ހަނގުރާމަ ހުއްޓާލުމުގެ އެއްބަސްވުމާ ގުޅިގެން އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫގެ ސަރުކާރުން އިސްތިއުފާ ދޭނެ ކަމަށް އިސްރާއީލުގެ ހަރުކަށި ގައުމީ ސަލާމަތާ ބެހޭ ވަޒީރު އިޓަމާ ބެން ގްވީރު ބުނެފިއެވެ.
"އެ އެއްބަސްވުމަކީ ފަރުވާކުޑަ އެއްބަސްވުމެއް،" ޓީވީ މެދުވެރިކޮށް ދިން ބަޔާނެއްގައި ބެން ގްވީރު ބުންޏެވެ.
ފަލަސްތީނުގެ އެތައް ސަތޭކަ ހަނގުރާމަވެރިން ދޫކޮށްލައި، ޣައްޒާގެ ސަރަހައްދުތަކުން ހަމާސް ބަލިނުކޮށް ފޭބުމަކީ ހަނގުރާމައިގެ ކާމިޔާބެއް ނޫން ކަމަށް ވެސް ގްވޫރް ބުނެފައިވެއެވެ.
"މި ޒިންމާދާރުކަން ކުޑަ އެއްބަސްވުން ފާސްކޮށް ތަންފީޒު ކުރެވިއްޖެ ނަމަ އަޅުގަނޑުމެން ޔަހޫދީ ބާރުގެ މެންބަރުން އިސްތިއުފާގެ ސިޓީ ބޮޑުވަޒީރަށް ހުށަހަޅާނަން،" އޭނާ ބުންޏެވެ.
އިސްރާއީލުގެ މީޑިއާތަކުން ކުރިން ރިޕޯޓްކޮށްފައިވާ ގޮތުގައި ހުކުރު ދުވަހު ކެބިނެޓުން އެ އެއްބަސްވުން ތަސްދީގުކުރުމަށް ވޯޓު ދޭނެއެވެ. ނަތަންޔާހޫގެ އޮފީހުން ވެސް ވަނީ މިއަދުގެ ވަގުތެއްގައި އޭނާގެ ސެކިއުރިޓީ ކެބިނެޓް ބާއްވައި، އެއްބަސްވުން ފާސްކުރާނެކަން ކަށަވަރުކޮށްދީފައެވެ.
ހަނގުރާމަ ހުއްޓާލުމުގެ އެއްބަސްވުމަކަށް އައި ނަމަވެސް އިސްރާއީލުން އަދިވެސް އަންނަނީ ޣައްޒާއަށް ހަމަލާދެމުންނެވެ.
ހަމަލާތަކުގައި ބުރާސްފަތި ދުވަހު އެކަނި ވެސް 72 މީހުން ވަނީ ޝަހީދުކޮށްލާފައެވެ.