އެމެރިކާގެ 47 ވަނަ ރައީސްކަމުގެ ހުވާ ޑޮނަލްޑް ޓްރަމްޕް ކުރައްވައިފިއެވެ.
ހުވާކުރެއްވުމުގެ ރަސްމިއްޔާތު ބާއްވާފައި ވަނީ އެމެރިކާގެ ކެޕިޓޮލް ރޮޓަންޑާގައެވެ. އެ ރަސްމިއްޔާތުގައި އެމެރިކާގެ ކުރީގެ ރައީސުންނާއި، ކެބިނެޓް މިނިސްޓަރުންގެ އިތުރުން އެހެން ބައެއް އިއްޒަތްތެރިންވެސް ބައިވެރިވެވަޑައިގަތެވެ.
ޓްރަމްޕްގެ އިތުރުން ނައިބު ރައީސް ޖޭޑީ ވާންސް ވެސް ވަނީ މަގާމުގެ ހުވާކުރައްވާފައެވެ.
އެމެރިކާގެ ރައީސް ހުވާ ކުރެއްވުމުގެ ރަސްމިއްޔާތު އާންމު ގޮތެއްގައި ބާއްވަނީ ކެޕިޓޮލްގެ ބޭރުގައި ނަމަވެސް، މިއީ 40 އަހަރަށް ފަހު ކެޕިޓޮލް އެތެރޭގައި ބޭއްވި ފުރަތަމަ ފަހަރެވެ. އެ ބަދަލު ގެނެސްފައި ވަނީ މިއަދު ވޮޝިންޓަންގައި އާދަޔާ ޚިލާފަށް ފިނި ވާނެ ކަމަށް މޫސުމާ ބެހޭ އިދާރާތަކުން ލަފާކޮށްފައިވުމުންނެވެ.
މީގެ ކުރިން ޓްރަމްޕް ވަނީ 2017އިން 2021އަށް ރައީސްކަން ކުރައްވައިފައެވެ. އެއަށްފަހު ދެވަނަ ދައުރަކަށް ވާދަކުރެއްވި ނަމަވެސް އިންތިޚާބު ކާމިޔާބު ކުރެއްވީ ކުރީގެ ރައީސް ޖޯ ބައިޑެން އެވެ.
ޓްރަމްޕް އެންމެ ފުރަތަމަ ނަތީޖާ ގަބޫލުކުރައްވަން ދެކޮޅު ހެއްދެވިއެވެ. އަދި ޓްރަމްޕްގެ ސަޕޯޓަރުން ގާނޫނު ހަދާ މަޖިލީހަށް ވަދެގަތް މައްސަލައެއްގައި ދައުވާތައް ވެސް ކޮށްފައިވެއެވެ.
ޓްރަމްޕްގެ މައްސަލަތަކެއް ކޯޓުގައި އޮއްވައި މިދިޔަ ނޮވެމްބަރު މަހުގެ ފަހެއްގައި ބޭއްވި އިންތިޚާބު ކާމިޔާބު ކުރެއްވިއެވެ. މިއީ، 1890ގެ އަހަރުތަކުގެ ފަހުން، އެމެރިކާގެ އިންތިޚާބެއްގައި ނާކާމިޔާބުވި ރައީސަކު ދެވަނަ ފަހަރަށް އިންތިޚާބުވި ފުރަތަމަ ފަހަރެވެ.