ދުނިޔޭގެ ދެވަނައަށް އެންމެ އަގު ބޮޑު އިލެކްޓްރޯނިކްސް ކުންފުނި، އެންވީޑިއާއިން އާ ޗިޕްތަކެއް ތައާރަފުކޮށް، ޖަޕާނުގެ ޓޮޔޯޓާ މޯޓާ ކޯޕަރޭޝަނާ އެކު އެއްބަސްވުމެއްގައި ސޮއިކޮށްފިއެވެ.
ލާސް ވޭގާސްގައި ހިނގަމުންދާ ސީއީއެސް 2025 ގައި އެންވީޑިއާގެ ސީއީއޯ ޖެންސެން ހުއަން ވިދާޅުވި ގޮތުގައި މި އެއްބަސްވުމުގެ ދަށުން ޓޮޔޯޓާގެ ކާރުތަކުގައި އެ ކުންފުނީގެ އޮރިން ޗިޕްތަކާއި އޮޓޮމޯޓިވް އޮޕަރޭޓިން ސިސްޓަމް ބޭނުންކުރާނެއެވެ. މީގެ އިތުރުން، އާޓިފިޝަލް އިންޓެލިޖެންސް ބޭނުންކޮށްގެން ރޮބޯޓްތަކާއި އޮޓޯނޮމަސް ކާރުތައް ތަމުރީނުކުރަން ބޭނުންކުރާނެ އާ ޓެކްނޮލޮޖީއެއް ކަމަށްވާ "ކޮސްމޮސް" ވެސް ތައާރަފުކޮށްފައިވެއެވެ.
"ކޮސްމޮސް ފައުންޑޭޝަން މޮޑެލްސް"އަކީ ރޮބޯޓްތަކާއި ސެލްފް ޑްރައިވިން ކާރުތައް ތަމުރީނުކުރަން ބޭނުންވާ ޑޭޓާ އުފައްދަން ބޭނުންކުރާ ޓެކްނޮލޮޖީއެކެވެ. އެންޓާޕްރައިސް އޭއައި ދާއިރާއަށް މެޓާގެ 'ލަމާ 3' ގެނެސްދިން ކުރިއެރުން ރޮބޯޓިކްސް އަދި އިންޑަސްޓްރިއަލް އޭއައިއަށް މި ޓެކްނޮލޮޖީން ގެނެސްދޭނެ ކަމަށް ހުއަންގް ވިދާޅުވިއެވެ.
ގޭމިން ދާއިރާއަށް އަމާޒުކޮށް، އެންވީޑިއާއިން ވަނީ އާރްޓީއެކްސް 50 ސީރީޒްގެ ޗިޕްތައް ވެސް ތައާރަފުކޮށްފައެވެ. އެންމެ ކުޑަކޮށް 549 ޑޮލަރުން ފެށިގެން 1,999 ޑޮލަރަށް ވިއްކާ މި ޗިޕްތަކުގައި ބްލެކްވެލް އޭއައި ޓެކްނޮލޮޖީ ބޭނުންކޮށްފައިވެއެވެ. މި ޗިޕްތަކުގެ ސަބަބުން ވީޑިއޯ ގޭމްތަކުގައި ފެންނަ އިމޭޖްތައް އިތުރަށް ރިއަލިސްޓިކް ވެގެންދާނެ ކަމަށް ބެލެވެއެވެ.
ކޮމްޕިއުޓާ ޕްރޮގްރާމަރުންނަށް އަމާޒުކޮށް އެ ކުންފުނީގެ ފުރަތަމަ ޑެސްޓޮޕް ކޮމްޕިއުޓަރު "ޕްރޮޖެކްޓް ޑިޖިޓްސް" ވެސް ތައާރަފުކޮށްފައިވާއިރު، މީގެ އަގަކީ 3,000 ޑޮލަރެވެ. މާޗު މަހުން ފެށިގެން މާކެޓަށް ނެރޭނެ މި ކޮމްޕިއުޓަރުގައި ހުންނާނީ އެޕަލްއަށް ފަހު ދުނިޔޭގެ ދެވަނައަށް އެންމެ އަގު ބޮޑު ކުންފުނީގެ ގޮތުގައި ލިސްޓް ކުރެވިފައިވާ ކުންފުނި އެންވީޑިއާގެ އަމިއްލަ އޮޕަރޭޓިން ސިސްޓަމެކެވެ.
ސީއީއެސް 2025 ގައި މި ކަންކަން އިއުލާނުކުރުމާ ގުޅިގެން އެންވީޑިއާގެ ޙިއްޞާގެ އަގު ވަނީ ރިކޯޑު އަގެއް ކަމަށްވާ 149.43 ޑޮލަރަށް އަރާފައެވެ. މިއާ އެކު ކުންފުނީގެ މާކެޓް ވެލިއު ވަނީ 3.66 ޓްރިލިއަން ޑޮލަރަށް އަރާފައެވެ. އަދި، 2026 ވަނަ އަހަރު ކުންފުނީގެ އޮޓޮމޯޓިވް ހާޑްވެއާ އަދި ސޮފްޓްވެއާގެ އާމްދަނީ ފަސް ބިލިއަން ޑޮލަރަށް އަރާނެ ކަމަށް ލަފާކުރެވެއެވެ.