އިންޑިއާގެ އެންމެ ކާމިޔާބު ފިލްމީ ތަރިންގެތެރޭ ހިމެނޭ އާމިރު ޚާންގެ ދަރިފުޅު ޖުނައިދު ޚާން އަދި ކުރީގެ ބަތަލާ ސްރީދޭވީގެ ހަގު ދަރިފުޅު ޚުޝީ ކަޕޫރުގެ ފިލްމު "ލަވްޔާޕާ"ގެ ޓްރެއިލާ ދައްކާލައިފިއެވެ.
ފިލްމު "ދަ އާޗީސް" އަދި "މަހާރާޖާ"އިން ފިލްމު އިންޑަސްޓްރީއަށް ތައާރަފްވި ދެ ތަރިންގެ ވެސް މިއީ ދެ ވަނަ ފިލްމެވެ. އަންނަ ފެބްރުއަރީ މަހުގެ ހަަތްވަނަ ދުވަހު ސިނަމާތަކަށް ގެންނަން ތާވަލުކުރެވިފައި އޮތް "ލަވްޔާޕާ" އަކީ އާމިރު ޚާންގެ ފިލްމު ކުންފުންޏާއި ޒީ ސްޓޫޑިއޯ ގުޅިގެން ގެނެސްދޭ ރޮމޭންޓިކް ކޮމެޑީއެކެވެ.
މި ފިލްމުގެ ޓްރެއިލާއިން ފެންނަ ގޮތުގައި ޖުނައިދާއި ޚުޝީ އަކީ ވަރަށް ލޯބިން ގުޅިގެން އުޅޭ ދެ ޒުވާނުންނެވެ. ނަމަވެސް ދެ މީހުންގެ ގުޅުން ކައިވެންޏާ ހަމައަށް ގޮސް އާއިލާއިން ކައިވެނި ކުރާނެ ޝަރުތަކަށް ހުށަހަޅަނީ އެންމެ ދުވަހަކަށް އެކަކު އަނެކަކަށް ފޯނު ބަދަލުކުރުމަށެވެ.
"ލަވްޔާޕާ"ގެ ޓްރެއިލާ ރިލީޒްކުރި ހަފްލާގައި އާމިރު ޚާން، ޖުނައިދު ޚާން އަދި ޚުޝީ ކަޕޫރު--ފޮޓޯ/ބޮލީވުޑްހަންގާމާ
މި ޝަރުތު ގަބޫލުކޮށް ފޯނު ބަދަލު ކުރުމުން ދެ މީހުންގެ ދިރިއުޅުމަށް އަންނަ ހަލަބޮލިކަމާއެކު ދެ މީހުންގެ ދެމެދުގައި ހިނގާ ބޮޑު ކޯޅުންގަނޑެއް ފިލްމުން ފެންނާނެއެވެ.
މި ޒަމާނުގައި ގިނަ ބައެއްގެ ދިރިއުޅުން ސްމާޓް ފޯނަށް ބަރޯސާވުމާއެކު ހާއްސަކޮށް ޒުވާނުންގެ ދިރިއުޅުމަށް އައިސްފައިވާ ބަދަލުތައް ފިލްމުން ވަރަށް ރަގަޅަށް ދައްކުވައިދޭނެ ކަމަށް އާމިރު ޚާން ވަނީ ބުނެފައެވެ.
ޖުނައިދު އާއި ޚުޝީގެ އޮން ސްކްރީން ކެމިސްޓްރީއަށް ގިނަ ބަޔަކު ތައުރީފުކޮށްފައިވާއިރު ފިލްމު ވެސް ރީތިވާނެކަމަށް އުއްމީދުކުރާ ކަމަށް ޓްރެއިލާގެ ރިވިއުތައް ބުނެއެވެ.