މަގުމަތީގެ ރައްކާތެރިކަން ކަށަވަރުކޮށް މަގުމައްޗަކީ އަމާން ތަނަކަށް ހެދުމަށް ދިވެހި ފުލުހުންގެ ޚިދުމަތުން ކުރާ މަސައްކަތުގެ ތެރެއިން، ފާއިތުވި އަހަރު ޖުމްލަ 73،953 އުޅަނދު ޗެކްކޮށް، 7،606 އުޅަނދަކާމެދު ފިޔަވަޅު އަޅާފައިވާކަމަށް ފުލުހުން ބުނެފިއެވެ.
އެގޮތުން، 66،347 މީހަކަށް ނަސޭހަތް ދީފައިވާއިރު، 7،606 މީހަކަށް ވަނީ ވަޔަލޭޝަން ސްލިޕް ދޫކޮށްފައެވެ.
މީގެ އިތުރުން، ލައިސަންސް ނެތި ދުއްވި 2،138 މީހަކު މިދިޔަ އަހަރު ވަނީ ފާހަގަކޮށްފައެވެ. މީގެ ތެރޭގައި ދެފުރޮޅުލީ 2،005 އުޅަނދާއި ހަތަރު ފުރޮޅުލީ 133 އުޅަނދު ހިމެނެއެވެ.
ނުރައްކާތެރިކޮށް ދުއްވުމުގެ 293 މައްސަލަ ފާހަގަކޮށްފައިވާއިރު އޭގެތެރޭގައި ދެފުރޮޅުލީ 271 އުޅަނދާއި ހަތަރު ފުރޮޅުލީ 22 އުޅަނދު ދުއްވުމުގެ މައްސަލަތައް ހިމެނެއެވެ.
ފުލުހުން މަގުމަތީގައި: ފާއިތުވި އަހަރު 73،953 އުޅަނދު ޗެކްކޮށް 7،606 އުޅަނދަކާމެދު ފިޔަވަޅު އަޅާފި -- ފޮޓޯ/ ފުލުހުން
ފާއިތުވި އަހަރު ޓޯކޮށްފައިވާ އުޅަނދުތަކުގެ ތަފާސްހިސާބަށް ބަލާއިރު، ޓޯ އޮޕަރޭޝަންތަކުގައި ޖުމްލަ 15،514 އުޅަނދު ޓޯ ކޮށްފައިވެއެވެ. އޭގެ ތެރޭގައި:
- 11،645 މޮޓޯސައިކަލް
- 2،567 ކާރު
- 478 ޕިކަޕް
- 369 ވޭން
- 87 ޓްރަކް ހިމެނޭ
ޓޯ ކުރެވުނު އުޅަނދުތަކުގެ ތެރެއިން 546 އުޅަނދު ނައްތާލާފައި ވާއިރު، 13،562 އުޅަނދު ވަނީ ވެރިފަރާތާ ހަވާލުކޮށްފައެވެ.
މަގުމަތީގެ ނުރައްކާތެރި އެކްސިޑެންޓުތައް ހިނގުމަކީ ދިވެހި ފުލުހުންގެ ޚިދުމަތުން ނުހަނު ކަންބޮޑުވާ ކަމެށް ކަމަށާއި އެކްސިޑެންޓުތައް މަދުކުރުމަށް ގިނަ ވަސީލަތްތަކެއް ބޭނުންކޮށްގެން ހަރުދަނާ މަސައްކަތްތަކެއް ފާއިތުވި އަހަރު ކޮށްފައި ވާކަން ފުލުހުން ވަނީ ފާހަގަކޮށްފައެވެ.
އެގޮތުން ފުރާނައަށް ނުރައްކާވާފަދަ އެކްސިޑެންޓުތައް މަދުކުރުމަށް ވަކިން ހާއްސަކޮށް މަސައްކަތްތަކެއް ކޮށްފައި ވާކަން ފުލުހުން ވަނީ ފާހަގަކޮށްފައެވެ.