ގުއަންޓަނާމޯ ބޭގައި ހުންނަ އެމެރިކާގެ އަސްކަރީ ޖަލުން ޔަމަނުގެ 11 މީހަކު އޮމާނަށް ބަދަލުކޮށްފިއެވެ.
މި ފިޔަވަޅާ އެކު ކިއުބާގެ ޖަލުގައި ބަންދުކޮށްފައި މިހާރު ތިބީ 15 މީހުންނެވެ. މިއީ އެ ޖަލުގައި މިހާތަނަށް ބަންދުކޮށްފައިވާ އެންމެ މަދު އަދަދެވެ.
ޑިޕާޓްމަންޓް އޮފް ޑިފެންސްއިން ނެރުނު ބަޔާނެއްގައި ވަނީ އެމެރިކާއިން އެ ޖަލުގައި ބަންދުކުރާ މީހުންގެ އަދަދު މަދުކޮށް އެ ތަން ބަންދުކުރަން ފޯކަސްކޮށްގެން ކުރާ މަސައްކަތަށް ތާއީދުކުރާތީ އޮމާނަށް ޝުކުރު އަދާކޮށްފައެވެ.
ކުރިން 2008 ވަނަ އަހަރުގެ ސެޕްޓެމްބަރު 11 ވަނަ ދުވަހު އެމެރިކާއަށް ދިން ޓެރަރިސްޓް ހަމަލާތަކަށް ފަހު ހައްޔަރުކޮށް ބަންދުކުރި އެއްވެސް މީހަކަށް މިހާތަނަށް އެއްވެސް ދައުވާއެއް އުފުލާފައެއްނުވެއެވެ. އެ މީހުން އެ ޖަލުގައި ތިބޭތާ މިހާރު 20 އަހަރަށްވުރެ ގިނަ ދުވަސްވެއްޖެއެވެ.
ގައިދީން އޮމާނަށް ބަދަލުކޮށްފައިވަނީ މަރުގެ އަދަބުން ސަލާމަތްވުމަށް ސެޕްޓެމްބަރު 11 ގެ ހަމަލާގެ މޭސްތިރި ކަމަށްވާ ޚާލިދު ޝައިޚް މަހުމޫދު ކުށަށް އިއުތިރާފުވާން ހަމަޖެހިފައިވާތާ ކުޑަ ދުވަސްކޮޅެއް ކުރިންނެވެ. މިއީ އެމެރިކާގެ ރައީސް ޖޯ ބައިޑަންގެ ވެރިކަމުގައި އެއް ފަހަރާ އެއް ގައުމަކަށް މިހާ ގިނަ އަދަދެއްގެ ގައިދީން ފޮނުވި ފުރަތަމަ ފަހަރެވެ.
ޑިފެންސް ޑިޕާޓްމަންޓުން ބުނީ، ބާކީ ތިބި 15 މީހުންގެ ތެރެއިން އިތުރު ތިން މީހުން ބަދަލުވުމުގެ ޝަރުތު ހަމަވާ ކަމަށެވެ.
އަސްކަރީ ޖަލަކީ ކިއުބާގެ އިރުދެކުނު ސަރަހައްދުގައި ހުންނަ އެމެރިކާގެ ނޭވަލް ބޭސް ކޮމްޕްލެކްސްއެއްގެ ބައެކެވެ. އެއީ، 9/11 ގެ ހަމަލާތަކަށް ފަހު 2002 ވަނަ އަހަރު ޖޯޖް ބުޝްގެ ވެރިކަމުގައި އުފެއްދީ ޓެރަރިޒަމާ ދެކޮޅަށް ހިންގާ އޮޕަރޭޝަންތަކުގައި އަތުލައިގަނެފައިވާ މީހުން ހައްޔަރުކުރާ ތަނެކެވެ. އެ ޖަލުގައި އެއް ފަހަރާ 800 މީހުން ވެސް ބަންދުކޮށްފައި ތިއްބެވެ.
ބަންދުގައި ތިބި މީހުންނާ މެދު އަމަލުކުރާ ގޮތާއި ދައުވާނުކޮށް އެ މީހުން ބަންދުކޮށްފައި ތިބި މުއްދަތާ މެދު ޚިޔާލުތަފާތުވުންތައް އުފެދިފައިވެއެވެ.
އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގައި އެ މަނިކުފާނު ވަނީ ޖަލު ބަންދު ކުރައްވާނެ ކަމަށް ވައުދުވެވަޑައިގެންފައެވެ. އެއީ އެމެރިކާގެ އުސޫލުތަކާ ޚިލާފަށް ގާއިމުކޮށްފައިވާ ތަނެއް ކަމަށާއި އެ ޖަލުގެ ސަބަބުން އެމެރިކާއަށް ޓެރަރިޒަމާ ދެކޮޅަށް ހަނގުރާމަ ކުރުމަށް އެހީތެރިވުމަށް ބޭނުންވާ ގައުމުތަކާ އެކު އެމެރިކާއިން ގުޅުން ބޭއްވުމަށް ކުރާ މަސައްކަތްތަކަށް ބުރޫ އަރާ ކަމަށް ވެސް އޮބާމާ ވަނީ ވިދާޅުވެފައެވެ.
ނަމަވެސް, ޖަލު ބަންދުކުރަން އޮބާމާއަށް ގޮންޖެހުންތަކެއް ކުރިމަތިވެވަޑައިގެންނެވިއެވެ. އޭގެ ތެރެއިން ބައެއް ކަންކަމަކީ އޭރު ޖަލުތަކުގެ މީހުންނަށް ވާނެ ގޮތަކާ މެދު އުފެދުނު ސުވާލުތަކެވެ. އޮބާމާ ވަނީ ބަންދުގައި ތިބި 100 އަށް ވުރެ ގިނަ މީހުން އެހެން ގައުމުތަކަށް ބަދަލުކޮށް ނުވަތަ ދޫކޮށްލުމަށް އަމުރުކޮށްފައެވެ.
އެމެރިކާގެ ކޮންގްރެސްއިން ވަނީ ބަންދުކޮށްފައި ތިބި މީހުން އެމެރިކާގެ ސްޓޭޓްތަކަށް ބަދަލުކުރުމުގެ ހުއްދަ ނުދީ، ޔަމަން ފަދަ ހަނގުރާމަތައް ހިނގަމުންދާ ގައުމުތައް ހިމެނޭ ގޮތަށް ވަކި ގައުމުތަކަށް ބަދަލުކުރުމަށް ހުރަސް އަޅާފައެވެ.
ޖަލުގެ އާބާދީ މަދުކޮށް ބަންދުކުރަން ކުރި މަސައްކަތްތައް ހުއްޓުނީ ފުރަތަމަ ދައުރުގައި ޖަލުގެ ހުޅުވާފައި ބެހެއްޓުމަށް އެގްޒެކެޓިވް އަމުރެއްގައި ސޮއިކުރެއްވި ޑޮނަލްޑް ޓްރަމްޕްގެ ވެރިކަމުގައެވެ. ޓްރަމްޕް އޭރު ވިދާޅުވީ، ބަންދުގައި ތިބި މީހުން ދޫކޮށްލުމަށް ނުވަތަ ފެސިލިޓީ ބަންދުކުރުމަށް ކުރި މަސައްކަތްތަކުގެ ސަބަބުން އެމެރިކާ ޓެރަރިޒަމްގެ މައްސަލައިގައި ބަލިކަށި ކަމަށް ފެންނަ ކަމަށެވެ.
ކުރިން 2021 ވަނަ އަހަރު ވެރިކަމާ ހަވާލުވެވަޑައިގެންނެވި ފަހުން ރައީސް ޖޯ ބައިޑަން ވަނީ އެތަން ބަންދުކުރުމުގެ މަސައްކަތް އަނެއްކާ ވެސް ފައްޓަވައި ގައިދީން އެހެން ގައުމުތަކަށް ބަދަލުކުރުމުގެ މަސައްކަތް ކުރައްވާފައެވެ. ނަމަވެސް، މި މަހުގެ ފަހުކޮޅު ޓްރަމްޕް ވެރިކަމާ ހަވާލުވެވަޑައިގަތުމުގެ ކުރިން އެއީ ވެދާނެ ކަމެއް ކަމަށް ނުބެލެވެއެވެ.