ގެދޮރުވެރިޔާ ސްކީމުގެ ދަށުން ފްލެޓަށް ހުށަހެޅިއިރު ކައުންސިލްތަކުން ދޫކުރި ލިޔެތެކިޔުންތައް ބަލައިނުގަންނަން ނިންމާފައިވާކަމަށް ހައުސިން މިނިސްޓްރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު މުއްތަލިބު ވިދާޅުވީ ކައުންސިލްތަކަކީ މީހުން ދިރިއުޅޭ ތަންތަނުގެ ރެކޯޑުތައް ބަލަހައްޓާ ތަނަކަށް ނުވާތީ ފްލެޓް ލިސްޓުގެ ސައްޙަކަން ކަށަވަރުކުރުމަށް ކައުންސިލްތަކުގެ ލިޔެކިޔުންތަކަށް ރިއާޔަތްނުކުރުމަށް މިނިސްޓްރީއަށް ލަފާ ލިބިފައިވާ ކަމަށެވެ.
"ބައެއް ފަރާތްތަކުން ސްކީމަށް އެޕްލައި ކުރިއިރުގައި ހުށަހެޅުމަށް އިއުލާނުކޮށްފައިވާ އުސޫލުތަކާއި އިރުޝާދުތަކަށް ނުފެތޭ ލިޔުންތައް ހުށަހަޅާފައިވާކަން އޭސީސީއިން ވެސް ވަނީ ފާހަގަކޮށްފައި. އަދި ޝާކުވާގެ މުއްދަތުގައި އެކިކަހަލަ ލިޔުންތައް ހުށަހަޅާފައި ވާކަން ވެސް ވަނީ ފާހަގަކޮށްފައި. އެފަދަ ލިޔުންތައް ބަލައިގަންނަން ނުފެންނަކަމަށް އޮޑިޓާ ޖެނެރަލް އޮފީހުންވެސް ވަނީ ލަފާދީފަ،" މިނިސްޓަރު މުއްތަލިބް ވިދާޅުވިއެވެ.
ކައުންސިލްތަކުން ދޫކުރި ލިޔެކިޔުންތައް ބަލައިނުގަންނަން ނިންމައިފި --
ޕޯޓަލްގައި ހުށަހެޅިދާނެ ކަމަށް ބަޔާންކޮށްފައިވާ ލިޔުންތައް ނޫން ލިޔުންތަކަކީ ގާނޫނީ ގޮތުން ބަލައިގަނެވޭނެ ލިޔުންތަކެއް ނޫން ކަމަށް ވެސް މިނިސްޓަރު ވަނީ ވިދާޅުވެފައެވެ.
ގެދޮރުވެރިކަމާ ބެހޭ މަސައްކަތް ހަވާލުވުމުން، ކަންކަން ހިނގާފައިވާ ގޮތަށް ބަލައި، އިއުލާނުކުރެވިފައިވާ ލިސްޓާ ގުޅޭގޮތުން ރައީސް ޑރ. މުހައްމަދު މުއިއްޒުގެ ސިޔާސަތުތަކާ އެއްގޮތަށް މަސައްކަތް ގެންދިއުމަށް ޓަކައި ފުލެޓު ލިސްޓަށް ފޯމުލީ އެންމެން އިވެލުއޭޓް ކުރުމުގެ ބަދަލުގައި 15 ނޮވެމްބަރުގައި އިއުލާންކޮށްފައިވާ ލިސްޓުގެ ވެރިފިކޭޝަން ޕްރޮސެސް ކުރިއަށް ގެންދަން ނިންމާފައިވާ ކަމަށް ވެސް މިނިސްޓްރު ވަނީ ވިދާޅުވެފައެވެ.
ގެދޮރުވެރިޔާ ސްކީމްގެ ދަށުން ފުލެޓު ލިބޭ މީހުންގެ ލިސްޓު ކުރިން އާންމުކުރި ނަމަވެސް، އެ ލިސްޓުގައި ބޮޑެތި ގޯސްތަކެއް އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)ން ކުރިން އެކަން ހުއްޓުވިއެވެ. އެހެންވެ، މި ސަރުކާރުން ލިސްޓު ރީއިވޭލުއޭޓްކުރަން ނިންމައިފައިވެއެވެ.
ގެދޮރުވެރިޔާ ސްކީމުން ފުލެޓަށް އެދި ހުށަހެޅި މީހުންގެ ތެރެއިން ޝަރުތު ހަމަވި 15،000 އަށްވުރެ ގިނަ މީހުންނަށް ފުލެޓު ދިނުމަށް އެމްޑީޕީ ސަރުކާރުން އޮތީ ނިންމައިފައެވެ.