ޒަމާނީ ފެންވަރަށް ތަރައްގީ ކުރުމުގެ މަސައްކަތުގެ ތެރެއިން، މިއަދު ލޯންޗުކޮށްފައިވާ އޮޓޮމޭޓަޑް ޓްރޭޑިން ސިސްޓަމްގެ ސަބަބުން، އިންވެސްޓަރުންނަށް ފަސޭހަކަމާއެކު ސެކިއުރިޓީޒްގެ ބާޒާރުގައި ޓްރޭޑުކުރުމުގެ ފުރުސަތު ފަހިވާނެ ކަމަށް އެ ކުންފުނިން ބުނެއެވެ.
އޮޓޮމޭޓަޑް ޓްރޭޑިން ސިސްޓަމްގެ އިންޓާނަލް ޑިވެލޮޕްމަންޓު ފުރިހަމަކޮށް، މަދު ބަޔަކާއެކު ފާއިތުވި އަހަރުގެ ޖޫންމަހުން ފެށިގެން މިސިސްޓަމް ވަނީ ބީޓާ ލައިވްކޮށްފައެވެ. އަދި ބަލަންޖެހޭ ކަންކަން ބަލައި ފުރިހަމަކުރުމަށްފަހު، ސީއެމްޑީއޭއިން ވަނީ އެމްއެސްއީގެ އޮޓަމޭޓަޑް ޓްރޭޑިންގް ނިޒާމަށް، އިއްޔެ އެޕްރޫވަލް ދީފައި ކަމަށް އެމްއެސްއީން ބުނެއެވެ.
އިންވެސްޓަރުންނަށް އިންފިނިޓީގެ ޒަރިއްޔާއިން ބްރޯކަރުން މެދުވެރިކޮށް ޓްރޭޑު ކުރުމަށް، އިންފިނިޓީއަށް ވަނުމަށްފަހު ޕްލެޓްފޯމުގެ މައި ރިބަންގައި ހިމެނޭ "ޓްރޭޑް ކަނެކްޓް" ޓެބު މެދުވެރިކޮށް ބްރޯކަރުންގެ ޚިދުމަތްތަކަށް ވާސިލުވެގެން ރިއަލް ޓައިމްކޮށް މުޢާމަލާތްތައް ކުރިއަށް ގެންދިއުމުގެ ފަހިފުރުސަތު ލިބޭނެ ކަމަށް އެމްއެސްއީން ބުނެއެވެ.
ކޮންމެ އިންވެސްޓަރަކަށްވެސް އެއިންވެސްޓަރަކު ޚިޔާރުކޮށްފައިވާ ބްރޯކަރު މެދުވެރިކޮށް، ނުވަތަ އައު ބްރޯކަރާކާއެކު ރަޖިސްޓަރީ ކޮށްގެން ކޮންމެ ވަގުތެއްގައިވެސް ޓްރޭޑު ރިކުއެސްޓު ކުރުމުގެ ފުރުސަތު ވެސް މިނިޒާމުގެ ތެރެއިން ފަހިވާނެ ކަމަށް ބުނެފައިވެއެވެ. އިންވެސްޓަރުން އިންފިނިޓީ މެދުވެރިކޮށް ހުށަހަޅާ ކޮންމެ ޓްރޭޑު ރިކުއެސްޓެއް ވެސް ސްޓޮކް އެކްސްޗޭންޖަށް ފޮނުވުމުގެ ކުރިން، ކަނޑައެޅިފައިވާ އުސޫލުތަކުގެ ތެރެއިން ބްރޯކަރުގެ ފަރާތުން ވެރިފައި ކުރެވޭނެއެވެ.
އެމްއެސްއީގެ އޮޓޮމޭޓަޑް ޓްރޭޑިން ނިޒާމަކީ، އިންވެސްޓަރުންނަށް ފަސޭހަކަމާއެކު ޓްރޭޑު ކުރުމުގެ މަގު ފަހިކޮށްދިނިމަށް ގާއިމްކުރެވިފައިވާ ވަސީލަތެކެވެ. އިންފިނިޓީގެ ޓްރޭޑް ކަނެކްޓް މެދުވެރިކޮށް މާކެޓްގެ އެންމެ ފަހުގެ މަޢުލޫމާތާއި، އަގުތަކަށް އައިސްފައިވާ ބަދަލުތަކާއި، އޯޑަ ބުކްގެ ތަފްސީލުތައް އިންވެސްޓަރުންނަށް ފަސޭހަކަމާއެކު ލިބެން ހުންނާނެއެވެ. އަދި މީގެ ސަބަބުން، މާކެޓުގެ ޓްރާންސްޕޭރަންސީ އިތުރުވެ، އިންވެސްޓަރުންނަށް އެކަށީގެންވާ މަޢުލޫމާތުގެ މައްޗަށް ބިނާކޮށް ނިންމުންތައް ނިންމުމަށް މަގުފަހިވާނެއެވެ.
އެމްއެސްއީން ތަޢާރަފުކޮށްފައިވާ އޮޓޮމޭޓަޑް ޓްރޭޑިން ނިޒާމަކީ، ބްރޯކަރުންނަށް، ބްރޯކަރުންގެ އަމިއްލަ ޚިދުމަތްދޭ އެޕްލިކޭޝަންތައް އޭޕީއައި ބޭނުންކޮށްގެން ފަސޭހަކަމާއެކު ޕްލަގްއިން ކުރެވޭ ގޮތަށް، ޒަމާނީ ޓެކްނޮލޮޖީ ބޭނުންކޮށްގެން އުފައްދާފައިވާ ނިޒާމެކެވެ. އެހެންކަމުން ކުރިއަށް އޮތް ތަނުގައި ބްރޯކަރުންގެ ޚިދުމަތްތައް މާކެޓުގައި އިތުރަށް ފުޅާކުރުމަށް މިނިޒާމުގެ ތެރެއިން މަގުފަހިވާނެ ކަމަށް އެމްއެސްއީން ބުނެއެވެ.
ދިވެހިރާއްޖޭގެ މާލީސެކިއުރިޓީޒްގެ ގާނޫނުގެ ދަށުން ޕްރައިވެޓް ސްޓޮކް އެކްސްޗޭންޖެއްގެ ގޮތުގައި އެމްއެސްއީ ރަޖިސްޓަރީކޮށް، ކެޕިޓަލް މާކެޓް ޑިވަލަޕްމަންޓު އޮތޯރިޓީ (ސީއެމްޑީއޭ) އިން ލައިސަންސް ދީފައިވަނީ ޖެނުއަރީ 23، 2008 ވަނަ ދުވަހެވެ.