ރާއްޖޭގައި މަރުވި ނޭޕާލް އަންހެނެއްގެ ހަށިގަނޑާ ހަވާލުވާނެ މީހަކު ނެތިގެން، ހަށިގަނޑު މޯޗަރީގައި އޮންނަތާ 28 ދުވަސްފަހުން، ހަށިގަނޑު އެ ގައުމަށް ފޮނުވާލައިފިއެވެ.
އެނގިފައިވާ ގޮތުގައި މި އަންހެން މީހާ، ބަނޑުގައި ރިއްސާތީ މިދިޔަ ޑިސެމްބަރު މަހު އައިޖީއެމްއެޗަށް ގެންދިޔައެވެ. އަދި އޭނާ ވަނީ ޑިސެމްބަރު މަހުގެ ނުވަ ވަނަ ދުވަހު މަރުވެފައެވެ.
އޭނާގެ ހަށިގަނޑާ ހަވާލުވާނެ މީހަކު ނެތި ގާތްގަނޑަކަށް މަސްދުވަސް ވަންދެން މޯޗަރީގައި އޮތެވެ.
ފުލުހުން މިއަދު ބުނީ، އޭނާގެ ހަށިގަނޑު ނޭޕާލަށް ފޮނުވާލައިފައިވަނީ މިދިޔަ އަންގާރަ ދުވަހު ކަމަށެވެ.
އެ އަންހެން މީހާ ކުއްލި ގޮތަކަށް މަރުވުމުން، އޭނާގެ ހަށިގަނޑު މޯޗަރީއަށް ގެންދިޔައީ ފުލުހުންނެވެ.
އެނގިފައިވާ ގޮތުގައި އޭނާއަކީ މާލޭގެ ކެފޭއެއްގައި ވޭޓަރަކަށް އުޅުނު މީހެކެވެ.