މިސްކިތެއްގައި ކުޅިވަރު ކުޅޭ ކަމަށް ބެލެވޭ ވީޑިއޯއެއް ދައުރުވާން ފެށުމާ ގުޅިގެން، މިސްކިތްތަކުގެ ހުރުމަތް ކަނޑާ މީހުންނަށް ގާނޫނާއި ގަވާއިދުގެ ދަށުން ފިޔަވަޅު އަޅާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަނީ ބަޔަކު މިސްކިތެއް ތެރޭ ކުޅިވަރު ކުޅޭ މަންޒަރެވެ. އެ ކަމާ ގުޅިގެން ބައެއް މީހުން އަންނަނީ ނުރުހުން ފާޅުކުރަމުންނެވެ.
އެކަމާ ގުޅިގެން 'އެކްސް'ގައި ކުރެއްވި ޕޯސްޓެއްގައި މިނިސްޓަރު ޝަހީމް ވިދާޅުވީ، މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ގަދަރާއި އިހުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަ މިނިސްޓްރީގެ ސަމާލުކަމަށް އައިސްފައިވާ ކަމަށެވެ.
އެއީ ކިހިނެއް ހިނގާފައިވާ ކަމެއްތޯ ބެލުމުގެ ކަންކަން މިނިސްޓްރީން ކުރަން ފަށާފައިވާ ކަމަށް ވެސް ޝަހީމް ވިދާޅުވިއެވެ.
ޝަހީމް ވިދާޅުވީ، މިސްކިތްތަކުގެ ހުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ހިމާޔަތްކުރުމުގެ ގާނޫނާއި ގަވާއިދުގެ ދަށުން ފިޔަވަޅު އަޅުއްވާނެ ކަމަށެވެ.
އެ ވީޑިއޯއިން ފެންނަނީ މިސްކިތެއްގައި ދެ ޖިންސުގެ މީހުންތަކެއް ގޭމު ކުޅެމުންދާ މަންޒަރެވެ.
ދެ ޓީމަކަށް ބަހައިގެން، ކަރުދާސް ފެން ބޯ ތަށި ބޮލަށް ލައިގެން ފޯރީގައި ގޭމް ކުޅޭ މަންޒަރު ދައްކުވައިދޭ އެ ވީޑިއޯގައި އެއީ ކޮން މިސްކިތެއް ކަމެއް ސާފެއް ނޫނެވެ. އެ ވީޑިއޯއިން ފެންނަ ފެނުމަށް އެއީ ބިދޭސީންތަކެކެވެ.