ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރިކަމުގެ ތުހުމަތުވާ ބިދޭސީ ދެ އަންހެނަކު އަތުލައިގަނެ ޑީޕޯޓްކޮށްފިއެވެ.
'އެކްސް'ގައި ހިއްސާކުރި ޕޯސްޓެއްގައި މޯލްޑިވްސް އިމިގްރޭޝަނުން ބުނީ ރާއްޖޭގައި ހަށިވިއްކުމުގެ ވިޔަފާރި ކުރަމުންދާކަމަށް ތުހުމަތުކުރެވޭ ބިދޭސީންނަށް އަމާޒުކޮށް އިމިގްރޭޝަނާއި ފުލުހުން ގުޅިގެން އޮޕަރޭޝަނެއް ކުރިއަށް ގެންދިޔަ ކަމަށެވެ.
އެ އޮޕަރޭޝަންގައި ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުންދިއަ ބިދޭސީ ދެ އަންހެނަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް އިމިގްރޭޝަނުން ބުންޏެވެ.
އޭގެ ތެރެއިން އެކަކަކީ ވޯކް ވިސާގައި ރާއްޖޭގައި އުޅެމުންދިއަ މީހެއް ކަމަށާއި ދެވަނަ މީހާއަކީ ޓޫރިސްޓު ވިސާގައި ރާއްޖެ އައިސްފައިވާ މީހެއް ކަމަށް އިމިގްރޭޝަނުން ބުންޏެވެ.
އެ މައްސަލަ ތަހުގީގުކުރުމަށް ފަހު، އެ ދެ މީހުން ވެސް މިހާރު ޑީޕޯޓުކޮށްފައިވާ ކަމަށް އިމިގްރޭޝަނުން ބުންޏެވެ.
ޑީޕޯޓްކޮށްލާފައިވަނީ ވިއެޓްނާމަށް ނިސްބަތްވާ އުމުރުން 41 އަހަރުގެ އަންހެނަކާއި އުމުރުން 40 އަހަރުގެ އަންހެނެކެވެ.
ގަވައިދާ ޚިލާފަށް ރާއްޖޭގައި އުޅޭ އަދި ވިޔަފާރިކުރާ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ވަރަށް ގިނަ މަސައްކަތްތަކެއް ފާއިތުވި އަހަރު ވެސް ކޮށްފައިވެއެވެ. އެގޮތުން، ހުޅުމާލެއާއި މާލޭގައި މާސް އިންސްޕެކްޝަންތަކާއި، ރެއިޑް އޮޕަރޭޝަންތައް ހިންގާފައިވެއެވެ.
އިމިގްރޭޝަންގެ ކޮންޓްރޯލާ ޖެނެރަލް ޝައްމާން ވަހީދު މީގެ ކުރިން ވިދާޅުވި ގޮތުގައި ބިދޭސީންގެ މައްސަލަތައް ހައްލުކުރުމަށް ކުރިއަށް އޮތްތަނުގައި އަތޮޅުތެރެއަށް އޮޕަރޭޝަންތައް ފުޅާކުރާނެއެވެ. އަދި މިހާރު އެ މަސައްކަތްތައް ފަށާފައިވާކަން ވެސް ފާހަގަކުރެވެއެވެ.