ރައްޔިތުންގެ މަޖިލީހުގެ ވިލުފުށީ ދާއިރާގެ ކުރީގެ މެންބަރު ރިޔާޒު ރަޝީދުގެ އަނބިކަނބަލުން، އައިމިނަތު ނާޒްލީ ނިޔާވެއްޖެއެވެ.
ނާޒްލީ ނިޔާވެފައި ވަނީ މިއަދުގެ ވަގުތެއްގައި އޭޑީކޭ ހޮސްޕިޓަލުގައެވެ.
ނާޒްލީއަކީ ވަރަށް ގިނަ ޚިދުމަތްތަކެއް ކޮށްދެއްވާފައިވާ ބޭކަނބަލެކެވެ. ޚާއްސަ ގޮތެއްގައި ސިއްޙީ ދާއިރާއިން ކޮށްދެއްވާފައިވާ ޚިދުމަތްތައް ފާހަގަކޮށްލެވެއެވެ.
ނާޒްލީ ވަނީ ތެލެސީމިއާ ސެންޓަރުގައި ނަރުހެއްގެ ގޮތުގައި ވަރަށް ދިގު މުއްދަތަކަށް ޚިދުމަތްކުރައްވައިފައެވެ. އެއާއެކު އޭނާ ފާހަގަވަނީ ތެލެސީމިއާ ކުދިންނާއި، މީހުންގެ ލޯބި ހާސިލްކުރައްވައިފައިވާ ބޭކަނބަލެއްގެ ގޮތުގައެވެ.
ނާޒްލީ ނިޔާވުމާ ގުޅިގެން ތެލެސީމިއާ ސެންޓަރުން ކުރި ޕޯސްޓެއްގައި ވަނީ އޭނާގެ ޚިދުމަތްތަކަށް ޝުކުރު އަދައިކޮށްފައެވެ.
ތެލެސީމާ ބަލި ތަހައްމަލުކުރާ މީހުންގެ ޚިދުމަތްތެރިއެއްގެ އިތުރުން ވެސް ނާޒްލީއަކީ ބައެއް އަމިއްލަ މަސައްކަތް ވެސް ކުރެއްވި ބޭކަނބަލެކެވެ.
އިންސްޓަގްރާމްގައި ނާޒްލީ ހިންގި 'ރަހަ މަލާފަތް' ޕޭޖު --
އެގޮތުން ނާޒްލީ ވަނީ "ރަހަ މަލާފަތް" ނަމުގައި ކާބޯތަކެތި ޕޭޖެއް ހިންގަވައިފައެވެ.
އެ ޕޭޖް މެދުވެރިކޮށް ނާޒްލީ ވަނީ ދިވެހި ރަހަތައް ހިމެނޭ ކާބޯތަކެތި ތައްޔާރުކޮށް ޕޯސްޓުކޮށްފައެވެ. އަދި އެ ޕޭޖް މެދުވެރިކޮށް ދިވެހިންގެ އާންމު ކެއުމެއް ކަމަށްވާ ރިހާކުރު، ކާޖާ، މުރަނަރޮށި، މަސްކުރޮޅި، ލޮނުމިރުސް، މަސްމިރުސް ފަދަ ބާވަތްތައް ވިއްކަން އިޝްތިހާރުކުރެއްވިއެވެ.
މީގެ އިތުރުން ނާޒްލީއަކީ ކޭކު އެޅުމަށް ވެސް މޮޅު ކަނބަލެކެވެ. ނާޒްލީ ވަނީ ކޭކު ކޯސްތަކާއި އެކިއެކި ކާބޯތަކެތި ތައްޔާރު ކުރުމުގެ ތަފާތު ކޯސްތައް ހިންގަވައިފައެވެ. އެހެންކަމުން ނާޒްލީ ފާހަގަކޮށްލެވެނީ ޚިދުމަތްތެރި ބޭކަނބަލެއްގެ ގޮތުގައެވެ.
ނާޒްލީ ނިޔާވުމާ ގުޅިގެން ގިނަ އަދަދެއްގެ ޚިދުމަތްތެރިން ގެންދަވަނީ ތައުޒިޔާގެ މެސެޖުތައް ނާޒްލީގެ ފިރިކަލުން ކުރީގެ މެމްބަރު ރިޔާޒަށާއި އެ އާއިލާއަށް ދަންނަވަމުންނެވެ.
އޭގެ ތެރޭގައި ކުރީގެ މެމްބަރު ނިހާން ހުސައިން މަނިކާއި، ކުރީގެ މިނިސްޓަރު އަހްމަދު މަޙްލޫފު ހިމެނިވަޑައިގަންނަވައެވެ.
ނާޒްލީގެ ޖަނާޒާ އޮންނާނީ މާދަމާ ހެނދުނު 09:00 އިން ފެށިގެން އާސަހަރާގައެވެ. ކަށުނަމާދުކުރުން އޮންނާނީ މާދަމާ ހަވީރު އަސުރު ނަމާދަށްފަހުގަައި، އާސަހަރާގައެވެ.