އިންޑިއާގެ މަގުބޫލު ފިލްމީ ބަތަލާ ރަވީނާ ޓަންޑަންގެ ދަރިފުޅު ރަޝާ ތަޑާނީ ފިލްމު އިންޑަސްޓްރީއަށް ތައާރަފުވާ ފިލްމު "އާޒާދު"ގެ ޓްރެއިލާ ދައްކާލައިފިއެވެ.
ރަވީނާގެ ދަރިފުޅާ އެކު މި ފިލްމުން ބޮލީވުޑަށް ތައާރަފުވާ އަނެއް ޒުވާނާއަކީ އެކްޓަރު އަޖޭ ދޭވްގަންއަށް ބޮޑުބޭބެ ކިޔާ އަމަން ދޭވްގަންއެވެ. އަޖޭ ދޭވްގަން މުހިންމު ރޯލެއް ކުޅޭ މި ފިލްމުގެ ޓްރެއިލާ ރިލީޒްކުރުމުގެ ކުރިން 20 އަހަރުގެ ރަޝާގެ ހުނަރުވެރި ނެށުންތައް ދައްކައިދޭ ލަވައެއް ވެސް ވަނީ ބެލުންތެރިންނަށް ދައްކާލާފައެވެ.
ގިނަ އަދަދެއްގެ ބެކް ޑާންސަރުންތަކަކާ އެކު ޖެލިމުއްނެތި ރަޝާ ނަޝަމުން ދިޔަ ލަވަ "އުއި އައްމާ" ބެލުމަށް ފަހު ވަރަށް ގިނަ ބަޔަކު ވަނީ ރަޝާއަށް ތައުރީފުކޮށްފައެވެ.
ފިލްމު "އާޒާދު"ގެ ލަވައެއްގައި ބަތަލާ ރަޝާ--ފޮޓޯ/ބޮލީވުޑްހަންގާމާ
މި ފިލްމުގެ ޓްރެއިލާއިން ފެންނަ މަންޒަރުތަކުން ވެސް ރަޝާގެ ހުނަރު ވަރަށް ރަނގަޅަށް ފެންނަ ކަމަށާއި ރަވީނާގެ ޒުވާން ދުވަސްވަރުގެ ހަނދާންތައް ރަޝާ ފެނުމުން އާ ކުރުވާ ކަމަށް ވަރަށް ގިނަ ބެލުންތެރިން ވަނީ ބުނެފައެވެ.
ވަރަށް ރީތި ލޯބީގެ ވާހަކައެއް ގެނެސްދޭ މި ފިލްމަކީ މީގެ ކުރިން ވެސް ޒުވާން ތަރިން ފިލްމު އިންޑަސްޓްރީއަށް ތައާރަފުކޮށްދީފައިވާ ޑައިރެކްޓަރު އަބިޝޭކް ކަޕޫރުގެ ފިލްމެކެވެ. މި ފިލްމުން އަޖޭ ފެންނާނީ ހުނަރުހުރި އަސް ދުއްވާ އަދި އަސް ގެންގުޅޭ މީހެއްގެ ރޯލުންނެވެ. އަޖޭގެ ލޯބިވެރިޔާގެ ރޯލުން ފިލްމުން ފެންނާނީ ފިލްމު "ކޮކްޓެއިލް"އިން ސިނަމާއަށް ތައާރަފުވި ބަތަލާ ޑަޔާނާ ޕެންޓީއެވެ.
ފިލްމު "އާޒާދު"ގެ ޓްރެއިލާއަށް މިހާތަނަށް ލިބެމުން އަންނަ ރިވިއުސް ރަނގަޅުވެފައިވާއިރު އަލަށް ފިލްމީ ދާއިރާއަށް ތައާރަފުވާ ރަޝާއާއި އަމަންގެ ފިލްމީ ކެރިއަރު ފެންނަނީ ވަރަށް އުޖާލާކޮށް ކަމަށާއި މި ދެ ޒުވާނުންނަކީ ވަރަށް ކާމިޔާބު ފިލްމީ ތަރިންނަށް ވާނެ ކަމަށް ބެލުންތެރިން ވަނީ ބުނެފައެވެ. މި ފިލްމު ސިނަމާތަކަށް ގެންނަން ތާވަލުކުރެވިފައިވަނީ މި މަހުގެ 17 ވަނަ ދުވަހެވެ.