ބޮލީވުޑްގެ އެކްޓަރު ސައިފް ޢަލީ ޚާން މުމްބާއީގައި ދިރިއުޅޭ ގެއަށް ވައްކަން ކުރަން ވަތް މީހަކު އެކްޓަރަށް ހަމަލާދީ ޒަޚަމްކޮށްލައިފިއެވެ.
ރޭގެ ދަންވަރު 2:00 އާއި 2:30އާ ދެމެދު ހިނގި މި ޙާދިސާގައި ސައިފަށް ލިބުނު އަނިޔާއާ ގުޅިގެން އޭނާ ވަނީ މުމްބާއީގެ ލީލާވަތީ ހޮސްޕިޓަލްގައި އެޑުމިޓުކޮށް ފަރުވާދޭން ފަށާފައެވެ.
ސައިފަށް ލިބުނު ޒަޚަމްތަކާ ގުޅިގެން ހާއްސަ ސާޖަރީއެއް ވެސް ހަދަން ފަށާފައިވާ ކަމަށް ފިލްމީ ޚަބަރުތައް ބުނެއެވެ.
ވައްކަން ކުރަން ވަދެ އުޅުނު މީހާއާއި ސައިފާ ދެމެދު ހިނގި ކުރިމަތިލުމެއްގައި އެ މީހާ ގެންގުޅުނު ތޫނު އެއްޗަކުން ސައިފްގެ ހަށިގަނޑުގެ ހަ ތަނަކަށް ވަނީ ހަމަލާދީ ޒަހަމްކޮށްލައިފައެވެ. އޭގެތެރެއިން ދެ ތަނަކަށް ވަރަށް ފުންކޮށް އަނިޔާވެ ޒަޚަމްވެފައިވާ ކަމަށް ސައިފްއަށް ފަރުވާދޭ ޑޮކްޓަރުންގެ ޓީމާ ހަވާލާދީ ރިޕޯޓުތައް ބުނެއެވެ. ރިޕޯޓުތައް ބުނާގޮތުން ސައިފްގެ އަތުގެ މުލައްދަނޑިއަށް ލިބުނު ޒަޚަމްތަކާ ގުޅިގެން ޕްލާސްޓިކް ސާޖަރީއަކަށް ދިއުމުގެ ފުރުސަތު ވެސް ބޮޑެވެ.
ސައިފް އާއި ކަރީނާ ދެމަފިރިން މުމްބާއީގައި ދިރިއުޅޭ ގޭގައި--ފޮޓޯ/ވޯގް
ފިލްމީ ރިޕޯޓުތައް ބުނާގޮތުން ބަންޑްރާގައި އެކްޓަރާއި އަންހެނުން ކަރީނާ ކަޕޫރު ދިރިއުޅޭ ގޭގެ 11 ވަނަ ފަންގިފިލާއަށް ވައްކަން ކުރަން މީހަކު ވަދެ އުޅުނުކަން އެނގުނީ އެހެންޏާ ގޭތެރެއިން ނީވޭ އަޑުތަކެއް އިވި އެ ފަންގިފިލާގައި ހުރި ބައެއް ތަކެތި ތަޅުވާ އަޑު އިވުމުންނެވެ.
ވައްކަން ކުރަން ވަދެ އުޅުނު މީހާ ފިލާފައިވާއިރު އެ މައްސަލަ ފުލުހަށް ހުށަހަޅާފައިވާ ކަމަށާއި އެކްޓަރަށް ހެޔޮ ދުއާ ކޮށްދިނުމަށް ސައިފްގެ ޓީމުން ވަނީ އެދިފައެވެ.
ބޮލީވުޑްގެ އެންމެ މަގުބޫލު ދެމަފިރިން ކަމަށްވާ ސައިފް އާއި ކަރީނާގެ އާއިލާ އަކީ މީޑިއާގެ އެންމެ ބޮޑު ސަމާލުކަމެއް ހޯދާ ފިލްމީ އާއިލާއެވެ.