އަންނަ ހުކުރު ދުވަހު ސިނަމާތަކުގައި ދައްކަން ތާވަލު ކޮށްފައިވާ ބޮލީވުޑްގެ ބަތަލާ ކަންގަނާ ރަނާވަތުގެ ފިލްމު "އިމަޖެންސީ" އިންޑިއާގެ އަވަށްޓެރި ބަންގްލަދޭޝްގައި ދެއްކުން މަނާކޮށްފިއެވެ.
ފިލްމީ ޚަބަރުތައް ގެނެސްދޭ ބޮލީވުޑްހަންގާމާގައި ބުނެފައިވާ ގޮތުން "އިމަޖެންސީ" ފިލްމު ބަންގްލަދޭޝްގައި ދެއްކުން މަނާ ކުރަން ނިންމީ ދެ ޤައުމުގެ ދެމެދުގައި މިހާރު ވެސް ސިޔާސީ ނުތަނަވަސްކަމެއް އޮތުމުގެ އިތުރުން ފިލްމުގައި ހިމެނިފައިވާ ބަންގްލަދޭޝްގެ ކުރީގެ ބޮޑުވަޒީރު ޝައިޚް މުޖީބުއްރަޙްމާންގެ ވާހަކަތައް ގެނެސްދެވިފައިވާ ގޮތުންނެވެ.
ޝައިޚް މުޖީބުއް ރަޙްމާނަކީ ބަންގްލަދޭޝްގެ ބޮޑުވަޒީރުކަމުން އިސްތިއުފާ ދެއްވުމަށްފަހު އަމިއްލަ ޤައުމުން ފިއްލަވައިގެން އިންޑިއާއިން ޙިމާޔަތް ހޯދުމަށް ވަޑައިގެންނެވި ޝައިޙް ޙަސީނާގެ ބައްޕާފުޅެވެ.
ބަތަލާ ކަންގަނާ ފިލްމު "އިމަޖެންސީ"ގެ މަންޒަރެއްގައި--ފޮޓޯ/އިންޑިއާފޯރަމްސް
ރިޕޯޓުތައް ބުނާގޮތުން ބަންގްލަދޭޝްގައި ފިލްމު ދެއްކުން މަނާ ކުރުމަށް ނިންމި އެންމެ ބޮޑު އެއް ސަބަބަކީ ފިލްމުގެ ކޮންޓެންޓަށް ވުރެ ބޮޑަށް ދެ ޤައުމުގެ ދެމެދުގައި ސިޔާސީ ހިތްހަމަނުޖެހުންތަކެއް ހުރުމެވެ. ފިލްމުގައި ދައްކާގޮތުން ކުރީގެ ބޮޑުވަޒީރު މުޖީބުއް ރަޙްމާން އަވަހާރަކޮށްލުމުގައި އެންމެ އިސްކޮށް އުޅެފައި ވަނީ ވެސް ހައްދުފަހަނައަޅާފައިވާ ބަންގްލަދޭޝަށް ނިސްބަތްވާ ބައެކެވެ.
މިކަމުގެ ސަބަބުން ވެސް ބަންގްލަދޭޝްގެ ވަރަށް ގިނަ ބަޔަކު ފިލްމު ބެލުމާ ދެކޮޅުވެރިވުން އެކަށީގެންވާ ކަމަށް ރިޕޯޓުތައް ބުނެއެވެ.
ފިލްމީ ދާއިރާގައި މަސައްކަތް ކުރުމުގެ އިތުރުން ސިޔާސީ މައިދާނުގައި ހަރަކާތްތެރިވަމުން އަންނަ ބަތަލާ ކަންގަނާ ޑައިރެކްޓްކޮށްފައިވާ މި ފިލްމަކީ އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ވެރިކަމުގައި އިއުލާނުކުރި ކުއްލި ޙަލާތާއި އޭގެ ސަބަބުން އިންޑިއާގެ ސިޔާސީ މަސްރަހަށް އައި ބޮޑު ބަދަލު ދައްކުވައިދޭ ފިލްމެކެވެ. މި ފިލްމުގައި ކަންގަނާ ފެންނާނީ ކުރީގެ ބޮޑުވަޒީރު އިންދިރާ ގާންދީގެ ރޯލްއިންނެވެ.