ދުބާއީގެ މަރައްސީ މަރީނާގައި އެއް ބިލިއަން ޑޮލަރުގެ ބޮޑު ޕްރޮޖެކްޓަކާއެކު 591 ފޫޓުގެ ގުޅުވާލައި ދެ އިމާރަތް އަޅަން ތައްޔާރުވެއްޖެއެވެ.
ދުބާއީގައި އެޅުމަށް ތައްޔާރުވާ އިމާރާތް ހާއްސަވަނީ އެ ދެ އިމާރާތް ގުޅުވާ ގޮތުންނެވެ. އެގޮތުން މި ޕްރޮޖެކްޓުގައި އިމާރާތް ގުޅުވާލުމަށް ހަމަޖެހިފައިވަނީ "ސްކައި ޕޫލް" އަކުންނެވެ. އެގޮތުން އިމާރާތް ޑިޒައިން ކޮށްފައިވާ ގޮތުގައި ދެ އިމާރާތް ގުޅުވާލާނީ 43 ފޫޓުގެ އިންފިނިޓީ ޕޫލަކުންނެވެ.
ރެޒިޑެންޝަލް އިމާރާތްތަކެއްގެ ގޮތުގައި ފަރުމާ ކުރާ މި އިމާރާތްތަކުގައި ދިރިއުޅޭ މީހުންނަށް މި ޕޫލް ބޭނުން ކުރެވޭނެ ކަމަށް ބުނެއެވެ.
ފޮސްޓާ އެންޑް ޕާޓްނާސް އިން ޑިޒައިންކޮށްފައިވާ މި އިމާރާތްތަތަކީ އެއް ބިލިއަން ޑޮލަރު ހަރަދުވާނެ ޕްރޮޖެކްޓެކެވެ. އެގޮތުން މި އިމާރާތްތަކުގެ މަސައްކަތް ނިމި 2027ވަނަ އަހަރުގެ ތެރޭގައި އާންމުންނަށް ހުޅުވާލެވޭނެ ކަމަށް ކުންފުނިން ބުނެއެވެ.
އެ ކުންފުނިން ބުނާ ގޮތުގައި މިހާރު މަސައްކަތް ފަށާފައިވާ މި އިމާރާތްތައް ގުޅުވާލެވޭ ޕޫލްގެ އިތުރުން ކޮންމެ އެޕާޓްމެންޓެއްގައި ވެސް ޕޫލެއް ހުންނާނެއެވެ.
ލަގްޒަރީ އެޕާޓްމެންޓްތައް ހިމެނޭ މި އިމާރާތްތަކުގައި ޖުމްލަ 63 އެޕާޓްމެންޓް ހުންނާނެއެވެ. އެއިން ކޮންމެ އެޕާޓްމެންޓަކީ 6،500 އަކަފޫޓުގެ އެޕާޓްމެންޓުތަކެވެ. އަދި މިއިން ކޮންމެ އިމާރާތެއްގައި 35،000 އަކަފޫޓުގެ ޕެންޓްހައުސް އެއް ހުންނާނެ ކަމަށް ވެސް މައުލޫމާތު ދެއެވެ.
މި އިމާރާތް ހުންނާނީ ދުބާއީގެ އެންމެ ބޮޑެތި އިމާރާތްތައް ރީތިކޮށް ބަލާލެވޭ ހިސާބުގައި ކަމަށް ފޮސްޓާ އެންޑް ޕާޓްނާސް އިން ބުނެއެވެ.
ފޮސްޓާ އެންޑް ޕާޓްނާސްއިން މި އިމާރާތް ފަރުމާ ކުރި ނަމަވެސް މި އިމާރާތް ހިންގާނީ ރިއަލްއެސްޓޭޓް ކުންފުނި ސަންކާރީ އިންނެވެ. ސަންކާރީން މައުލޫމާތު ދޭ ގޮތުގައި މި އިމާރާތުގެ އެޕާޓްމެންޓުތައް ވިއްކަން ފަށާނެ އަގަކީ 10 މިލިއަން ޑޮލަރެވެ.