ކެންޔާގެ ކްރިޕްޓޯ ގަވާއިދުތައް ދުނިޔޭގެ މިންގަނޑުތަކާ އެއްގޮތް ކުރުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް)އިން އިލްތިމާސްކޮށްފިއެވެ.
ކެންޔާގެ ކެޕިޓަލް މާކެޓްސް އޮތޯރިޓީ (ސީއެމްއޭ)ގެ އިސްވެރިން ވަނީ، ކްރިޕްޓޯ ސިނާއަތަށް ބޭނުންވާ ގަވާއިދުތަކާއި ގޮންޖެހުންތަކާ ބެހޭގޮތުން އައިއެމްއެފްގެ ލަފާ ހޯދައިފައެވެ. މިކަމާ ގުޅިގެން އައިއެމްއެފްގެ މަނިޓަރީ އެންޑް ކެޕިޓަލް މާކެޓްސް ޑިޕާޓްމަންޓް (އެމްސީއެމް) އަދި ލީގަލް ޑިޕާޓްމަންޓް (އެލްއީޖީ)ގެ މަންދޫބުން ވަނީ ނައިރޯބީއަށް ޒިޔާރަތްކޮށް ހާލަތު ވަޒަންކޮށްފައެވެ.
އައިއެމްއެފުން މިމަހުގެ އަށެއްގައި ނެރުނު 43 ސަފުހާގެ ފަންނީ އެހީތެރިކަމުގެ ރިޕޯޓުގައި ކެންޔާގެ ކްރިޕްޓޯ ދާއިރާގެ ރައްކާތެރިކަމާއި ގަވާއިދުތައް ހަރުދަނާކުރުމަށް ކުރެވިދާނެ ކަންތައްތަކެއް ފާހަގަކޮށްފައިވެއެވެ.
އައިއެމްއެފްގެ ރިޕޯޓުގައި ފާހަގަކޮށްފައިވާ ގޮތުގައި ކެންޔާގައި ކްރިޕްޓޯއާ ގުޅުންހުރި ހަރަކާތްތައް ބެލެހެއްޓުމަށް މިވަގުތު ސާފު ގަވާއިދުތަކެއް ނެތެވެ. މި ގަވާއިދުތައް ނެތުމުގެ ސަބަބުން ކްރިޕްޓޯކަރަންސީ، ގާނޫނާ ޚިލާފު ކަންކަމަށް ބޭނުންކުރަމުންދާކަން އައިއެމްއެފުން ފާހަގަކޮށްފައިވެއެވެ.
މިކަން ހައްލުކުރުމަށްޓަކައި، ފައިނޭންޝަލް ސްޓެބިލިޓީ ބޯޑުގެ ގްލޯބަލް ރެގިއުލޭޓަރީ ފްރޭމްވޯކް ފޯ ކްރިޕްޓޯ އަދި އައިއޯއެސްކޯގެ ޕޮލިސީ ރެކޮމެންޑޭޝަންސް ފޯ ޑިޖިޓަލް އެސެޓް މާކެޓްސް ފަދަ ބައިނަލްއަގުވާމީ އުސޫލުތައް ދިރާސާކުރުމަށް ކެންޔާއަށް ލަފާދީފައިވެއެވެ. މީގެ އިތުރުން، ކްރިޕްޓޯކަރަންސީ ނަހަމަގޮތުގައި ބޭނުންކުރުން ހުއްޓުވުމަށްޓަކައި މަނީ ލޯންޑަރިން އަދި ޓެރަރިޒަމްގެ ފައިނޭންސިން ހުއްޓުވުމުގެ ހަރުދަނާ ފިޔަވަޅުތައް ތަންފީޒުކުރަން ޖެހޭކަމަށް ބުނެފައިވެއެވެ.
މިދިޔަ އަހަރުގެ ފެބްރުއަރީ މަހު، އައިއެމްއެފުން ވަނީ ކެންޔާގެ ކްރިޕްޓޯ ހަރަކާތްތަކާއި ގާނޫނީ އޮނިގަނޑުގެ ދިރާސާއެއް ހަދާފައެވެ. މި މުއްދަތުގައި، އައިއެމްއެފްގެ އިސްވެރިން ކެންޔާގެ އިސްފަރާތްތަކާއެކު، ކްރިޕްޓޯ ސިނާއަތް އެކަށީގެންވާ ގޮތެއްގައި ބެލެހެއްޓުމަށް ބޭނުންވާ މައިގަނޑު ގަވާއިދުތަކާއި ގާނޫނީ އުސޫލުތަކާ ބެހޭގޮތުން މަޝްވަރާކުރިއެވެ.
ދެހާސް ތޭވީހުގެ ފައިނޭންސް އެކްޓްގެ ދަށުން، ކެންޔާގައި ކްރިޕްޓޯ އާމްދަނީއަށް ޓެކްސް ނަގައެވެ. މި ގާނޫނުގެ ދަށުން، ޑިޖިޓަލް އެސެޓް ޓެކްސް (ޑީއޭޓީ)ގެ ނަމުގައި ޑިޖިޓަލް އެސެޓް ބަދަލުކުރުމާއި އެކްސްޗޭންޖްކުރުމަށް ތިން އިންސައްތަ ނަގައެވެ. މިދިޔަ ނޮވެންބަރު މަހު، ކެންޔާ ރެވެނިއު އޮތޯރިޓީ (ކޭއާރްއޭ)އިން ބުނި ގޮތުގައި 2023-24ގެ މާލީ އަހަރުގައި ވާސްޕްތަކުން 10 ބިލިއަން ޝިލިންސް (ގާތްގަނޑަކަށް 77.3 މިލިއަން ޑޮލަރު) ލިބިފައިވެއެވެ.
ދެހާސް ބާވީސް ވަނަ އަހަރުގެ އދ.ގެ ރިޕޯޓެއްގައި ވާގޮތުން އެފްރިކާގައި އެންމެ ގިނަ ކްރިޕްޓޯ ބޭނުންކުރާ މީހުން ތިބީ ކެންޔާގައެވެ. އެ އަހަރު ކެންޔާގައި ކްރިޕްޓޯ ބޭނުންކުރާ ހަތަރު މިލިއަނަށް ވުރެ ގިނަ މީހުން ތިބިކަމަށް ވެއެވެ.
އައިއެމްއެފުން ލަފާދީފައިވަނީ ކެންޔާގެ އިތުރުވަމުންދާ ކްރިޕްޓޯ އާބާދީ އޮޅުވާލުންތަކާއި، ނާޖާއިޒު ފައިދާ ނެގުމާއި، މާލީ ގެއްލުންތަކުން ރައްކާތެރިކުރުމަށް ފުރިހަމަ ކްރިޕްޓޯ ގަވާއިދުތަކެއް އެކުލަވާލުމަށެވެ.