ކުރިއަށް އޮތް އަހަރުތަކުގައި، އެސްޓޯނިއާއާއެކު ދެ ގައުމުގެ ކުރިއެރުމަށް މަސައްކަތްކުރެވޭނެ ކަމުގެ އުންމީދު އެބައޮތް ކަމަށާއި، އެ ގައުމަށް ވަޑައިގަތުމުން ކިޔުއްވި ހޫނު މަރުހަބާއަށްޓަކައި އެސްޓޯނިއާގެ ރައީސް ޑރ. އަލާރް ކައިސްއަށް ރައީސް ޑރ. މުހައްމަދު މުއިއްޒު ޝުކުރުއަދާކުރައްވައިފިއެވެ.
އެސްޓޯނިއާގެ ރައީސް ޑރ. އަލާރް ކަރިސްގެ ދައުވަތަކަށް ރައީސް މުއިއްޒު މިހާރު ކުރައްވަމުން ގެންދަވާ ރަސްމީ ދަތުރުފުޅުގައި އެ ގައުމުން އެ މަނިކުފާނަށް އިއްޔެ ވަނީ ރަސްމީކޮށް މަރުހަބާ ވިދާޅުވެފައެވެ.
މިއަދު 'އެކްސް'ގައި ކުރެއްވި ޕޯސްޓެއްގައި އެމަނިކުފާނު ވަނީ އެސްޓޯނިއާއަށް ތާރީޚީ ދަތުރުފުޅެއް ކުރެއްވުމަށް ދެއްވި ދައުވަތަކަށްޓަކައި، އެސްޓޯނިއާ ސަރުކާރަށާއި އެ ގައުމުގެ ރައީސަށް ޝުކުރު ދަންނަވާފައެވެ.
"އަޅުގަނޑު އައި ފަހުން ލިބުނު ހޫނު މެހެމާންދާރީއަށް ހިތުގެ އަޑިން ޝުކުރު. ހަގީގަތުގައި މިތަނަށް އައުމަކީ ޝަރަފެއް،" ރައީސް މުއއިްޒު ވިދާޅުވިއެވެ.
އެސްޓޯނިއާގެ ރައީސާއެކު ބޭއްވި ބައްދަލުކުރެއްވުމުގައި ދެ ގައުމުގެ ގުޅުން އިތުރަށް ބަދަހިކުރުމުގެ ގޮތުން އުފެއްދުންތެރި މަޝްވަރާތަކެއް ކުރެއްވި ކަމަށް އެމަނިކުފާނު ވިދާޅުވިއެވެ. އެގޮތުން ޑިޖިޓަލް ގަވަނަންސް، ސައިބާ ރެޒިލިއަންސް، ކްލައިމެޓް ޗޭންޖް، އަދި ތައުލީމީ ދާއިރާއިން ބިނާކުރަނިވި މަޝްވަރާތަކެއް ކުރައްވާފައިވާ ކަމަށް ރައީސް ވިދާޅުވިއެވެ.
އެ މަޝްވަރާކުރުންތަކާއެކު ރާއްޖޭގެ ވިސްނުމަށް އިސްކަން ދީގެން ކުރިއަށް އޮތް އަހަރުތަކުގައި ދެ ގައުމުގެ ކުރިއެރުމަށްޓަކައި ގުޅިގެން މަސައްކަތްކުރުމަށް މަގުފަހިވެގެންދާނެ ކަމަށް ރައީސް ވިދާޅުވިއެވެ.
ރައީސް މުއިއްޒު އެސްޓޯނިއާގެ ރައީސާއެކު: އެމަނިކުފާނު ވަނީ ކިޔުއްވި މަރުހަބާއަށް ޝުކުރުއަދާކުރައްވާފައި -- ފޮޓޯ/ ރައީސް އޮފީސް
އަދި އެސްޓޯނިއާގެ ރައީސް ވިދާޅުވި ފަދައިން ރާއްޖެ އާއި އެސްޓޯނިއާ ކަހަލަ ކުދި ގައުމުތަކުގެ މެދުގައި އޮންނަ އެއްބައިވަންތަކަމަކީ ސަލާމަތާއި އިސްތިގުލާލުގެ އިތުރުން، ދުނިޔޭގެ ސުލްހަ މަސަލަސްކަމާއި، ދެމެހެއްޓެނިވި ތަރައްގީއަށް ވެސް ވަރަށް މުހިންމު ކަމެއް ކަމަށް ރައީސް ވިދާޅުވިއެވެ.
ރައީސް އޮފީހުން ވަނީ، ރައީސް މުއިއްޒުގެ އެސްޓޯނިއާގެ ދަތުރުފުޅުގައި އަމާޒަކީ ދިވެހިރާއްޖެއާއި އެސްޓޯނިއާއާ ދެމެދު ވިޔަފާރީގެ އެއްބާރުލުން އިތުރުކުރެއްވުމާއި، ޑިޖިޓަލް ޓެކްނޮލޮޖީ، ސައިބަ ސެކިއުރިޓީ، އީގަވަނަންސް އަދި މޫސުމާ ގުޅޭ މައްސަލަތަކުގެ އިތުރުން ތައުލީމީ ދާއިރާގައި ގުޅިގެން މަސައްކަތް ކުރުމުގެ ފުރުސަތުތައް ހޯއްދެވުން ކަމަށް ބުނެފައެވެ.
ރައީސް އެ ދަތުރުފުޅު ނިންމަވާލައްވާނީ އަންނަ ބުރާސްފަތީގައެވެ.
މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ އިސް ވަފުދެއް ވަނީ ބައިވެރިވެވަޑައިގެންފައެވެ.