ފެޝަނަކީ ކޮންމެ ދުވަހެއްހެން ބަދަލުވަމުން އަންނަ އެއްޗެކެވެ. އެގޮތުން، މިއަދު ލާ އެއްޗަކީ ފަހަރެއްގައި މާދަމާއަށް އައުޓްޑޭޓް ވެދާނެ އެއްޗެކެވެ. ހަމަ އެގޮތުން ކުރީގެ ބާ ވެފައިވާ ޓްރެންޑެއް ވެސް ކޮންމެ ވަގުތަކު އައިސްދާނެއެވެ. މި ފަހަރު މިސްރާބު ޖަހާފައި ހުރި އެ ކަހަލަ ދިމާލަކަށެވެ. އެއީ، ސްކިނީ ޖީންސެވެ.
މި ފާއިތުވި ތިން ވަރަކަށް އަހަރުގެ ތެރޭގައި ސްކިނީ ޖީންސަށް އޮތް މަގުބޫލުކަން ވަނީ އެއްކޮށްހެން ނެތިގެން ގޮސްފައެވެ. ސްކިނީ ޖީންސް ލައިގެން އުޅޭ މީހުންނަށް ފާޑުކިޔާ މިންވަރު ވެސް މަދެއް ނޫނެވެ. އޭގެ ބަދަލުގައި މަގުބޫލުވާން ފެށީ ފްލެއާޑް ޖީންސް ނޫނީ "މޯމް" ޖީންސެވެ. ގަޔަށް ބާރު ޖީންސްގެ ޒަމާން ގޮސް ފުޅާ އަދި ދޫކޮށް ހުންނަ ޖީންސްގެ މަގުބޫލުކަން އާންމުވިއެވެ.
މިހާރު ވެސް ގިނަ ބައެއްގެ އައުޓްފިޓްތަކުގެ ތެރޭގައި އެންމެ ގިނައިން ހިމެނޭނީ މިފަދަ ޖީންސެވެ. ފިރިހެނުންގެ ޖީންސްތަކުގެ ލިސްޓަށް ފުޅާ ޖީންސް އަދި ސްކޭޓާ ޖީންސް އާންމުވެފައިވެއެވެ.
ނަމަވެސް، މި އަހަރަކީ މި ފުޅާ ޖީންސްގެ ޓްރެންޑަށް ނިމުމެއް އައިސްދާނެ އަހަރެކެވެ. އެކި ކަހަލަ ޓްރެންޑުތަކުގެ ފޯކާސްޓިން ކުންފުންޏެއް ކަމަށްވާ "ޑަބްލިއުޖީއެސްއެން"ގެ ސީނިއާ ޑެނިމް ސްޓްރެޓެޖިސްޓެއް ކަމަށްވާ ސޫޒީ ޑްރަފާން ބުނެފައިވަނީ މިދިޔަ އަހަރު ފަހު ކޮޅުގައި މި އަހަރު ފެންނާނެ ކަމަށް ލަފާކޮށް ރަންވޭއިން ދައްކާފައިވާ އުފެއްދުންތަކަށް ބަލާއިރު ސްކިނީ ޖީންސްތައް އެނބުރި އަންނާނެއެވެ. އެގޮތުން، މި އަހަރުގެ ކުރީކޮޅު ނުވަތަ ސްޕްރިންގް އަދި ސަމާ ދުވަސްކޮޅު ސްކިނީ ޖީންސް ފެންނަން ފަށާނެ ކަމަށް އޭނާ ލަފާކޮށްފައިވެއެވެ.
އެއަށް ފަހު ގިނަ ބައެއްގެ އަތުގައި އަނެއްކާ ވެސް ސްކިނީ ޖީންސް އޮންނާނެ ކަމަށާއި މިއީ މަގުމަތީން އަނެއްކާ ވެސް އާވާނެ ޓްރެންޑެއް ކަމުގައި ސޫޒަން ލަފާކުރެއެވެ.
އެހެންވީމާ ސްކިނީ ޖީންސަށް ލޯބި ކުރަމުން އައި މީހުންނަށް މިއީ އުފާވެރި ވާހަކައެކެވެ. މީގެ ކުރިން ލައި އަލަމާރި ފަހަތަށް ފޮނުވާލާފައިވާ މި ޖީންސްތައް އަނެއްކާ ވެސް ނަގަންވީ ވަގުތު ފަހަރުގައި ޖެހިދާނެއެވެ. އެހެންވީމާ ސްކިނީ ޖީންސް އަނެއްކާ ޓްރެންޑުވުމުން އެ ލާން ފަށާނަން ހެއްޔެވެ؟