އެޕަލްއިން ތަޢާރަފުކުރި އައިއޯއެސް 18ގެ އެޕަލް އިންޓެލިޖެންސް (އޭއައި) ނޯޓިފިކޭޝަން ސަމަރީ ފީޗާގައި ނޫސްތަކުގެ ހެޑްލައިންތައް ގޯސްކޮށް ސަމަރައިޒްކުރަމުންދާތީ، މި ފީޗާ ވަގުތީގޮތުން ހުއްޓާލައިފިއެވެ.
ވޮޝިންގްޓަން ޕޯސްޓްގެ ނޯޓިފިކޭޝަންއެއް ގޯސްކޮށް ސަމަރައިޒްކުރުމާ ގުޅިގެން، ޔޫޒަރުންނާއި ނޫސްވެރިންގެ ފާޑުކިޔުންތަކާ ކުރިމަތިލާންޖެހުނެވެ. މީގެ ކުރިން ބީބީސީން ވެސް އައިއޯއެސް 18 އިން އެ ނޫހުގެ ޚަބަރެއް ގޯސްކޮށް ސަމަރައިޒްކުރި ކަމަށް ބުނެފައިވެއެވެ.
މިދިޔަ ޑިސެމްބަރުގައި، ޔުނައިޓެޑް ހެލްތްކެއާގެ ސީއީއޯ މަރާލި މައްސަލައިގައި ކުށްވެރިވި ލުއިޖީ މަންޖިއޯނީ އަމިއްލައަށް މަރުވެފައިވާ ކަމަށް އެޕަލް އިންޓެލިޖެންސްއިން ދޮގު މަޢުލޫމާތު ދިން ކަމަށް ބީބީސީން ބުނެފައިވެއެވެ.
މީގެ އިތުރުން، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކޮށްފައިވާ ކަމަށް ނިއުޔޯކް ޓައިމްސްގެ ޚަބަރެއް ސަމަރައިޒްކޮށްފައިވާކަން ބްލޫސްކައި ޔޫޒަރަކު ހިއްސާކުރި ސްކްރީންޝޮޓަކުން ދައްކައެވެ. ނަމަވެސް، އަސްލު ޚަބަރުގައި ބުނެފައިވަނީ އިންޓަނޭޝަނަލް ކްރިމިނަލް ކޯޓުން އޭނާ ހައްޔަރުކުރުމުގެ އަމުރެއް ނެރެފައިވާ ވާހަކައެވެ.
އައިއޯއެސް 18.3 އަޕްޑޭޓާ އެކު، ނޫސްތަކާއި މުނިފޫހިފިލުވުމުގެ އެޕްތަކުގެ ނޯޓިފިކޭޝަން ސަމަރީ ފީޗާ ޑިފޯލްޓުން ޑިސޭބަލްކުރެވޭނެއެވެ. ސަމަރައިޒްކޮށްފައިވާ ޓެކްސްޓް އިޓެލިކްސްގައި ދައްކާނެކަމަށް 9ޓު5މެކްއިން ރިޕޯޓުކޮށްފައިވެއެވެ. އަދި، ސެޓިންގްސް އެޕްގައި ސަމަރީތަކުގައި "އޮޅުން އަރާފާނެ"ކަމުގެ އިންޒާރު ދޭނެއެވެ.
އެޕަލްގެ އައިއޯއެސް 18 ގެ "އެޕަލް އިންޓެލިޖެންސް" ފީޗާތަކުގެ ތެރެއިން އެއް ފީޗާގެ ގޮތުގައި ތަޢާރަފުކުރި ނޯޓިފިކޭޝަން ސަމަރީއަކީ، ފޯނަށް އަންނަ ނޯޓިފިކޭޝަންތަކުގެ މުހިންމު މަޢުލޫމާތުތައް ޚުލާސާކޮށްދޭ ފީޗާއެކެވެ.
މި ފީޗާ ބޭނުންކުރުމަކީ އިޚުތިޔާރީ ކަމަކަށްވެފައި، ސަމަރައިޒްކުރާނީ ވެސް ކޮން އެޕްތަކެއްގެ ނޯޓިފިކޭޝަންތަކެއްތޯ ޔޫޒަރަށް ކަނޑައެޅިދާނެއެވެ. ނަމަވެސް، ފީޗާ ތަޢާރަފުކުރި ފަހުން، ޚާއްސަކޮށް ނޫސްތަކުގެ ނޯޓިފިކޭޝަންތައް ގޯސްކޮށް ސަމަރައިޒްކުރަމުންދާކަން ފާހަގަކުރެވިފައިވެއެވެ.