މީގެ ފަސް އަހަރު ކުރިން ނެޓްފްލިކްސްގައި ރިލީޒްކުރި ފިލްމު "ރާތު އަކޭލީ ހޭ"ގެ ސީކުއަލްއެއް އުފައްދާނެކަން އިއުލާނުކޮށްފިއެވެ.
ނަވާއްޒުއްދީން ސިއްދީގީ ލީޑް ރޯލް ކުޅެފައިވާ މި ފިލްމުގެ ސީކުއަލްގެ ބަތަލާ އަކީ ބޮލީވުޑްގެ އިތުރުން ސައުތު ސިނަމާގެ ބައެއް ފިލްމުތަކުގައި މަސައްކަތް ކޮށްފައިވާ ޗިތުރަންގްދާ ސިންގްއެވެ. ނަވާޒުއްދީން އިސް ފުލުސް އޮފިސަރެއްގެ ރޯލް ކުޅޭ މި ފިލްމަކީ ގޮތް ނޭނގޭ މަރުގެ ތަހުގީގުތަކެއްގެ މައްޗަށް ބިނާކޮށް އުފައްދާ މާޑަ މިސްޓްރީއެކެވެ.
މި އަހަރު ނެޓްފްލިކްސްއިން ގެނެސްދޭން ނިންމާފައިވާ ފިލްމުތަކުގެތެރެއިން މި ސީކުއަލް އަކީ އެންމެ ގިނަ ބަޔަކު އިންތިޒާރުކުރާ އެއް ފިލްމެވެ. ޗިތުރާއާ ނަވާޒުއްދީންގެ ސްކްރީން ކެމިސްޓްރީއަށް ގިނަބަޔަކު އިންތިޒާރު ކުރަމުން އަންނައިރު މިއީ ދެ ތަރިން އެކީގައި މަސައްކަތް ކުރާ ފުރަތަމަ ފިލްމެވެ.
މީގެ ފަސް އަހަރު ކުރިން ރިލީޒްވި ފިލްމު "ރާތު އަކޭލީ ހޭ"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
މި އަހަރުގެ ޖޫން މަހުގެ ހަވަނަ ދުވަހު ރިލީޒްކުރަން ތައްޔާރުވަމުން އަންނަ ފިލްމު "ހައުސްފުލް 5"ގެ ކާސްޓުގައި ވެސް ހިމެނޭ ޗިތުރާ އެންމެ ފަހުން ކުޅެފައި ވަނީ އަކްޝޭ ކުމާރު މުހިއްމު ރޯލްއިން ފެނުނު ކޮމެޑީ ފިލްމު "ކޭލް ކޭލް މޭ"އިންނެވެ.
އާރްއެސްވީޕީ މޫވީސްއިން ގެނެސްދީފައިވާ "ރާތު އަކޭލީ ހޭ"އަކީ މަޝްހޫރު ޕްރޮޑިއުސަރު ރޮނީ ސްކްރޫވާލާ ޕްރޮޑިއުސްކޮށް ހަނީ ތުރެހަން ޑައިރެކްޓް ކުރި ފިލްމެކެވެ.
ދެހާސް ވިހިވަނަ އަހަރު ރިލީޒްކުރި ފިލްމުގެ ބަތަލާގެ ރޯލު ކުޅެފައި ވަނީ ރާދިކް އަޕްތޭއެވެ. ރާދިކާގެ އިތުރުން އެމޭޒަން ޕްރައިމްގެ މަޝްހޫރު ވެބް ސީރީސް "މިރުޒާޕޫރް"އިން ގިނަ ބައެއްގެ ސަމާލުކަން ހޯދި ޝްވެތާ ތުރިޕާޓީ ވެސް މި ފިލްމުގެ މުހިއްމު ރޯލްއިން ވަނީ ފެނިފައެވެ.
މި ފިލްމުގެ ސީކުއަލް މި އަހަރު ރިލީޒްކުރާނެކަން އިއުލާނުކުރި ނަމަވެސް ފިލްމު ރިލީޒްކުރާ ވަކި ތާރީޚެއް އަދި އިއުނާލެއް ނުކުރެއެވެ.