ބޮލީވުޑްގެ މަގުބޫލު އެކްޓަރު އާމިރު ޚާން ޝަރުތެއްގެ މަތިން ސިނގިރޭޓާ ދުރަށް ޖެހި ދުންފަތުގެ އިސްތިއުމާލުކުރުން ހުއްޓާލާނެ ކަމަށް ބުނެފައިވާ ކަމުގައި އިންޑިއާގެ މީޑިއާތަކުން ބުނެފިއެވެ.
ފިލްމީ ޚަބަރުތައް ގެނެސްދޭ ޕިންކްވިލާއާ ހަވާލާދީ މީޑިއާތަކުން ބުނެފައިވަނީ ދަރިފުޅު ޖުނައިދު ޚާންގެ ދެވަނަ ފިލްމު "ލަވްޔާޕާ" ބޮކްސް އޮފީހުގައި ކާމިޔާބުކަމާ އެކު ހިނގައިފިނަމަ ސިނގިރޭޓް ބުއިން ހުއްޓާލާނެ ކަމަށް އާމިރު ޝަރުތުކޮށް ނިޔަތް ކަނޑައަޅާފައިވާ ކަމަށެވެ.
މި ފިލްމާ ބެހޭގޮތުން މީޑިއާއަށް ދިން އިންޓަވިއުއެއްގައި އާމިރު ބުނެފައިވަނީ ފިލްމުގެ ބައެއް މަންޒަރުތައް އާމިރު ބަލާފައިވާ ކަމަށެވެ. ފިލްމު "ލަވްޔާޕާ"އަކީ ބެލުންތެރިން ވަރަށް ބޮޑަށް މުނިފޫހިފިލުވައިދޭނެ ފިލްމެއް ކަމަށާއި މޮބައިލް ފޯނު ތަޢާރަފުވުމާ ގުޅިގެން ދިރިއުޅުމަށް އައިސްފައިވާ ބޮޑެތި ބަދަލުތައް ވަރަށް ޝައުގުވެރިކަމާ އެކު ފިލްމުން ދައްކުވައިދީފައިވާ ކަމަށް އާމިރު ވަނީ ބުނެފައެވެ.
ފިލްމު "ލަވްޔާޕާ"ގެ މަންޒަރެއްގައި ޖުނައިދު އަދި ޚުޝީ--ފޮޓޯ/ޕިންކްވިލާ
ޖުނައިދު ޚާންގެ އިތުރުން ޒުވާން ބަތަލާ ޚުޝީ ކަޕޫރު ވެސް ފިލްމުގައި ދައްކުވައިދީފައިވާ އެކްޓިންއަށް ތައުރީފުކުރަމުން އާމިރު ބުނެފައިވަނީ އޭނާއަށް މި ފިލްމު ވަރަށް ކަމުދިޔަ ކަމަށެވެ.
ފިލްމުގެ ބައެއް މަންޒަރުތަކުން ޚުޝީ ފެނުމުން ކުރީގެ ބަތަލާ އަދި ޚުޝީގެ މަންމަ ސްރީދޭވީގެ ހަނދާން ވަރަށް ބޮޑަށް އާ ކުރުވި ކަމަށާއި ހީވީ ސްކްރީނުން ސްރީދޭވީ ފެންނަހެން ކަމަށް އާމިރު ބުނެފައިވެއެވެ. ސްރީދޭވީގެ ކިބައިން ފެންނަ އެނަޖީއާއި ވައްޓަފާޅި ޚުޝީގެ ފަރާތުން ފެނުމުން ވަރަށް އުފާވެރި އިހުސާސެއް ކުރުވި ކަމަށް އާމިރު ވަނީ ބުނެފައެވެ.
ފިލްމު "ލަވްޔާޕާ"އަށް ލިބޭ ކާމިޔާބީގެ މައްޗަށް ބަރޯސާވެގެން ނަމަވެސް އާމިރު ދުންފަތާ ދުރަށް ދިއުމަކީ އެކްޓަރަށް ސަޕޯޓުކުރާ ގިނަ ބަޔަކަށް ލިބޭނެ ވަރަށް ބޮޑު އުފަލެއް ކަމަށް މީޑިއާތަކުން ވަނީ ބުނެފައެވެ. ފިލްމު "ލަވްޔާޕާ" ސިނަމާތަކަށް ގެންނަން ތާވަލުކުރެވިފައިވަނީ އަންނަ މަހުގެ ހަތްވަނަ ދުވަހެވެ.