މާލޭ ސިޓީ ކައުންސިލުން ޒިންމާދާރުކަން ކުޑަ ގޮތަކަށް މާފަންނު ސަހަރާ ކޮނުމުގެ މަސައްކަތް ކޮށްފައިވާކަމަށް މިނިސްޓަ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރު ޑރ. އަބްދުﷲ މުއްތަލިބު ތުހުމަތުކުރެއްވުމާއެކު، މާލޭގެ މޭޔަރު އާދަމް އާޒިމާއި، މިނިސްޓަރާ ދެމެދު ބޮޑު ދެބަސްވުމެއް އުފެދިއްޖެއެވެ.
އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ މާލޭގެ މާފަންނު ސަހަރާގައި ހުރި ވޯޓާ ސްޓޯމް ފެން ޕަމްޕް ސްޓޭޝަން އެންގުމަކާ ނުލައި ކައުންސިލުން ރޫޅާލައިފައިވާ ކަމަށާއި މިކަމުގެ ސަބަބުން ވަށައިގެންވާ ސަރަޙައްދުގައި ފެންބޮޑުވުމުގެ މައްސަލަ ދިމާވަމުން އަންނަ ކަމަށެވެ.
އެއީ ކައުންސިލުން ކުރި ވަރަށް ޒިންމާދާރުކަން ކުޑަކަމެއްކަމަށް ވިދާޅުވެ އެ ތަން މަރާމާތުކުރެވޭނެ ގޮތެއް ހޯދުމުގެ މަސައްކަތްކުރަމުން އަންނަކަމަށް މުއްތަލިބު ވިދާޅުވިއެވެ.
އެ ޓްވީޓަށް ރައްދު ދެއްވައި މާލޭ ސިޓީގެ މޭޔަރު އާޒިމް ވިދާޅުވީ ކުރިން ވެސް އެ ފެން ޕަމްޕް ސްޓޭޝަން ހުރީ ހަލާކުވެފައި ކަމަށާއި އެ ސްޓޭޝަންއަށް ހުރީ ގެއްލުންދީފައިކަމަށެވެ. އެ ސްޓޭޝަން ހަލާކުވެފައި ހުންނަތާ ފަސް މަހަށްވުރެ ދުވަސްވެފައިވާ ކަމަށް ވެސް އާޒިމް ވިދާޅުވިއެވެ.
ވާރޭވެހޭ ދުވަސްތަކުގައި މާލެ ތެރޭގައި ފެންބޮޑުވެ، އާއްމުންނަށް ދުވަހުގެ މަސައްކަތަތައް ކުރުމަށް ބޮޑެތި ތަކުލީފުތައް އުފުލަން ޖެހޭކަމަށާއި އެކަން އެހެން ހުރުމުން ޝަކުވާތައް ވެސް ހުށަހަޅަމުން ގެންދާކަމަށް އާޒިމް ވިދާޅުވިއެވެ.
އަދި ޕަމްޕު ސްޓޭޝަން ހަލާކުވެފައިހުރިކަން މިނިސްޓްރީގެ ސަމާލުކަމަށް ވެސް ގެނެސްދިން ކަމަށް އާޒިމް ވިދާޅުވިއެވެ.
އެއާއެކު އޭނާވަނީ މާފަންނު ސަހަރާ ސާފުކޮށްގެން ލިބޭ ޖާގައިން ބައެއް، ފެންބޮޑުވުމުގެ މައްސަލަ ހައްލުކުރުމަށް ކުރަންޖެހޭ މަސައްކަތަށް ބޭނުންކުރާނެ ކަމަށެވެ.
އަދި މާލޭގެ ރައްޔިތުންނަށް ހުރި ދަތިތައް ހައްލުކުރުމުގެ މަސައްކަތުގައި އެއްބާރުލުންދެއްވަން ތައްޔާރަށް ހުންނެވި ކަމަށް އާޒިމް ވިދާޅުވިއެވެ.
އާޒިމްގެ އެ ޕޯސްޓަށް ރައްދުދެއްވަމުން މިނިސްޓަރު ވިދާޅުވީ، އެ ޕަމްޕް ސްޓޭޝަން މިދިޔަ ހަފުތާގައި ވެސް މަސައްކަތްކުރި ކަމަށެވެ. އަދި ޕަމްޕު ސްޓޭޝަން ހުރި ތަން ކޮނުމުގެ ބޭނުމެއް ވެސް ނެތް ކަމަށާއި، އެ ތަން ހެދީ އެ ތަނުގައި ވަޅުލައިފައި ހުރި ގަބުރުތައް ސާފުކުރުމަށްފަހު ކަމަށް ވެސް މުއްތަލިބު ވިދާޅުވިއެވެ.
ގިނައިރު ވާރޭވެހިއްޖެނަމަ ފެންބޮޑުވުމުގެ މައްސަލަ މިހާރު މާލެއަށް ވަރަށް އާންމުކޮށް ކުރިމަތިވެއެވެ. މެދުނުކެނޑި ވާރޭ ވެހިއްޖެނަމަ ވަރަށް ބޮޑުވެ ގިނަ ބަޔަކަށް ބޮޑެތި ގެއްލުންތައް ވެސް އަންނަނީ ވަމުންނެވެ.
މި މައްސަލަ ބޮޑުވެ މާލޭގެ މަގުތައް މަރާމާތުކުރުމާއި ފެން ހިންދާ ނިޒާމުތައް ގާއިމްކުރުމުގެ މަސައްކަތް އެކި ސަރުކާރުތަކުގައި ކުރި ނަމަވެސް، އަދިވެސް އެ ކަން ހައްލުނުވެއެވެ. އެއާއެކު ސިޔާސީ ގޮތުން އެކި ފާޑުކިޔުންތަކާއި، ބަހުގެ ހަަމަލަތައް މި މައްސަލައާ ގުޅިގެން ވަރަށް ބޮޑަށް އަންނަނީ އަމާޒުވަމުންނެވެ.