ރަހީނުކޮށްފައިވާ އިސްރާއީލު މީހުންގެ ލިސްޓު ނުފޮނުވާތީ ކަމަށް ބުނެ އިސްރާއީލުން އަނެއްކާ ވެސް ޣައްޒާއަށް ހަމަލާތައް ދޭން ފަށައިފިއެވެ.
ހަމަލާތައް މިއަދު ހުއްޓާލަން އެއްބަސްވި ނަމަވެސް ފަލަސްތީނުގެ މިނިވަން ކަމަށް މަސައްކަތްކުރާ ހަމާސް ޖަމާއަތުން މިނިވަން ކުރުމަށް އެއްބަސްވެފައިވާ އިސްރާއީލުގެ އަސީރުންގެ ލިސްޓް އާންމު ނުކުރަނީސް ހަމަލާތައް ނުހުއްޓާނެ އެ ގައުމުގެ ބޮޑު ވަޒީރު ބެންޖަމިން ނަތަންޔާހޫ ވަނީ ވިދާޅުވެފައެވެ.
އިސްރާއީލުން ވަނީ ޣައްޒާގެ ދެކުނުގައި އޮންނަ ޚާން ޔޫނިސްއަށާއި މެދުތެރޭގައި ހުންނަ ނުސައިރަތު ކޭމްޕަށް ވައިގެ ހަމަލާއެއް ދީފައެވެ.
"އިސްރާއީލު ސިފައިންގެ ދިފާއަށް ތައްޔާރުވަމުންދާނަން. އިސްރާއީލުގެ ރައްޔިތުންގެ ސަލާމަތަށް ގެއްލުމެއް ދިނުމަށް ފުރުސަތު ނުދޭނެ،" އިސްރާއީލުގެ އަސްކަރިއްޔާއިން ނެރުނު ބަޔާނެއްގައި ބުނެފައިވެއެވެ.
އިސްރާއީލާއި ހަމާސްއާ ދެމެދު ހަނގުރާމަ ހުއްޓާލުމުގެ އެއްބަސްވުން ތަންފީޒުކުރުން ލަސްވީ، އެއްބަސްވުމުގެ ދަށުން ފުރަތަމަ ދުވަހު ރަހީނުކުރާ މީހުންގެ ލިސްޓް އިސްރާއީލަށް ފޮނުވުމުގެ ވާޖިބު ހަމާސްއިން އަދާނުކުރާތީ ކަމަށް އިސްރާއީލުގެ އަސްކަރީ ތަރުޖަމާނު ޑޭނިއަލް ހަގާރީ ވަނީ ވިދާޅުވެފައެވެ.
މިއަދު ޓީވީ މެދުވެރިކުރައްވައި ދެއްވި ތަގުރީރެއްގައި ހަގާރީ ވިދާޅުވީ، ސަރުކާރުން އަސްކަރިއްޔާއަށް އަންގާފައިވަނީ އެއްބަސްވުން ތަންފީޒުކުރުން ލަސްކުރުމަށާއި އެކަން ނުކުރެވޭހާ ހިނދަކު ޣައްޒާގައި ހަމަލާތައް ކުރިއަށް ގެންދިއުމަށް ކަމަށެވެ.
ހަނގުރާމަ ހުއްޓާލުން ތަންފީޒުކުރަން އަސްކަރިއްޔާ މުޅިން ތައްޔާރަށް އޮތް ނަމަވެސް ހަމާސްއިން އެއްބަސްވުމުގެ ޝަރުތުތަކަށް އިޖާބަ ނުދީފިނަމަ، ހަމަލާތައް ދޭން ވެސް ތައްޔާރަށް އޮތް ކަމަށް ހަގާރީ ވަނީ ވިދާޅުވެފައެވެ.
އިސްރާއީލުން ޣައްޒާއަށް ހަމަލާތައް ދޭތާ 15 މަސް ދުވަސްވެފައިވާއިރު، މިހާތަނަށް 46،800 އަށް ވުރެ ގިނަ މީހުން ވަނީ ޝަހީދުކޮށްލާފައެވެ.