ރާއްޖޭގެ ހައިކޯޓުގައި 11 އަހަރަށްވުރެ ގިނަ ދުވަހު ޚިދުމަތްކުރެއްވި އެ ކޯޓުގެ ކުރީގެ ފަނޑިޔާރު ޝުޢައިބު ޒަކަރިއްޔާ މިއަދު އަވަހާރަވެއްޖެއެވެ.
އެނގިފައިވާ ގޮތުގައި ޝުޢައިބް އަވަހާރަވީ އަލާސްކަންފުޅާ އުޅުއްވުމަށްފަހުގައެވެ. އަވަހާރަވީއިރު އުމުރުފުޅުން 55 އަހަރެވެ.
ޝުޢައިބްގެ ޖަނާޒާ ބާއްވަން ހަމަޖެހިފައިވަނީ އާސަހަރާގައެވެ. ކަށުނަމާދުކުރުން އޮތީ މިރޭ 23:00ގައެވެ.
ޝުޢައަބަކީ ހައިކޯޓުގެ ފަނޑިޔާރުކަމުގެ އިތުރުން، ރާއްޖޭގެ ޝަރުޢީ ދާއިރާގެ ގިނަ މަގާމުތަކެއް ވެސް އަދައިކުރެއްވި ބޭފުޅެކެވެ.
އެގޮތުން ޝަރުޢީ ދާއިރާގައި ޝުޢައިބު ފުރުއްވި މަގާމުތަކުގެ ތެރޭގައި ހިމެނެނީ:
- ޖަސްޓިސް މިނިސްޓްރީގެ ލީގަލް އޮފިސަރުކަން
- ޚާއްސަ ގާޟީކަން
- ފެމިލީ ކޯޓުގެ ޤާޟީކަން
- މަދަނީ ކޯޓާއި ކުޑަކުދިންނާ ބެހޭ ކޯޓުގެ އިސް ގާޟީކަން
ހައިކޯޓުގެ ފަނޑިޔާރުކަމުން ޝުޢައިބު ރިޓަޔާކޮށްފައިވަނީ 2022ވަަނަ އަހަރުގެ ނޮވެމްބަރު 22ވަނަ ދުވަހެވެ.
ޝުއައިބް ވަނީ ޤާނޫނާއި ޝަރީޢަތުގެ ދާއިރާއިން ފުރަތަމަ ޑިގްރީ ހާސިލްކުރައްވާފައެވެ. އޭގެފަހުން މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީން މާސްޓާސް އޮފް ކޮމްޕަރޭޓިވް ލޯ ހައްދަވައިފައިވެއެވެ.