ނުކުޅެދުންތެރިކަން ހުރި ދަރިވަރަކަށް އަނިޔާކުރިކަމުގެ ތުހުމަތުވާ ޓީޗަރުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ދޫކޮށްލައިފިއެވެ.
މި މައްސަލަ ފެންމަތިވީ މިދިޔަ ބުރާސްފަތި ދުވަހުއެވެ.
މިކަމާ ގުޅިގެން ފުލުހުން ބުނީ، މިދިޔަ ހުކުރު ދުވަހު ތުހުމަތުކުރެވޭ ޓީޗަރު ކޯޓު އަމުރެއްގެ ދަށުން ފުލުުންގެ ބެލުމުގެ ދަށަށް ގެންގޮސްފައި ވާކަމަށެވެ. އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ޝަރުތުކޮށް ދޫކޮށްލާފައި ވާކަމަށް ފުލުހުން ބުނެފައި ވެއެވެ.
ކަމާ ގުޅުންހުރި އިދާރާތަކާ ގުޅިގެން މި މައްސަލަ ފުލުުން ގެންދަނީ ތަހުގީގު ކުރަމުންނެވެ.
މި މައްސަލައާ ގުޅިގެން މިދިޔަ ބުރާސްފަތި ދުވަހު މިނިސްޓްރީން ބުނީ، މާލެ ސަރަހައްދުގެ ސްކޫލެއްގެ ޕްރައިމަރީ ގްރޭޑްގައި ތައުލީމު ހާސިލްކުރާ ހާއްސަ އެހީއަށް ބޭނުންވާ ކުއްޖަކަށް ޖިސްމާނީ އަނިޔާ ކުރިކަމަށް ސްކޫލްގެ ފަރާތުން އެ މިނިސްޓްރީގެ ސަމާލު ކަމަށް ގެނެސްފައި ވާކަމަށެވެ. އެއާއެކު އެ މައްސަލަ ފުލުހަށް ހުށަހަޅާފައި ވާކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
ނުކުޅެދުންތެރިކަން ހުރި، ދަރިވަރަކަށް ދިމާވި ހާދިސާއާ ގުޅިގެން ކަންބޮޑުވުން ފާޅުކުރައްވާ އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ކުރިން ވިދާޅުވީ ދަރިވަރުންނަށް މިފަދަ އަނިޔާ ދިނުމަކީ ބަލައިގަންނާނެ ކަމެއް ނޫންކަމަށެވެ. އަދި މިފަދަ މައްސަލަތައް މިނިސްޓްރީގެ ފަރާތުން ޒިންމާދާރުކަމާއެކު ކަމާބެހޭ ފަރާތްތަކަށް ހުށަހަޅައި ތަކުރާރު ނުވާނޭހެން ފިޔަވަޅު އަޅަމުންގެންދާނެ ކަމަށް މިނިސްޓަރު ވަނީ ވިދާޅުވެފައެވެ.
ޒިންމާދާރުކަމާއެކު ދަރިވަރުންގެ ހައްގުތައް ހިމާޔަތްކޮށް އުފާވެރި އަމާން މާހައުލެއްގައި ދަރިވަރުން ތައުލީމު ހާސިލްކުރުމަށް ޓީޗަރުން ހާއްސަ ސަމާލުކަމެއް ދެއްވުމަށް މިނިސްޓަރު ވަނީ އެދިވަޑައިގެންފައެވެ.
ކުޑަކުދިންގެ ހައްގުތައް ރައްކާތެރިކުރުމާ ބެހޭ ގާނޫނު ދަށުން ކުއްޖާގެ ވަނަވަރު ހާމަވެދާނެތީ، އެ ކުއްޖާ ތައުލީމު ހާސިލްކުރާ ސްކޫލު އަދި ޓީޗަރުގެ މައުލޫމާތު ހާމަކުރެވެން ނެތްކަމަށް މިނިސްޓްރީން އޭރު ބުންޏެވެ.
ޓީޗަރަކު ދަރިވަރުންތަކަކަށް ގްރޫމްކުރި މައްސަލައެއް މީގެ ކުރިން ވަނީ ފެންމަތިވެފައެވެ.