ހުޅުމާލޭ ފޭސް ދޭއްގައި ސްޓެލްކޯއިން ބަހައްޓާފައިވާ ދެ ޓްރާންސްފޯމަރަކަށް ބަޔަކު ގަސްތުގައި ގެއްލުން ދީ ވައްކަންކޮށްފައިވާ ކަމަށް އެ ކުންފުނިން ބުނެފިއެވެ.
ސްޓެލްކޯގެ މެނޭޖިން ޑިރެކްޓަރު ހުސެން ފަހުމީ ވިދާޅުވީ މި ޓްރާންސްފޯމަރުތަކަށް ގެއްލުން ދީފައިވަނީ ޓްރާންސްފޯމަރުތަކުގެ އޮޕަރޭޝަންތަކުގެ ފަންނީ މައުލޫމާތު އެނގޭ ބައެއްކަމަށެވެ.
މިއަދު 'އެކްސް'ގައި ކުރެެއްވި ޕޯސްޓްއެއްގައި ހުސެން ފަހުމީ ވިދާޅުވީ، ބަޔަކު ގަސްތުގައި ޓްރާންސްފޯމަރުތަކަށް ގެއްލުން ދިނުމުގެ ސަބަބުން ކަރަންޓު ފޯރުކޮށްދޭ ނެޓްވޯކަށް ގެއްލުންވެފައިވާ ކަމަށެވެ.
ޓްރާންސްފޯމަރުތައް ބަހައްޓާފައި ހުންނަނީ ބައުންޑަރީ ފާރެއްގެ އިތުރުން ޑަބަލް ލޮކްކޮށްފައިވާ އެންކްލޯޒާތަކާ އެކު އެވެ. ނަމަވެސް އެ ތަންތަނަށް ގެއްލުން ދިން މީހުން ގޭޓުތައް ފަޅާލައި ތަޅުތައް ހަލާކުކޮށްލާފައިވާ ކަމަށް ސްޓެލްކޯގެ އެމްޑީ ވިދާޅުވިއެވެ.
މިފަދަ ހައި ވޯލްޓޭޖު ޓްރާންސްފޯމަރުތަކާ ކުޅެހެދުމަކީ ކަރަންޓުގައި ޖެހި ސީރިއަސް އަނިޔާތައްވުމާއި ކަރަންޓުގައި ޖެހި މަރުުވުން ފަދަ ހާދިސާތައް ކުރިމަތި ވެދާނެކަމެކެވެ.
މި މައްސަލަ އިތުރަށް ތަހުގީގު ކުރަމުންދާކަމަށް ފަހުމީ ވަނީ ވިދާޅުވެފައެވެ.
މީގެ ކުރިން ވެސް ޓްރާންސްފޯމަރުތަކުން ވައްކަންކުރުމުގެ ގިނަ މައްސަލަތަކެއް ފެންމަތިވެފައިވެއެވެ. އަދި ބައެއް ގޭގެއިން ވެސް ކަރަންޓު ކޭބަލް ވަގަށް ނެގުމުގެ ކަންކަން ފެންމަތިވެ، މީހަކު މަރުވެފައި ވެސް ވެއެވެ.