މިދިޔަ ސަރުކާރުން ހިންގި "ބިންވެރިޔާ" ސްކީމުގެ ދަށުން ނުހައްގުން ބަޔަކަށް ގޯތިދިންކަމަށް ތުހުމަތު ކުރާ މައްސަލައިގައި، ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ދިރިއުޅުއްވާ ގެ، ބަލައިފާސްކުރިއިރު ދަބަހަކުން މިލިއަނަކަށްވުރެ ގިނަ ރުފިޔާ ފެނުނުކަން އެނގިއްޖެއެވެ.
ފަޒުލްގެ ގެ ބަލައިފާސްކުރީ ކޯޓު އަމުރެއްގެ ދަށުން މިދިޔަ މަހު 23ވަނަ ދުވަހުގެ ރެއެެވެ.
އެ ރޭ ފުލުހުން ވަނީ އެ ގެ ބަލައިފާސްކޮށް ބޭނުންވާ ބައެއް ތަކެތި ގެންގޮސްފައެވެ.
އެކަމުގެ މައުލޫމާތު އެނގޭ ބޭފުޅަކު "ސަން"އަށް ކަށަވަރުކޮށްދެއްވި ގޮތުގައި ފަޒުލްއާ ގުޅޭ ދަބަހަކުން މިލިއަނަކަށްވުރެ ގިނަ ނަގުދު ފައިސާ ވަނީ ފެނިފައެވެ. ނަމަވެސް އެއީ ކޮން ކަމަކާ ގުޅޭ ފައިސާއެއް ކަމެއް އަދި ނޭނގެއެވެ. އަދި އެ ފައިސާއާ ގުޅުވައި ކުރާ ތުހުމަތެއް ވެސް ނޭނގެއެވެ.
މި ކަމާ ގުޅިގެން ރަސްމީކޮށް އަދި ފުުލުހުން މީޑިއާތަަކަށް މައުލޫމާތު ދީފައެއް ނުވެއެވެ.
ނުހައްގުން ގޯތިތަކެއް ދިން މައްސަލައިގައި އެންމެ ބޮޑު ތުހުމަތެއް ކުރަނީ ފަޒުލްއަށެވެ. މި މައްސަލައިގައި ނުހައްގުން ގޯތި ލިބުން މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެއެވެ.