ތުރުކީވިލާތުގެ ބޯލޫގެ ކާރްތާލްކަޔާ ސްކީ ރިސޯޓުގައި މިރޭ ހިނގި އަލިފާނުގެ ހާދިސާއާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތުރުކީވިލާތުގެ ރައީސް ރަޖަބް ޠައްޔިބު އުރްދުޣާނަށް ތަޢުޒިޔާ ވިދާޅުވެއްޖެއެވެ.
އަލްޖަޒީރާ ނޫހުގައިވާ ގޮތުން، އަލިފާނުގެ ހާދިސާ ހިނގީ ރިސޯޓުގެ ހޮޓަލެއްގައި ހިންގަމުންދިޔަ ރެސްޓޯރެންޓުގައެވެ. އެ ހާދިސާގައި މަރުވި މީހުންގެ އަދަދު 66އަށް އަރައިފައިވާއިރު، އަނިޔާވި މީހުންގެ އަަދަދު 51އަށް އަރާ ކަމަށް އެ ނޫހުގައިވެއެވެ.
ރައީސް އޮފީހުން ބުނީ ރައީސް މުއިއްޒު ތުރުކީވިލާތުގެ ރައީސް އުރްދުޣާނަށް ފޮނުއްވި ތަޢުޒިޔާގެ މެސެޖުގައި، އެތައް ބަޔަކަށް ހާނިއްކަވެ، ގިނަ ބައެއްގެ ފުރާނަ ގެއްލުނު މި ހާދިސާގެ ޚަބަރު އެއްސެވީ ފުން ހިތާމަޔާއެކުގައި ކަމުގައި ވިދާޅުވެފައި ވާކަމަށެވެ.
ރައީސް ވަނީ، އެ ހާދިސާގައި މަރުވި މީހުންގެ އާއިލާތަކަށާއި ތުރުކީވިލާތުގެ ސަރުކާރަށާއި ރައްޔިތުންނަށް ވަރަށް އިޚްލާޞްތެރިކަމާއެކު ތަޢުޒިޔާ ވިދާޅުވެފައި ކަމަށް ރައީސް އޮފީހުން ވަނީ ބުނެފައެވެ.
ތުރުކީވިލާތުގެ ބޯލޫގެ ކާރްތާލްކަޔާ ސްކީ ރިސޯޓުގެ ހޮޓެލެއްގައި އަލިފާން ރޯވެ އަނދަނީ --- ފޮޓޯ/ އަލްޖަޒީރާ
ރައީސް ފޮނުއްވި މެސެޖު ނިންމަވާލައްވާފައިވަނީ މި ހާދިސާގެ ސަބަބުން ދިމާވި ގެއްލުންތަކުން އަރައިގަތުމަށް ކުރެވެމުންދާ މަސައްކަތްތަކުން ކާމިޔާބު ލިބުމަށް އެދިވަޑައިގެން، އެކަމުން އަރައިގަތުމުގެ ހިއްވަރާއި ސާބިތުކަމަށް އެދިވަޑައިގަންނަވަމުން ކަމަށްވެސް ރައީސް އޮފީހުން ވަނީ ބުނެފައެވެ.
އަލްޖަޒީރާ ނޫހުގައި ތުރުކީގެ ޖަސްޓިސް މިނިސްޓަރާ ހަވާލާދީ ރިޕޯޓުކޮށްފައިވާ ގޮތުން އެ ހާދިސާއާ ގުޅިގެން ހަތަރު މީހަކު ވަނީ ހައްޔަރުކޮށްފައެވެ. އޭގެ ތެރޭގައި ހޮޓެލްގެ ވެރިފަރާތް ވެސް ހިމެނޭ ކަމަށް މިނިސްޓަރު ވިދާޅުވެފައިވެއެވެ.
ތުރުކީން ދަނީ އެ ހާދިސާ ހިނގި ގޮތް ތަހުގީގު ކުރަމުންނެވެ.