ބޮކްސް އޮފީހުގެ ގިނަ ރިކޯޑުތަކެއް މުގުރާލި ތެލުގޫ ފިލްމު "ޕުޝްޕާ 2"ގެ ބަތަލާ ރަޝްމިކާ މަންދަންނާ ކަސްރަތުކުރަން ޖިމްގައި ހަރަކާތްތެރިވެރި އުޅެނިކޮށް އަނިޔާވެއްޖެއެވެ.
ރަޝްމިކާ އިންސްޓަގްރާމްގައި ކުރި ޕޯސްޓެއްގައި ބުނީ، ޖިމް ސެޝަނެއް ނަގަނިކޮށް ފަޔަށް ލިބުނު އަނިޔާއަކާ ގުޅިގެން މި ވަގުތު ފިލްމީ މަސައްކަތްތަކާ ދުރަށް ޖެހިލާފައިވާ ކަމަށެވެ.
އުންމީދަކީ ވަރަށް އަވަހަށް ފިލްމީ މަސައްކަތަކަށް އެނބުރި ނުކުމެވުން ކަމަށާއި ނަމަވެސް އެކަމަށް ހަފުތާތަކެއް ނުވަތަ މަސްތަކެއް ހޭދަވުމަކީ އެކަށީގެންވާ ކަމެއް ކަމަށް ރަޝްމިކާ ވަނީ ބުނެފައެވެ. ރަޝްމިކާ މި ވަގުތު މަސައްކަތް ކުރަމުން އަންނަ ފިލްމުތައް ކަމަށްވާ "ތާމާ"، "ކުބޭރާ" އަދި "ސިކަންދަރު"ގެ މަސައްކަތްތައް ލަސްވުމާ ގުޅިގެން ބަތަލާ ވަނީ ފިލްމުގެ ޑައިރެކްޓަރުންގެ ކިބައިން މައާފަށް އެދިފައެވެ.
ބަތަލާ ރަޝްމިކާ--ފޮޓޯ/އިންޑިއަންއެކްސްޕްރެސް
މި ފިލްމުތަކުގެ ތެރެއިން "ސިކަންދަރު" އެއީ އެކްޓަރު ސަލްމާން ޚާނާ އެކު ރަޝްމިކާ ބަތަލާގެ ލީޑް ކުޅޭ ފިލްމެވެ. ފިލްމީ ޚަބަރުތައް ބުނާގޮތުން ރަޝްމިކާ ވަނީ ސާޖިދު ނަދިއަދުވާލާގެ ފިލްމު "ސިކަންދަރު"ގެ ވަރަށް ބޮޑު ބައެއްގެ ޝޫޓިން ނިންމާފައެވެ.
ސައުތު ސިނަމާގެ އެންމެ މަގުބޫލު ބަތަލާއިންގެ ތެރޭ ހިމެނޭ ރަޝްމިކާ ބޮލީވުޑްގެ ފިލްމުތައް ވެސް ކުޅެން ފަށާފައިވާއިރު ރަޝްމިކާ ހިމެނެނީ މި ވަގުތު ފިލްމު އިންޑަސްޓްރީގައި ތިބި އެންމެ ޑިމާންޑު ބޮޑު ބަތަލާއިންގެ ތެރޭގައެވެ.
ރަޝްމިކާ ކުޅެފައިވާ ބޮލީވުޑް ފިލްމުތަކުގެ ތެރޭ "ގުޑްބާއި"، "އެނިމަލް"، "މިޝަން މަޖްނޫ" ހިމެނެއެވެ. އެކްޓަރު ވިކީ ކޯޝަލްގެ ފިލްމު "ޗާވާ" އަދި އަޔުޝްމާނު ކުރާނާއާ އެކު ކުޅޭ ފިލްމު "ތާމާ" ވެސްއެވެ.