ފިނި މޫސުމުގެ ސަބަބުން އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕާއި އިންތިޚާބީ ނައިބު ރައީސް ޖޭޑީ ވެންސް މަގާމުގެ ހުވާކުރެއްވުމުގެ ރަސްމިއްޔާތު އޮންނާނީ ކެޕިޓޮލް އިމާރާތުގެ އެތެރޭގައި ކަމަށް ޓްރަމްޕް ހުކުރު ދުވަހު ސޯޝަލް މީޑިއާގައި އިއުލާން ކުރައްވައިފިއެވެ.
އެމެރިކާގެ ރައީސުން ހުވާކުރެއްވުމުގެ ރަސްމިއްޔާތު ކެޕިޓޮލްގެ އެތެރޭގައި ނުބާއްވާތާ 40 އަހަރު ވެއްޖެއެވެ.
"އެމެރިކާގެ ފިނިހޫނުމިން ވަރަށް ބޮޑަށް ދަށް،" ޓްރަމްޕް ޓްރޫތް ސޯޝަލްގައި ލިޔުއްވާފައިވެއެވެ.
"އަޅުގަނޑު ބޭނުމެއް ނޫން އެއްވެސް ގޮތަކަށް މީހުންނަށް އަނިޔާއެއް ލިބޭތަން ދެކެން އެހެންވެ، ހުވާކުރުމުގެ ރަސްމިއްޔާތާއި، އެހެނިހެން ތަގުރީރުތައް ދިނުން ވެސް އެމެރިކާގެ ކެޕިޓަލް ރޮޓަންޑާގައި ކުރިއަށް ގެންދިއުމަށް އަޅުގަނޑު އަންގައިފިން. ފިނި މޫސުމުގެ ސަބަބުން އެމެރިކާގެ ކުރީގެ ރައީސް ރޮނާލްޑް ރީގަން ވެސް 1985 ވަނަ އަހަރު ކަންތައްކުރެއްވީ އެގޮތަށް،"
އެމެރިކާގެ އިންތިޚާބީ ރައީސް ހުވާކުރެއްވުމުގެ ރަސްމިއްޔާތު ބޭއްވުމަށް ހަމަޖެހިފައިވާ ކެޕިޓަލް ރޮޓަންޑާ.ފޮޓޯ/ގެޓީ
ޓްރަމްޕް ހުވާކުރެއްވުމަށް ހަމަޖެހިފައިވަނީ މަދަމައެވެ. މާދަމާ އެމެރިކާގެ ފިނިހޫނުމިން އިތުރަށް ދަށަށް ދާނެ ކަމަށާއި ވައިގަދަވާނެ ކަމަށް ލަފާކުރެވޭ ކަމަށް މޫސުމާބެހޭ އިދާރާތާކުން ހާމަކުރެއެވެ. ސްނޯ ވެހޭނެ ކަމަށް ވެސް ވަނީ ލަފާކޮށްފައެވެ.
ރޮޓަންޑާ ހުންނަނީ ކެޕިޓޮލް ޑޯމްގެ ދަށުގައެވެ. އެތަން އާންމުކޮށް ބޭނުންކުރަނީ ކޮންގްރެސްގެ ރަސްމިއްޔާތުތަކާއި އުފާފާޅުކުރުމަށެވެ.
ޓްރަމްޕް ވިދާޅުވީ, ޑައުންޓައުން ޑީސީގައި ހުންނަ ކެޕިޓޮލް ވަން އެރީނާގައި ސަޕޯޓަރުންނަށް ރަސްމިއްޔާތު ލައިވްކޮށް ބަލާލުމަށް ހުޅުވާލާނެ ކަމަށާއި، ހުވާކުރެއްވުމަށް ފަހު އެއްވެ ތިބި މީހުންގެ ގާތަށް ވަޑައިގަންނަވާނެ ކަމަށެވެ. އެ އެރީނާގައި ރިޔާސީ ޕެރޭޑް ވެސް ބާއްވާނެ ކަމަށް ޓްރަމްޕް ވަނީ ވިދާޅުވެފައެވެ.
ރޮޓަންޑާއަކީ ގާތްގަޑަކަށް 20،000 މީހުންގެ ޖާގައޮތް ތަނެކެވެ.
އެ ހަފުލާ އިންތިޒާމްކުރާ ޖޮއިންޓް ކޮންގްރެސް ކޮމިޓީން ނެރުނު ބަޔާނެއްގައި ބުނެފައިވަނީ ޓިކެޓް ލިބޭ މެހެމާނުންގެ ބޮޑު ބަޔަކަށް ރަސްމިއްޔާތަށް ހާޒިރު ނުވެވޭނެ ކަމަށެވެ.
އެމެރިކާގެ ކުރީގެ ރައީސް ރޮނާލްޑް ރީގަން ހުވާ ކުރައްވުމަށް 1985 ވަނަ އަހަރުގެ ޖެނުއަރީ މަހުގެ 21 ވަނަ ދުވަހު ކެޕިޓަލް ރޮޓަންޑާގައި ބޭއްވި ރަސްމިއްޔާތު. ފޮޓޯ/އޭޕީ
ނަވާރަ ސަތޭކަ އަށްޑިހަ ފަސްވަނަ އަހަރު ކެޕިޓަލް ރޮޓަންޑާގައި ރީގަން ހުވާ ކުރެއްވިއިރު، ބޭރުގެ ފިނިހޫނުމިން ހުރީ ހަތް ޑިގްރީގައި ކަމަށާއި މޫސުމާބެހޭ ގައުމީ އިދާރާއިން ހާމަކޮށްފައިވެއެވެ.