އެމެރިކާގެ އެންމެބޮޑު ވައިގެ ދަތުރުފަތުރުގެ ކުންފުނި ބޯއިންގްއިން ޑޮނަލްޑް ޓްރަމްޕްގެ ދެވަނަ ދައުރުގެ ހުވާކުރުމުގެ ރަސްމިއްޔާތަށް އެއް މިލިއަން ޑޮލަރު ހަދިޔާކުރާކަމަށް ބީބީސީ ނިއުސްއިން ހާމަކޮށްފިއެވެ.
ގޫގުލްއިން ވެސް މިފަދަ އަދަދެއް ހަދިޔާކޮށްފައިވާކަން ކަށަވަރުކޮށްދީފައިވެއެވެ. މި ދެ ކުންފުނިން މިގޮތަށް ހަދިޔާކުރަނީ މިހާރު ވެސް ޗެވްރަން، މެޓާ، އެމެޒޯން އަދި އުބާ ފަދަ ބޮޑެތި އެމެރިކާ ކުންފުނިތަކުން މި ފަންޑަށް ހަދިޔާކުރަމުންދާއިރުއެވެ.
ޖެނުއަރީ 20 ގައި ބޭއްވުމަށް ހަމަޖެހިފައިވާ ރައީސްކަމުގެ ހުވާކުރުމުގެ ރަސްމިއްޔާތަކީ ޓްރަމްޕްގެ ދެވަނަ ދައުރު ފެށިގެންދާ ރަސްމިއްޔާތެވެ.
"އަޅުގަނޑުމެންގެ ދެ ޕާޓީއަށް ތާއީދުކުރާ އާދަކާދައިގެ ދަށުން އެމެރިކާގެ ރައީސްކަމުގެ ހުވާކުރުމުގެ ކޮމިޓީތަކަށް އެހީތެރިވެދިނުމުގައި ދެމިތިބުމާމެދު އުފާކުރަން" ބޯއިންގްއިން ބުނެފައިވެއެވެ.
ބޯއިންގްއަކީ މިހާރު ރައްކާތެރިކަމާއި ފެންވަރު ބެލެހެއްޓުމުގެ ހިރާސްތަކާ ކުރިމަތިލަމުންދާ ކުންފުންޏެކެވެ. އަދި މިދިޔަ އަހަރު ހިނގި ހަޅުތާލަކުން ލިބުނު ގެއްލުމާ ވެސް އެ ކުންފުނި ކުރިމަތިލަމުންދެއެވެ.
އެއާ ފޯސް ވަން ގެ ނަމުން މަޝްހޫރު ރިޔާސީ މަތިންދާބޯޓު އުފައްދަމުންދަނީ ވެސް ބޯއިންގްއިންނެވެ. ދެ މަތިންދާބޯޓު އަންނަ އަހަރު ޚިދުމަތަށް ނެރެވޭނެ ކަމަށް ބެލެވެއެވެ. ޓްރަމްޕްގެ ފުރަތަމަ ދައުރުގައި މި މަތިންދާބޯޓުގެ އެއްބަސްވުން އަލުން ހަދަން މަޖުބޫރުކުރިއެވެ. އެއީ ފުރަތަމަ އެއްބަސްވުން އަގު ބޮޑުކަމަށް ބުނެއެވެ.
މެޓާ އަދި އެމެޒޯން ފަދަ ޓެކް ކުންފުނިތަކުގެ ފަހުން ގޫގުލް ވެސް މި ފަންޑަށް ހަދިޔާކުރިއެވެ. އަދި މި ރަސްމިއްޔާތު ދުނިޔޭގެ އެކި ކަންކޮޅުތަކަށް ދައްކާނެކަން ވެސް އިއުލާނުކޮށްފައިވެއެވެ.