އާބާދީއަށް ނުބަލައި، ހުރިހާ ރަށަކަށް ވެސް ބޭނުންވާ މަޝްރޫއުތައް މި އަހަރު ފައްޓަވައިދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ހުވަދުއަތޮޅަށް އެ މަނިކުފާނު މިހާރު ކުރައްވާ ދަތުރުފުޅުގެ ތެރެއިން މިއަދު ހެނދުނު ގދ. ރަތަފަންދުއަށް ވަޑައިގެން ރަށުގެ ރައްޔިތުންނާ މުޚާތަބުކުރައްވާ ވިދާޅުވީ، ސަރުކާރުގެ ވިސްނުމަކީ އަދި ސިޔާސަތަކީ ވެސް ކުޑަ ރަށެއް ބޮޑު ރަށެއް ނުބަލައި، ހަމަހަމަކަމާ އެކު ޚިދުމަތްތައް ދިނުން ކަމަށެވެ.
އެގޮތުން، ރަތަފަންދުއަށް ވެސް ބޭނުންވަނީ އެންމެ އާބާދީ ބޮޑެތި ރަށްތަކަށް ވެސް ބޭނުންވާ ކަންކަން ކަމަށް އެ މަނިކުފާނު ވިދާޅުވިއެވެ.
މީގެ ކުރިން އެކި ސަބަބުތަކާ ހުރެ އެ ރަށަށް ބޭނުންވާ ގިނަ މަޝްރޫއުތަކެއް މަޑުޖެހިފައިވާކަން ރައީސް ފާހަގަކުރެއްވިއެވެ. އެ މަޝްރޫއުތައް މި އަހަރު ތެރޭ ފައްޓަވައިދެއްވާ އަމަލީ ސިފައެއް ގެނެސްދެއްވާނެކަމުގެ ޔަގީންކަން ރައީސް ވަނީ ރަތަފަންދޫގެ ރައްޔިތުންނަށް ދެއްވައިފައެވެ.
"މި އަހަރުގެ ބަޖެޓުގެ ތެރެއިން އަޅުގަނޑުމެން ބަލާނީ ވީހާ ވެސް ގިނަ ވައުދުތަކަކަށް އަމަލީ ސިފަ ގެނެސްދިނުމަށް އަމަލީ ގޮތުން މަސައްކަތް ފެށުމަށް. މި އަންނަ އަހަރު، އެގޮތަށް ނުފެށި ހުރި މަޝްރޫއުތައް ފަށާނެ. އެހެންވީމާ މި ދެ އަހަރު ތެރޭގައި މިގޮތަށް ރަށްރަށުގައި ކުރަންޖެހިފައިހުރި ކަންކަން އަމަލީ ގޮތުން އަޅުގަނޑުމެން ހަމަ ހަގީގަތުގައި ވެސް ފަށައިދޭނަން،" އެ މަނިކުފާނު ވިދާޅުވިއެވެ.
ރައީސް މުއިއްޒު ރަތަފަންދުއަށް ވަޑައިގެން ރައްޔިތުންނާ ބައްދަލުކުރައްވަނީ -- ފޮޓޯ/ ރައީސް އޮފީސް
ރަތަފަންދޫ ކައުންސިލްގެ އިމާރާތުގެ ހާލަތު ދަށްކަން ފާހަގަކުރައްވާ ރައީސް ވިދާޅުވީ، 50 އެތައް ރަށެއްގައި ކައުންސިލްގެ އިމާރާތްތައް އެޅުމަށް މިހާރު ބަޔަކާ ހަވާލުކޮށްފައިވާއިރު އޭގެ ތެރޭގައި އެ ރަށް ވެސް ހިމެނޭ ކަމަށެވެ. ރަށުގެ ރައްޔިތުން އެންމެ ބޭނުންވާ ފަދައިން މި އަހަރު ތެރޭ ބަނދަރު ވެސް ހައްދަވައިދެއްވާނެ ކަމަށް އެ މަނިކުފާނު ވިދާޅުވިއެވެ.
ވަކިން ޚާއްސަކޮށް ޒުވާނުންނަށް ވޮލީ ކޯޓަކާއި، ޔޫތު ސެންޓަރެއްގެ އިތުރުން ޖިމެއް ވެސް ގާއިމުކޮށްދެއްވާނެ ކަމަށް ރައީސް ވިދާޅުވިއެވެ. އެންމެ އިސްކަމެއްދޭ ކަމެއްގެ ގޮތުގައި ރަށުގެ ސިއްޙީ މަރުކަޒު އިމާރާތުގެ ގޮތުންނާއި، މުވައްޒަފުންގެ ގޮތުން އަދި ވަސީލަތުގެ ގޮތުން ވެސް ރަނގަޅު ފެންވަރަކަށް ތަރައްގީކޮށްދެއްވާނެ ކަމަށް އެ މަނިކުފާނު ވިދާޅުވިއެވެ.
ރައީސް ވިދާޅުވީ، ރަތަފަންދޫ ސްކޫލުގައި މަލްޓިޕާޕަސް ހޯލެއް ގާއިމުކޮށްދީ، ހުއްޓިފައިވާ ރަށުގެ ފެނާއި ނަރުދަމާގެ މަސައްކަތް ވެސް މި އަހަރު ފައްޓަވައިދެއްވާނެ ކަމަށެވެ. އެކަން ކުރުމަށްޓަކައި ފިނޭންސް މިނިސްޓްރީގެ ތެރެއިން ފައިސާ ހަމަޖައްސަމުންދާ ކަމަށް ވެސް އެ މަނިކުފާނު ވިދާޅުވިއެވެ.
[ރަތަފަންދުއަކީ] ފަޚުރުވެރި އާއިލާތަކެއްގެ މައްޗަށް ނިސްބަތްވާ ރަށެއް. މި ރަށުގެ ތައުލީމަށް ދޭންޖެހޭ އިސްކަން، މި ރަށުގެ ދުޅަހެޔޮކަމަށް ދޭންޖެހޭ އިސްކަން، މި ރަށުގެ އިޖުތިމާއީ ހަމަހަމަކަމަށް، ކުރިއެރުމަށް ދޭންޖެހޭ ސަމާލުކަން އަޅުގަނޑުމެން ދޭނަން، ރައީސް ޑރ. މުހައްމަދު މުއިއްޒު
ރައީސް މުއިއްޒު ރަތަފަންދުއަށް ވަޑައިގެން ރައްޔިތުންނާ ބައްދަލުކުރައްވަނީ -- ފޮޓޯ/ ރައީސް އޮފީސް
ތިން ދުވަހުގެ މުއްދަތަށް ކުރައްވާ މި ދަތުރުފުޅުގައި ހުވަދުއަތޮޅު ދެކުނުބުރީގެ ފަސް ރަށަކަށާއި، ހުވަދުއަތޮޅު އުތުރުބުރީގެ ހަތަރު ރަށަކަށް ރައީސް ވަޑައިގެންނެވުމަށް ވަނީ ހަމަޖެހިފައެވެ. އެގޮތުން، ހުވަދުއަތޮޅު ދެކުނުބުރިން އެމަނިކުފާނު އިއްޔެ ވަނީ ހޯނޑެއްދޫ، ނަޑެއްލާ، ވާދޫ، ފިޔޯރީއަށް ވަޑައިގެންފައެވެ. ހުވަދުއަތޮޅު އުތުރުބުރީން އެ މަނިކުފާނުގެ މި ދަތުރުފުޅުގައި ވަޑައިގެންނެވުމަށް ހަމަޖެހިފައި ވަނީ ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށެވެ.
މި ދަތުރުފުޅުގައި އެ މަނިކުފާނުގެ އަރިހުގައި ވަޒީރުންނާއި ސަރުކާރުގެ ބައެއް އިސްވެރިން ބައިވެރިވެވަޑައިގަންނަވައެވެ. ރައީސް ހުވަދުއަތޮޅުގެ ބައެއް ރަށްރަށަށް ކުރައްވާ މި ދަތުރުފުޅު ނިންމަވާލައްވައި، މާލެ ވަޑައިގެންނެވުމަށް ހަމަޖެހިފައިވަނީ މާދަމާއެވެ.