ބޮލީވުޑްގެ ފިލްމީ ތަރިން ކަމަށްވާ އަލީ ފަޒަލާއި ރިޗާ ޗައްދާގެ އަލަތު ދަރިފުޅުގެ ފޮޓޯ ނެގުމުގެ ފުރުސަތު އެއްވެސް ގޮތަކަށް މީޑިއާއަށް ދޭން ބޭނުންނުވާ ކަމަށް މި ދެމަފިރިން ބުނެފިއެވެ.
ދާދިފަހުން އަލީއާއި ރިޗާ ވަނީ ފުރަތަމަ ފަހަރަށް ދަރިފުޅާ ވަކިން މުމްބާއީން ބޭރަށް ފިލްމީ މަސައްކަތަކާ ގުޅޭގޮތުން ދަތުރެއް ކޮށްފައެވެ.
ދިއްލީއަށް ކުރި ދަތުރުގައި އަލަތު ދަރިފުޅު ޒުނޭރާ އިދާ އަލީ ގެންދަން ކުރިން ރޭވި ނަމަވެސް ދިއްލީގެ ވައި ނުސާފުވެ މޫސުމް ގޯސްވުމުގެ ސަބަބުން ދެމަފިރިން ނިންމީ ދަރިފުޅު މުމްބާއީގައި އެ މީހުންގެ މައިންބަފައިންގެ ބެލުމުގެ ދަށުގައި ބަހައްޓާށެވެ.
އަލީ ފަޒަލް އަދި ރިޗާ ޗައްދާ ދަރިފުޅާ އެކު--ފޮޓޯ/ބޮލީވުޑްހަންގާމާ
މިދިޔަ އަހަރުގެ ޖުލައި މަހު ރިޗާ މަންމައަކަށްވި ޚަބަރު ސޯޝަލް މީޑިއާގައި ހިއްސާކުރިއިރު ވެސް މިހާތަނަށް ދަރިފުޅުގެ މޫނު ފެންނަ ފޮޓޯއެއް އެއްވެސް ވަރަކަށް އާންމުކޮށްފައެއް ނުވެއެވެ. މި ކަމާ ގުޅޭގޮތުން ސުވާލުކުރުމުން އަލީ ބުނެފައިވަނީ، ދެމަފިރިން ވެސް ނިންމާފައިވަނީ ދަރިފުޅު ޒުނޭރާގެ ފޮޓޯ އާންމުނުކުރަން ކަމަށެވެ.
ދަރިފުޅުގެ ފޮޓޯ ނެގުމުގެ ފުރުސަތު އެއްވެސް ފަރާތަކަށް ޚާއްސަކޮށް މީޑިއާތަކަށް ދޭން ބޭނުންނުވާ ކަމަށާއި އާއްމުންގެ ސަމާލުކަން ހޯދާ ވަރަށް ވުރެ ދަރިފުޅު އަދި މާ ތުއްތު ކަމަށް އަލީ ވަނީ ބުނެފައެވެ. ދަރިފުޅުގެ ފޮޓޯ ނެގުމާ ދެކޮޅަށް ދެމަފިރިން ނިންމި ނިންމުން ބަދަލުވާނެ ދުވަހެއް ނޭނގޭ ކަމަށާއި މި ވަގުތު އިހަށް ބޭނުންވަނީ މީޑިއާތަކާ ވީހާވެސް ދުރުން ދަރިފުޅު ގެންގުޅެން ކަމަށް ދެމަފިރިން ވަނީ ބުނެފައެވެ.
މި ފަހަކަށް އައިސް ފިލްމީ ތަރިންގެ ކުދިންނަށް މީޑިއާއިން ދޭ ސަމާލުކަން އިތުރުވެފައިވާއިރު މިއީ އިންޑިއާގެ ވަރަށް ގިނަ ފިލްމީތަރިންގެ ތެރެއިން މަންމައިންނަށް ވެފައިވާ ބަތަލާއިންނަށް ދިމާވެފައިވާ ވަރަށް ބޮޑު ގޮންޖެހުމެކެވެ.
ދާދި ފަހުން ކުދިން ލިބިފައިވާ ބަތަލާއިންގެ ތެރެއިން ބަތަލާ ރާނީ މުކަރުޖީ، އަނުޝްކާ ޝަރުމާ، ސޯނަމް ކަޕޫރު، ދީޕިކާ ޕަދުކޯން އަދި ނެހާ ދޫޕިއާ ފަދަ ބަތަލާއިން ވަނީ އެ މީހުންގެ ކުދިންގެ ފޮޓޯތައް ނުނެގުމަށް މީޑިއާ ރިޕޯޓަރުން ގާތު އެދިފައެވެ.