އެކި ފަހަރުމަތިން ރިލީޒްކުރާނެ ތާރީޚުތައް ކަނޑައެޅި, ދިމާވި އެކި ސަބަބުތަކާ ގުޅިގެން ސިނަމާތަކަށް ނުގެނެވި އޮތް ބަތަލާ ކަންގަނާގެ ފިލްމު "އިމަޖެންސީ" މި މަހުގެ 17ގައި ސިނަމާތަކަށް ގެންނާނެކަން އިއުލާނުކޮށްފިއެވެ.
އިންޑިއާގެ ކުރީގެ ބޮޑުވަޒީރު އިންދިރާ ގާނދީގެ ރޯލް ކަންގަނާ ކުޅެފައިވާ ފިލްމު "އިމަޖެންސީ" އަކީ އިންދިރާ ގާނދީގެ ވެރިކަމުގައި އެ ޤައުމުގެ ސިޔާސީ މަސްރަހު ހޫނުވެ ކުއްލި ހާލަތު އިއުލާނު ކުރުމާ ގުޅިގެން އެ ދުވަސްވަރު އިންޑިއާގެ މަސްރަހު އޮތްގޮތުގެ މައްޗަށް ބިނާކޮށް އުފައްދާ ތާރީޚީ, ސިޔާސީ ފިލްމެކެވެ.
ޒީ ސްޓޫޑިއޯ ގުޅިގެން އުފައްދާފައިވާ ފިލްމު "އިމަޖެންސީ" އަކީ ކަންގަނާ ޑައިރެކްޓަރެއްގެ ގޮތުގައި މަސައްކަތް ކުރާ ދެވަނަ ފިލްމެވެ. ކަންގަނާ އެންމެ ފުރަތަމަ ޑައިރެކްޓަރެއްގެ ގޮތުގައި މަސައްކަތް ކޮށްފައި ވަނީ ވެސް އިންޑިއާގެ ތާރީޚާ ގުޅުވައިގެން އުފެއްދި ފިލްމު "މަނިކަރުނިކާ: ދަ ކުއީން އޮފް ޖާންސީ" ކިޔާ ފިލްމެއްގައެވެ.
ފިލްމު "އިމަޖެންސީ"ގެ ޕޯސްޓަރެއްގައި ފިލްމުގެ ބައެއް ކާސްޓުން--ފޮޓޯ/އިންޑިއަންއެކސްޕްރެސް
މިދިޔަ އަހަރުގެ ސެޕްޓެމްބަރު މަހު ފިލްމު ރިލީޒް ކުރާނެކަން އިއުލާނުކުރި ނަމަވެސް އިންޑިއާގެ ސެންސަރު ބޯޑުން ފިލްމު ފާސްނުކުރުމާ ގުޅިގެން "އިމަޖެންސީ" ރިލީޒް ކުރުން ފަސްކުރެވުނެވެ. މިކަމާ ގުޅިގެން ބަތަލާ ކަންގަނާ ވަނީ ސެންސަރު ބޯޑުގެ މެމްބަރުންނަށާއި ފިލްމު އިންޑަސްޓްރީގެ ގިނަ ބަޔަކަށް ވެސް އޭރު ފާޑުކިޔާފައެވެ. ފިލްމު "އިމަޖެންސީ" ރިލީޒް ކުރަން ނިންމި އާ ތާރީޚާ އެކު ކަންގަނާ ވަނީ މި ފިލްމުގެ އާ ޓްރެއިލާއެއް ވެސް ބެލުންތެރިންނަށް ގެނެސްދީފައެވެ.
ކަންގަނާގެ މި ބައޮގްރަފިކަލް ޕޮލިޓިކަލް ޑްރާމާގެ މުހިއްމު ތަރިންގެތެރޭ އަނޫޕަމް ޚޭރު، މިލިންދު ސޯނަމް، ޝްރެޔަސް ތަލްޕަޅޭ އަދި މަހިމާ ޗައުދަރީ ހިމެނެއެވެ. ފިލްމު "އިމަޖެންސީ"ގެ ޓްރެއިލާއަށް މިހާތަނަށް ލިބިފައިވާ ރިވިއުސްތަކަށް ބަލާއިރު ގިނަ ބަޔަކު ބުނެފައި ވަނީ ބަތަލާ ކަންގަނާ އަކީ އޭނާގެ ހުނަރުން ބެލުންތެރިން މާޔޫސް ނުކުރާނެ ފިލްމީ ތަރިއެއް ކަމަށެވެ. ނަމަވެސް ފިލްމުން ބޮކްސް އޮފީހުގައި ނަތީޖާ ނެރެވޭނެ ގޮތަކާ ދޭތެރޭ އެއްޗެއް ބުނަން ދަތި ކަމަށް ބައެއް ބެލުންތެރިން ވަނީ ބުނެފައެވެ.