ލޮސްއެންޖެލިސް (19 ޖަނަވަރީ 2025): އެމެރިކާގެ ކެލިފޯނިޔާގެ ލޮސްއެންޖެލިސް ސަރަހައްދުގެ ޖަންގަލިތަކުގައި ރޯވެ އަނދަމުންދާ އަލިފާންގަނޑުތައް ނުނިވި އިތުރަށް ފެތުރެމުންދާތީ އޭގެ ސީދާ އަސަރު ލޮސްއެންޖެލިސް ސިޓީއަށް ވެސް ކޮށްފާނެކަމުގެ ބިރު ހީވެއްޖެއެވެ.
މި ބިރު ހީވީ ގަދަވަޔާއެކު އަލިފާންގަނޑުތައް އިތުރު ސަރަހައްދުތަކަށް ފެތުރެމުންދާތީ އާއި ބައެއް އަލިފާންގަނޑުތައް ލޮސްއެންޖެލިސް ސިޓީއާ ކައިރިއަށް ފެތުރެމުންދާއިރު އަލިފާންގަނޑުތައް ކޮންޓްރޯލް ނުކުރެވޭތީއެވެ.
ރިޕޯޓުތައް ބުނާގޮތުން ލޮސްއެންޖެލިސް ސިޓީގެ ބައެއް ސަރަހައްދުތަކުން ހަތަރު ލައްކައެއްހާ މީހުން ހުސްކޮށް އެމީހުން ރައްކާތެރި ތަންތަނަށް ގެންދިޔުމަށް މިހާރު ވަނީ ރާވާފައެވެ. ނަމަވެސް އަދި މީހުންނަށް އެކަން އަންގާފައެއް ނުވެއެވެ. އެއީ ވައި މަޑުވެފައިވާތީއެވެ. ނަމަވެސް މިހާރު ވަނީ އަލުން ވައި ގަދަވާންފަށާފާނެކަމުގެ އެލާޓް ނެރެފައެވެ.
ކެލިފޯނިޔާގެ ލޯކަލް މަސްއޫލުވެރިން ވިދާޅުވާގޮތުގައި އެއްލައްކަ އަކަ ކިލޯމީޓަރުގެ ސަރަހައްދަކަށް އަލިފާންގަނޑުތައް މިހާރު ވަނީ ފެތުރިފައެވެ. ލިބުނު ޑައިރެކްޓް ގެއްލުންވެސް މިހާރުވަނީ 280 ބިލިޔަން ޑޮލަރަށް އަރާފައެވެ.
ކެލިފޯނިއާގެ ލޮސްއެންޖެލިސް ސަރަހައްދުގެ ޖަންގަލިތަކުގައި އަލިފާން ރޯވެ އަނދަން ފެށީ މިމަހުގެ ހަތްވަނަ ދުވަހުއެވެ. އެއަށްފަހު އަލިފާން ނިއްވުމުގެ މަސައްކަތް ގެންދަނީ ކުރިއަށެވެ. ނަމަވެސް އެކަށީގެންވާ ގޮތެއްގައި އެކަން ކުރެވެމުން ނުދާތީ އަލިފާންގަނޑު ކޮންޓްރޯލެއް ނުކުރެވެއެވެ.
އަލިފާން ރޯވި ފަހުން މިހާތަނަށް 27އަށް ވުރެ ގިނަ މީހުން މަރުވެފައިވާއިރު އެތަށްބަޔަކު ވަނީ ގެއްލިފައެވެ. އަދި ލައްކައަކާ ގާތްކުރާ ވަރަށް މީހުން ވަނީ ރައްކާތެރި ތަންތަނަށެ ގެންގޮސްފައެވެ. މި ހާދިސާގައި 22 ހާހަށްވުރެ ގިނަ އިމާރާތް ވަނީ އަނދައި ހުލިވެފައެވެ. މީގެތެރޭގައި ގިނައީ އާންމުންގެ ގެދޮރެވެ.
އަލިފާންގަނޑުތައް ނުނިވި އިތުރަށް ފެތުރެމުންދާއިރު އޭގެ ސީދާ އަސަރު ލޮސްއެންޖެލިސް ސިޓީއަށް ކޮށްފާނެކަމުގެ ބިރު ހީވުމަކީ ވަރަށް ބޮޑު މައްސަލައެކެވެ. އެއީ ލޮސްއެންޖެލިސް ސިޓީ އަކީ 12 މިލިޔަން މީހުންގެ އާބާދީ އެއް ދިރިއުޅޭ ވަރަށް ބޮޑު ސިޓީއަކަށްވާތީއެވެ.
މި ސިޓީން އެއްކޮށް މީހުން ހުސްކުރަން ޖެހިއްޖެނަމަ އެއީ ބޮޑު ކާރިސާއަކަށް ވާނެއެވެ. ނަމަވެސް މިހެން ހަދަންޖެހިދާނެކަމުގެ ބިރު ވެސް މިހާރު އެބައޮތެވެ.