ކޭޕޮޕްގެ އެންމެ ބޮޑު ގްރޫޕު ކަމަށްވާ ބްލެކްޕިންކްގެ މެންބަރު ޖެނީ ކިމްގެ ފުރަތަމަ ސޯލޯ އަލްބަމް "ރޫބީ" އިއުލާނުކޮށްފިއެވެ.
ކާމިޔާބު އަލްބަމަކަށް ފަހު ބްލެކްޕިންކް ބްރޭކަކަށް ގޮސްފައިވަނީ 2023 ވަނަ އަހަރެވެ. އެއަށް ފަހު ގްރޫޕުގެ މެންބަރުން އަންނަނީ ސޯލޯ ކެރިއަރު ކުރިއެރުވުމުގެ މަސައްކަތް ކުރަމުންނެވެ. އެގޮތުން، މެންބަރުން ވަނީ ގްރޫޕުން ބޭރުން އަމިއްލަ މިއުޒިކް ރިލީޒްކޮށްފައެވެ.
ހަތަރު މެންބަރުންގެ ގްރޫޕު ތެރެއިން ކިމް ޖިސޫ ވަނީ އޭނާގެ އެކްޓިން ކެރިއަރު ފަށާފައެވެ. ބާކީ މެންބަރުން މިއުޒިކް ހެދުމުގައި އުޅޭއިރު އިތުރު މެންބަރެއް ކަމަށްވާ ރޮޒޭ ވަނީ އޭނާގެ ފުރަތަމަ އަލްބަމް ރިލީޒްކޮށްފައެވެ. އިތުރު މެންބަރެއް ކަމަށްވާ ލިސާ މަނޮބަން ވެސް އަންނަނީ އޭނާގެ ސޯލޯ އަލްބަމް ރިލީޒްކުރުމަށް ތައްޔާރުވަމުންނެވެ.
ދާދިފަހުން ޖެނީ އިއުލާނުކޮށްފައިވަނީ އޭނާގެ އަލްބަމެވެ. އޭނާ ވަނީ އަލްބަމްގެ ފުރަތަމަ ސިންގަލް "މާންޓްރާ" މި މަހުގެ ތެރޭގައި ރިލީޒްކޮށްފައެވެ.
މިހާރު އެންމެ ފަހުން އޭނާ ތައްޔާރު ވަނީ އޭނާގެ ފުރަތަމަ ސްޓޫޑިއޯ އަލްބަމް ރިލީޒް ކުރުމަށެވެ. އެ އަލްބަމްގައި ހޮލީވުޑްގެ ބޮޑެތި ތަރީން ފީޗާ ކުރާނެ ކަމަށް ޖެނީ ވަނީ އިއުލާނުކޮށްފައެވެ. އޭގެ ތެރޭގައި ޑޯޖާ ކެޓް އާއި ޗައިލްޑިޝް ގަމްބީނޯގެ އިތުރުން ޑޮއީޗީ އާއި ދުއާ ލިޕާ އަދި ކަލީ އޫޗީސް ފަދަ ބޮޑެތި ތަރީން ހިމެނެއެވެ.
ޖެނީގެ ފޭނުން ތިބީ އާ އަލްބަމަށް ތައްޔާރުވެގެންނެވެ. ޖުމްލަ 15 ލަވަ ހިމެނޭ މި ސްޓޫޑިއޯ އަލްބަމް ރިލީޒްކުރުމަށް ހަމަޖެހިފައިވަނީ މާޗު މަހުގެ ހަތްވަނަ ދުވަހެވެ.