ސިޔާސީ ޕާޓީއެއްގެ މެންބަރަކަށް ވެވޭނީ ހަމައެކަނި ޑިޖިޓަލް ނިޒާމުގެ ތެރެއިން އީފާސް މެދުވެރިކޮށްގެން ކަމަށް ހެދުމާ އެކު ވަގު ފޯމުގެ ދޮރު އެއްކޮށް ބަންދުވާނެ ކަމަށް އިލެކްޝަންސް ކޮމިޝަން (އީސީ)ން ރޭ ބުނެފިއެވެ.
ދައުލަތުގެ މީޑިއާ ޕީއެސްއެމްގައި ވާހަކަދައްކަވަމުން އީސީގެ މެންބަރު ހަސަން ޒަކަރިއްޔާ ވިދާޅުވީ، އީފާހުގެ ތެރެއިން އެކަނި ޕާޓީތަކަށް ވަދެވޭގޮތަށް ގެންނަ ބަދަލާ އެކު، ވަގަށް މީހުން ޕާޓީތަކަށް ވައްދާ މައްސަލަ ހައްލުވާނެކަމުގެ ފުރިހަމަ ޔަގީންކަން އެބައޮތް ކަމަށެވެ.
މި މައްސަލަ ހައްލުކުރަން އީސީން ނިންމާފައިވަނީ ފެބްރުއަރީ 15 އިން ފެށިގެން ޕާޓީއެއްގެ މެންބަރަކަށް ވެވޭނީ ހަމައެކަނި އީފާސް މެދުވެރިކޮށް ކަމަށެވެ.
މިހާރު ފުރާފައި ހުރި ކަރުދާސް ފޯމުތައް ވެސް، ޖެނުއަރީ 30ގެ ކުރިން އީސީއަށް ހުށަހެޅުމަށް އެ ކޮމިޝަނުންވަނީ ސިޔާސީ ޕާޓީތަކަށް އަންގައިފައެވެ. އޭގެ ފަހުން ހުށަހަޅާ އެއްވެސް ކަރުދާސް ފޯމެއް އީސީން ބަލައިނުގަންނަނާނެއެވެ.
ޒަކަރިއްޔާ ވިދާޅުވީ، ޕާޓީތައް އުފެެދުނީއްސުރެ ވަގަށް ޕާޓީތަކަށް މީހުން ވެއްދުމުގެ މައްސަލަ އުޅޭ ކަމަށެވެ. މި ފަހުން ވަނީ ސަރުކާރު ހިންގާ ޕީއެންސީއަށް ވަގަށް ބަޔަކު ވެއްދި މައްސަލަތަކެއް ފެންމަތިވެ، އެ ކަމާ ގުޅިގެން ސަރުކާރަށް ބޮޑެތި ތުހުމަތުތަކެއް ވެސް ކުރެވިފައެވެ.
މި މައްސަލައިގައި ޕާޓީތަކަށް މީހުން ވެއްދުން މިހާރު އޮތީ ވަގުތީ ގޮތުން މެދުކަނޑާލައިފައެވެ.
ސިޔާސީ ޕާޓީތަކުގެ ވަރަށް ގިނަ ކަންކަން ހަރުދަނާކުރުމަށްޓަކައި، ޕާޓީތަކާ މަޝްވަރާ ކުރުމަށް ފަހު، 2019ވަނަ އަހަރު އީސީންވަނީ ޑްރާފްޓެއް ތައްޔާރުކޮށްފައެވެ. އޭގެ ތެރޭގައި ވަގަށް ޕާޓީތަކަށް މީހުން ވައްދާ މައްސަލަ ހައްލުކުރުމަށް ޑިޖިޓަލް، އަދި ޒަމާނީ ހައްލުތައް ހިމެނޭ ކަމަށް ޒަކަރިއްޔާ ވިދާޅުވިއެވެ.
އެހެންނަމަވެސް، މިއަދާ ހަމަޔަށް އައިއިރު ވެސް އެ އިސްލާހުތައް ގާނޫނަށް ތިރިކުރެވިފައި ނެތްކަމުގެ ކަންބޮޑުވުން އޭނާ ފާޅު ކުރެއްވިއެވެ. ޒަކަރިއްޔާ ވިދާޅުވި ގޮތުގައި އެ ޑްރާފްޓު ބަންޑާރަނައިބުގެ އޮފީހަށް ފޮނުވާފައި އޮންނަތާ މިއީ ހަތަރުވަނަ އަހަރެވެ.
"...އެ ޑްރާފްޓުގައި އަޅުގަނޑުމެން ބޮޑަށް ފޯކަސްކުރި އެއް ކަމެއް އެއީ، ސިޔާސީ ޕާޓީތަކަށް ނޭނގި ވެއްދުން ހުއްޓުވުމަށްޓަކައި، މިހާރުގެ ޒަމާނީ ޓެކްނޮލޮޖީގެ ތެރެއިން ޑިޖިޓަލް ނިޒާމަކަށް ދެވޭ ގޮތަށް ގާނޫނަށް ބަދަލުތައް ގެނައުން. އެ ޑްރާފްޓުގައި އެ ކަންކަމަށް ވަރަށް ބޮޑަށް މަގުފަހި ހުންނާނެ. އެހެންނަމަވެސް ހިތާމައަކީ މި ދެންނެވި އިސްލާހުތައް ގާނޫނެއްގެ ސިފައަށް ނައިސް އެ އޮތް ގޮތަށް އޮތީ،" ޒަކަރިއްޔާ ވިދާޅުވިއެވެ.
ގާނޫނުގައި ބުނާ ގޮތުން، ސިޔާސީ ޕާޓީތަކުގެ ދަފްތަރުގައި ތިބި މީހުންގެ އަދަދުތައް، އީސީން ކޮންމެ ހަ މަހަކުން އާންމު ކުރަންޖެހެއެވެ. އެ އަދަދުތައް އަންނަ ހަފްތާގައި ހާމަކުރުމަށް މަސައްކަތް ކުރަމުންދާ ކަމަށް އީސީން ބުނެއެވެ.
ސިޔާސީ ޕާޓީތަކުގެ ދަފުތަރު އެންމެ ފަހުން އަދާހަމަކޮށްފައިވަނީ މިދިޔަ ސެޕްޓެންބަރުގައެވެ.