އިއްޔެ މާލޭގެ ބޮޑު ސަރަހައްދަކަށް ނުރައްކާވާ މިންވަރަށް ވައި ނުސާފުވެފައިވާ ކަމަށް ވިލިމާލޭގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކައިފާވާއިރު، އިއްޔެއަށްވުރެ މިއަދު މާލޭ ސަރަހައްދުގެ ވައި ސާފުކަމަށް މޫސުމާ ބެހޭ ގައުމީ އިދާރާ، މެޓު އޮފީހުން މިއަދު ބުނެފިއެވެ.
މެޓުން ބުނީ ވައި ނުސާފުވާން ދިމާވަނީ ވައި ޖެހޭ މިސްރާބުގެ ސަބަބުން ކަމަށެވެ. އަދި ކުރިޔަށް އޮތް 24 ގަޑިއިރު ގަދަޔަށް ވައި ޖެހޭނަމަ ވައި ނުސާފުވާނެކަމަށް ލަފާކުރެވޭކަމަށް މެޓުން ވަނީ ބުނެފައެވެ.
މެޓުން ބުނީ އާންމުކޮށް ވައި ނުސާފު ވަނީ، އިރުވައި މޫސުން ފެށިގެން އަންނަ ދުވަސްވަރު ކަމަށެވެ.
ދުވަހުން ދުވަހަށް ވައިގެ ބާރުމިނަށް ބަލައި ވައިގެ ތަޣައްޔަރުކަމަށް ބަދަލުތައް އަންނާނެކަން މެޓުން ވަނީ ފާހަގަކޮށްފައެވެ. އެހެންކަމުން ވައި އެއްކޮށް ސާފުވާނެ ދުވަހެއް ލަފާކުރަން ދަތިކަމަށް އެ އިދާރާއިން ބުންޏެވެ.
ވިލިމާލޭގައި ހުންނަ ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގެ ކެމްޕަސް އިމާރާތުގައި ހުރި އެއާ ކޮލިޓީ މޮނީޓަރިން ސިސްޓަމުން އިއްޔެ ދެއްކި ގޮތުން، މާލޭ ސަރަހައްދުގެ އިއްޔެ ވައިގެ ކޮލިޓީ ހުރީ ސިއްހަތަށް ގެއްލުންވާ މިންވަރަކަށެވެ. އެއީ 156 ގައެވެ.
ވައިގެ ކޮލިޓީ ބަލާ އެޕް، އައި ކިއު އެއާއިން ދައްކާ ގޮތުގައި މިއަދު މާލޭ ސަރަހައްދަށް ވައިގެ ކޮލިޓީ ހުރީ 50ގައެވެ.
މާލެއަށް ވައި ނުސާފުވުމުގެ ސަބަބުން ރައްކާތެރިކަމުގެ ފިޔަވަޅު އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވަނީ އިލްތިމާސްކޮށްފައެވެ.
އެގޮތުން އެޗްޕީއޭއިން ބުނީ ބޭރަށް ނުކުންނަ ނަމަ މާސްކު އެޅުމަށާއި ގޭތެރެއަށް ނުސާފު ވައި ވަނުމުގެ ފުރުސަތު މަދުކުރުމަށެވެ.
އަދި ނުސާފު ވައިން ރައްކާތެރިވުމަށް އެއާ ޕިއުރިފަޔާ ބޭނުން ކުރުމަށް ވެސް އެޗްޕީއޭއިން މީގެ ކުރިން ވަނީ އިލްތިމާސް ކޮށްފައެވެ.
ރާއްޖޭގެ ވައި ނުސާފުވަނީ އުތުރު އިންޑިއާގެ ސަރަހައްދުން އަންނަ ނުސާފު ވައިގެ ސަބަބުންނެވެ. ވައި ނުސާފުވުމުގެ ސަބަބުން ދަތުރުފަތުރުކުރާ މީހުންނަށް ވެސް އުނދަގޫތަކާ ކުރިމަތިވެއެވެ.